Safri-ati—Wan fasi fu sori taki yu koni

A TRA leisi di Antonia go drape a frow bari en baka. San a du? A taki: „A no ben makriki gi mi. A frow no ben abi leti fu bari mi.” Toku Antonia aksi a frow pardon baka èn a taigi en taki a ben frustan taki a situwâsi fu en mama ben hebi gi en.

Efu yu ben de Antonia, dan san yu ben o du? Yu ben o sori safri-ati? A ben o muilek gi yu fu hori yusrefi? Kande a no makriki gi wi fu hori wisrefi na ini so wan situwâsi. Te wi abi broko-ede noso te wan sma e suku trobi nanga wi, dan a no makriki srefisrefi fu sori safri-ati.

Ma Bijbel e gi Kresten deki-ati fu sori safri-ati. Bijbel e taki srefi dati wan sma di e sori safri-ati na wan koni sma. „Suma fu unu koni èn abi frustan?”, na dati Yakobus ben aksi. A piki: „Meki a tyari ensrefi na wan bun fasi èn meki a du sani di e sori taki a abi safri-ati fasi fu di a koni” (Yak. 3:13). Fa wan sma di abi safri-ati e sori taki a abi a koni fu Gado? San kan yepi wi fu kweki safri-ati?

FU SAN EDE A DE WAN KONI SANI FU SORI SAFRI-ATI?

Te sma e sori safri-ati, dan dati kan meki taki trawan ati no e bron. „Wan safri piki e kowru bigi atibron, ma te wan sma e taki sani fu hati trawan, dan dati e meki sma kisi atibron.”​—Odo 15:1.

Te wi e kisi atibron, dan dati kan meki wan situwâsi kon moro ogri (Odo 26:21). Ma te wi e piki wan sma na wan safri fasi, dan dati kan kowru en ati. A kan meki srefi taki wan sma di wani feti nanga wi, no e atibron moro.

Na dati Antonia ondrofeni tu. Di a frow di wi taki fu en na a bigin si taki Antonia taki na wan safri fasi nanga en, dan a bigin krei. A fruteri Antonia taki a ben abi furu problema èn taki sani no ben e go bun nanga en famiri. Antonia ben man preiki gi a frow, èn a bigin studeri Bijbel nanga en. A sani disi pasa fu di a ben hori ensrefi èn fu di a ben abi switifasi.

Te wi e sori safri-ati, wi o de koloku. „Koloku fu den safri-ati sma, bika den o kisi grontapu.”​—Mat. 5:5.

Fu san ede safri-ati sma de koloku? Furu sma di ben gwenti kisi atibron fosi, leri fu sori safri-ati èn den de koloku now. A libi fu den kon moro bun èn den abi wan moi howpu gi a ten di e kon (Kol. 3:12). Adolfo wan kring-opziener na ini Spanyorokondre e memre ete fa en libi ben de fosi a kon na ini a tru anbegi.

Adolfo e fruteri: „Mi libi ben bruya. Furu leisi mi ben lasi misrefi èn mi ben kisi bigi atibron. Te mi ben atibron so, dan wan tu fu den mati fu mi ben frede srefi san mi ben o du. Ma te fu kaba wan sani pasa di meki taki mi kenki. Wan dei mi feti nanga wan sma èn a sma dati dyuku mi siksi leisi. Mi lasi so furu brudu taki pikinmoro mi dede.”

Ma now Adolfo e leri sma fu sori safri-ati, èn en srefi e du tu san a e leri trawan. Furu sma lobi en fu di a abi switifasi. Adolfo e taki dati a breiti taki a ben man kenki èn taki Yehovah yepi en fu sori safri-ati.

Te wi e sori safri-ati, dan Yehovah breiti nanga wi. „Mi manpikin, de koni èn meki mi ati prisiri, so taki mi kan gi wan piki na a sma di e spotu mi.”​—Odo 27:11.

Didibri na a moro bigi feanti fu Yehovah, èn fu taki en leti a e spotu en. Gado abi ala reide fu mandi fu den lei di Satan e fruteri fu espresi, ma toku Bijbel e taki dati Yehovah „ati no e bron esi” (Eks. 34:6). Te wi e meki muiti fu sori safri-ati neleki Gado èn te wi ati no e bron esi, dan wi o de koni sma èn Yehovah o feni wi bun.​—Ef. 5:1.

Na ini a grontapu disi furu sma no abi switifasi. Kande wi e miti nanga sma di ’lobi dyaf, di abi heimemre, di e taki ogri fu trawan, di e fruteri ogri-ati lei fu trawan, di no man dwengi densrefi èn di e du ogri-ati sani’ (2 Tim. 3:2, 3). Ma toku Kresten musu meki muiti fu kweki safri-ati. Gado Wortu e memre wi taki „a koni fu hemel . . . lobi freide, a no e hori nomo na san a e prakseri” (Yak. 3:17). Te wi lobi freide èn te wi no e hori nomo na san wi e denki, dan dati e sori taki wi abi a koni fu Gado. A koni dati o yepi wi fu sori safri-ati te sma e suku trobi nanga wi. Boiti dati, wi o kon moro krosibei fu Yehovah, a sma di abi ala koni.