TORI FU A KAFTI | SAN YU KAN DU TE YU ABI BROKO-EDE?
Broko-ede de na ala sei!
„Mi ben go fu bai nyanyan, ma den wenkri ben abi soso kuku, di ben diri omeni tron moro leki san mi ben gwenti pai! A tra dei den wenkri no ben abi nyanyan-sani moro.”—Paul, Zimbabwe.
„Mi masra poti mi sidon, ne a taigi mi taki a o gowe libi mi. Fa mi o man tyari a pen disi? San o pasa nanga den pikin fu mi?”—Janet, Amerkankondre.
„Te a sireine e bari, dan mi e lon go suku wan presi pe mi kan didon plata te den raket e sutu panya. Baka wan tu yuru mi anu e beifi ete.”—Alona, Israel.
Wi e libi na ini ’muilek ten di tranga fu pasa’ (2 Timoteyus 3:1). Furu sma abi moni problema, osofamiri problema, feti de na ala sei, takru siki e panya, rampu e pasa, èn libisma e pori grontapu. Ma boiti den sani disi sma abi tra broko-ede tu. Kande wi e aksi wisrefi: ’A kundu di mi e firi na mi skin, kan de kanker? Fa a grontapu o de te den granpikin fu mi kon bigi?’
Son leisi a bun fu broko wi ede nanga sani. Fu eksempre te wi musu meki wan eksame, te wi musu du wan sani na fesi furu sma, noso te wi musu abi wan takimakandra fu man feni wan wroko, dan wi kan broko wi ede pikinso. A bun tu te wi e frede gi sani di kan du wi ogri. Ma tumusi furu broko-ede no bun gi a gosontu fu wan sma. Di sma ondrosuku sowan 68.000 bigisma, dan den kon si taki srefi den pikinpikin broko-ede di sma abi kan meki taki den dede frukufruku. Dati meki Yesus ben aksi a sani disi: „Suma fu unu di e broko en ede nanga sani, kan meki en libi kon pikinso moro langa?” A no de fu taki dati broko-ede no e meki yu libi moro langa. Fu dati ede Yesus gi wi a rai: „No broko un ede moro” (Mateyus 6:25, 27). Wi o man fiti a rai disi?
Fu man du disi wi musu wroko nanga den koni rai fu Bijbel, wi musu poti bribi na ini Gado, èn wi musu abi a howpu taki sani o go moro bun na ini a ten di e kon. Awinsi wi no abi bigi problema now, sani kan kenki na ini a ten di e kon. Meki wi go luku sortu broko-ede Paul, Janet, nanga Alona ben abi èn fa den sani di wi kari dyaso yepi den.