TORI FU A KAFTI | FU SAN EDE WI MUSU DE EERLIJK?

San kan pasa te sma no de eerlijk?

„Te yu de na ini wan muilek situwâsi, dan son leisi yu o abi fu lei fu komoto na ini.”—Samantha, Zuid-Afrika.

Yu e agri nanga den wortu dati? Neleki Samantha, wi alamala ben de na ini wan muilek situwâsi wan leisi. Efu wi de na ini wan situwâsi pe wi e kisi a firi fu du wan sani di no eerlijk, dan a sani di wi o du kan sori sortu sma wi de trutru. Fu eksempre, son sma no abi bisi fu lei te den meki wan fowtu, soso fu di den no wani kisi syen. Ma te sma kon sabi taki na lei den lei, dan dati kan tyari takru bakapisi kon. Meki wi luku wan tu sani di kan pasa te sma no de eerlijk.

SMA NO O FRUTROW WI MORO

Mati e frutrow makandra. Te wan sma e frutrow wan trawan, dan a no e frede taki a trawan o du wan hati sani nanga en. Ma sma no e frutrow makandra wantewante, a e teki ten. Sma e leri fu frutrow makandra te den e du sani makandra, te den e taki krin nanga makandra, èn te den e yepi makandra sondro fu suku den eigi bun. Ma wán lei nomo kan meki taki wan sma no e frutrow wan trawan moro. Te dati pasa, dan a kan muilek srefisrefi fu frutrow a trawan baka.

Oiti wan sma di yu ben si leki wan bun mati kori yu? Efu dati pasa, dan fa yu ben e firi? A no de fu taki dati a sani dati hati yu. Wi kan frustan dati. Te sma no de eerlijk nanga makandra, dan nofo tron dati e pori a matifasi fu den.

WI SREFI KAN TRON SMA DI NO DE EERLIJK

Di Professor Robert Innes fu na Universiteit fu Kalifornia du wan ondrosuku, a kon si taki „sma di no de eerlijk kan meki taki trawan kon abi a fasi dati tu”. Sobun, a fasi disi de leki wan siki di kan panya makriki. Te yu e bumui nanga wan sma di lobi kori trawan, dan te fu kaba yu srefi kan kisi a fasi dati tu.

San yu kan du fu no tron wan sma di no de eerlijk? Bijbel kan yepi yu. Meki wi luku wan tu rai fu Bijbel di kan yepi wi.

Sani di sma e du te den no de eerlijk

Lei

SAN NA DISI? Na te wi e taigi wan sma wan sani di no tru aladi a abi a reti fu sabi san tru. Sma kan lei na difrenti fasi. Kande den e fruteri wan tori tra fasi leki fa a pasa trutru, kande den no e fruteri a heri tori, noso kande den e poti moro sowsu gi a tori, soso fu meki sma si a tori heri tra fasi leki fa a de trutru.

SAN BIJBEL E TAKI: „Yehovah e tegu gi sma di e bedrigi trawan, ma a de bun mati nanga den sma di ati krin” (Odo 3:32). „Now di unu no e lei moro, ibriwan fu unu musu taki san tru nanga trawan.”—Efeisesma 4:25.

Gi sma porinen

SAN NA DISI? Na te wi e fruteri lei nanga ogri sani fu wan sma fu di wi wani taki trawan denki takru fu en.

SAN BIJBEL E TAKI: „Wan man di lai triki e tan sutu faya gi sma fu meki trobi èn wan sma di e taki ogri-ati lei e pori mati” (Odo 16:28). „Pe udu no de wan faya e dede. Pe ogri-ati leiman no de trobi e kon kowru.”—Odo 26:20.

Bedrigi

SAN NA DISI? Na te wan sma e kori wan trawan fu puru en moni noso en gudu na en anu.

SAN BIJBEL E TAKI: „Un no musu bedrigi un wrokoman di de na nowtu èn di pôti” (Deuteronomium 24:14, 15). „A sma di e bedrigi den mofinawan e pori a nen fu en Mekiman, ma a sma di e du bun gi den pôtiwan e gi En glori.”—Odo 14:31.

Fufuru

SAN NA DISI? Na te wan sma e teki wan sani fu wan trawan aladi a trawan no gi en primisi fu teki en.

SAN BIJBEL E TAKI: „A sma di e fufuru, no musu fufuru moro, ma a musu wroko tranga. Meki a du bun wroko nanga en anu, so taki a kan prati wan sani nanga sma di de na nowtu” (Efeisesma 4:28). „No kori unsrefi. . . . Fufuruman, gridiman, drunguman, sma di e kosi trawan, nanga sma di e puru sani na tra sma anu nanga tranga no o kisi a Kownukondre fu Gado.”—1 Korentesma 6:9, 10.