TORI FU A KAFTI | WI MUSU BRIBI SABIMAN MORO LEKI BIJBEL?

Sabiman no sabi ala sani

No so langa pasa, sma di no e bribi srefisrefi na ini Gado, skrifi wan tu buku pe den e krutu kerki na ala sortu fasi. Den buku disi tyari omeni dyugudyugu nanga haritaki kon, baka di furu sma leisi den. Luku san David Eagleman, wan sabiman di e ondrosuku den senwe titei fu libisma e taki fu den buku disi: „Son sma di e leisi den sortu buku disi . . . e denki taki sabiman sabi ala sani.” A e taki tu: „Ma bun sabiman wani tan leri nyun sani, fu di den sabi taki furu sani de ete di den kan ondrosuku.”

Wan sabiman e luku den stari nanga wan telescoop

Na ini den hondrohondro yari di pasa, koni sabiman ondrosuku furu sani na ini a naturu èn den kon sabi kefalek moi sani di ben e dangra den fosi. Ma sonwan fu den meki wan lo fowtu. Isaac Newton ben de wan fu den moro koni sabiman di grontapu sabi. A sori fa a zwaartekracht e sorgu taki den planeiti, den stari, nanga den starisistema no e tuka nanga makandra na ini na universum. Na en kon nanga ala den sortu kefalek wiskunde di sma e gebroiki fu seti computer, fu go na tra planeiti, èn fu ondrosuku a krakti fu na atoom. Ma Newton ben e ondrosuku den stari èn a ben e du towfruwroko tu fu sori taki yu kan kenki sani soleki loto, kopro, nanga isri kon tron gowtu, aladi dati no kan.

Ma 1500 yari fosi a ten fu Newton, a Griki sabiman Ptolomeus ben e ondrosuku den sani na hemel nanga en ai wawan. A ben sabi soifri pe den planeiti de te a ben e luku hemel te neti, èn a ben sabi heri bun fa fu meki karta fu den kondre fu grontapu. Ma a ben e bribi taki ala sani na ini na universum e drai lontu grontapu. Sabiman Carl Sagan di e ondrosuku na universum, skrifi a sani disi fu Ptolomeus: „Libisma bribi 1500 yari langa taki na universum e drai lontu grontapu. A sani disi e sori taki aladi wan sma kan koni kefalek, toku a kan meki fowtu.”

Na ini a ten disi sabiman e miti a srefi sani. Den o man fruklari ala sani fu na universum? Aladi a de wan moi sani taki sabiman du furu sani di tyari wini kon gi wi, toku wi musu hori na prakseri taki den no sabi ala sani. Wan sabiman di nen Paul Davies ben taki: „Noiti wi o man fruklari finifini fa ala sani na ini na universum e wroko. Ala ten wan sani o de di sma no o kaba frustan.” A sani disi di a man disi taki, tru. Noiti libisma o man sabi ala sani fu na universum. Sobun te sma e taki dati sabiman man fruklari ala sani di de, dan luku bun san yu e bribi.

A de krin taki Bijbel kan leri wi sani di sabiman no man leri wi

Luku san Bijbel e taki fu den kefalek moi sani di Gado meki: „Yehovah, den sani di yu meki furu srefisrefi. . . . Grontapu lai nanga den sani di yu meki” (Psalm 104:24). Den sani di Gado meki furu so te, taki libisma no o man frustan den alamala. Dati meki den wortu disi di na apostel Paulus skrifi sowan 2000 yari pasa, tru te now ete: „Ai, den blesi, a koni nanga a sabi fu Gado, furu trutru! Wi no man frustan fa a e krutu sani èn wi no man kon sabi fa den pasi fu en de!”—Romesma 11:33.

Sani di sabiman no man leri wi

Sabidensi e yepi sma fu kon sabi moro fu den sani na hemel nanga grontapu, ma Bijbel e gi wi rai di e yepi wi fu libi bun nanga trawan èn fu abi wan koloku libi. Luku wan tu fu den rai dati.

A e yepi wi fu no du ogri

Abi lespeki gi a libi

„Un no musu kiri sma.”—Eksodes 20:13.

„Ibri sma di e teige en brada, na wan kiriman.”—1 Yohanes 3:15.

Tan suku freide

„No du ogri moro, ma du san bun. Suku freide èn du muiti fu feni en.”—Psalm 34:14.

„Den wan di e libi bun nanga trawan, e sai na ini bun ten èn a froktu di den e koti na retidu.”—Yakobus 3:18.

No lobi ogridu

„Yehovah srefi e ondrosuku den reti-ati sma nanga den ogri sma èn efu wan sma lobi ogridu, dan Gado no lobi en kwetikweti.”—Psalm 11:5.

„No dyarusu na tapu wan sma di e du soso ogri èn no waka na en baka, bika Yehovah e tegu gi sma di e bedrigi trawan.”—Odo 3:31, 32.
A e yepi osofamiri fu de koloku

Arki yu papa nanga mama

„Un pikin, gi yesi na un papa nanga mama soleki fa Gado wani, bika na dati Gado e feni bun. ’Lespeki un papa nanga un mama.’ Disi na a fosi komando di abi fu du nanga wan pramisi: ’Dan sani sa go bun nanga yu èn yu sa libi langa na grontapu.’”—Efeisesma 6:1-3.

Gi yu pikin bun leri

„No tanteri den pikin fu unu, ma tan kweki den nanga a leri èn nanga den rai fu Yehovah.”—Efeisesma 6:4.

„No tanteri den pikin fu unu, so taki den no lasi-ati.”—Kolosesma 3:21.

Lobi èn lespeki yu trowpatna

„Meki ibriwan fu unu lobi en wefi leki fa a lobi ensrefi. Na a tra sei, a wefi musu abi bigi lespeki gi en masra.”—Efeisesma 5:33.
A e yepi wi fu no pori grontapu

Luku san Bijbel e taki fu den sma di ben e pori a kontren fu owruten Israel: „Den sma di e libi drape pori a kondre . . . Na den sma di e libi drape meki taki disi pasa” (Yesaya 24:5, 6). Den sma di e pori grontapu o abi fu gi frantwortu na Gado. A o „pori den wan di e pori grontapu” (Openbaring 11:18). Den no o man lon gi a strafu di den o kisi.