Kruka tirimakti de na ala sei

Soleki fa a sori, dan kruka tiriman na tiriman di e gebroiki a makti fu den fu kisi wini gi densrefi. A sani disi e pasa bun langa kaba. Fu eksempre, Bijbel abi wan wet di e taki dati sma no mag teki tyuku na ini krutu afersi. Sobun, a gwenti disi ben de kaba moro leki 3500 yari pasa (Eksodes 23:8). A no de fu taki dati krukafasi no abi fu du nomo nanga a teki di sma e teki tyuku. Son leisi kruka lantiman e fufuru sani, den e du sani di den no abi a reti fu du, èn den e fufuru lantimoni srefi. Kande den e gebroiki a makti fu den tu fu yepi mati nanga famiri na wan kruka fasi.

Aladi kruka sani kan pasa na ini iniwan organisâsi fu libisma, toku a gersi leki lantiman na den moro kruka sma. Na ini 2013, Transparency International, wan organisâsi di e luku sortu kondre na den moro krukawan, sori taki sma na heri grontapu feni taki den feifi moro kruka organisâsi na: politiek partèi, skowtu, lantiman, na asamblei, nanga krutuman. Luku wan tu sani di e sori o bigi a problema de.

• AFRIKA: Na ini 2013, krutuman krutu sowan 22.000 lantiman fu Zuid-Afrika fu di den du kruka sani.

• ZUID-AMERIKA: Na ini 2012, krutuman leisi strafu gi 25 sma na ini Brasyonkondre fu di den ben gebroiki lantimoni fu pai sma fu horibaka gi a politiek partèi fu den. Wan fu den sma dati ben de a moro makti man baka a president.

• ASIA: Na ini Seoul, Zuid-Korea, 502 sma dede di wan bigi wenkri broko fadon na ini 1995. Di sma ondrosuku a tori, den kon si taki den sma di bow a wenkri pai edeman fu a foto tyuku fu kan bow nanga smenti di no bun èn fu kan pasa den bow-wet fu a kondre.

• EUROPA: „[Na ini Europa, a kruka] problema disi bigi srefisrefi”, na so Cecilia Malmström, na edeman fu na organisâsi di e luku fa sani e go na ini den kondre fu Europa, e taki. A e taki moro fara dati „a no sori leki den tiriman e meki muiti fu tyari wan kaba kon na den kruka sani di e pasa”.

A no makriki fu tyari wan kaba kon na den kruka sani di tiriman e du. Professor Susan Rose-Ackerman, di e ondrosuku fa wan kaba kan kon na den kruka sani di e pasa, skrifi taki fu man lusu a problema disi, dan „lanti musu kenki a heri fasi fa den e du bisnis”. Aladi a gersi leki wan lusu no de gi a problema disi, toku Bijbel e sori taki moro bigi kenki o kon èn wi no abi fu tweifri na dati.