Fa yu kan bigin leisi Bijbel?

San yu kan du fu kon lobi leisi Bijbel èn fu leri furu fu en? Luku feifi sani di yepi furu sma.

Suku wan bun presi. Suku wan presi pe furu babari no de. Sorgu taki sani no e puru yu prakseri te yu e leisi. Suku wan presi pe nofo faya e skèin èn pe a no banawtu. Disi o yepi yu fu poti prakseri na san yu e leisi.

Opo yu ati gi den sani di yu e leisi. Bijbel e kon fu wi Papa na hemel. Sobun, yu o man leri furu fu Bijbel te yu e si yusrefi leki wan pikin-nengre di de klariklari fu teki leri fu en papa di lobi en. Efu yu e denki takru fu son sani di skrifi na ini Bijbel, dan pruberi fu poti den denki dati na wan sei so taki Gado kan gi yu leri.​—Psalm 25:4.

Begi fosi yu leisi. Na Gado prakseri skrifi na ini Bijbel. Sobun, wi abi a yepi fu en fanowdu fu man frustan Bijbel. Gado pramisi taki a o gi „santa yeye na den sma di e aksi en” (Lukas 11:13). A santa yeye o yepi yu fu frustan den prakseri fu Gado. Te fu kaba, a o yepi yu fu frustan „srefi den dipi sani fu Gado”.​—1 Korentesma 2:10.

Pruberi fu frustan san yu e leisi. Yu no musu leisi fu di yu wani klari wan buku. Prakseri bun fu san yu e leisi. Aksi yusrefi den sani disi: ’Sortu fasi a sma di mi e leisi fu en, abi? Fa mi kan du san mi e leisi dya?’

Pruberi fu leri wan sani. Efu yu wani kisi wini fu a leisi di yu e leisi Bijbel, dan suku fu leri wan sani di o yepi yu na ini yu libi. Kande yu kan suku fu leri sabi Gado moro bun. Noso yu kan luku fa yu kan tron wan moro bun sma, wan moro bun masra noso wefi. Baka dati, leisi pisi na ini Bijbel di o yepi yu fu du san yu abi na prakseri.a

Den feifi sani disi o yepi yu fu bigin leisi Bijbel. Ma san kan yepi yu fu kon lobi leisi Bijbel? A tra artikel o taki fu wan tu sani di yu kan du.