„A ben de a moro bun kado di mi kisi”

Dati na san wan meisje fu 13 yari taki di a kisi wan dagu leki kado. Wan bigi bisnis uma taki dati a computer di a kisi fu en papa di a ben e go na skoro ete, ben kenki en heri libi. Èn wan man ben taki dati a karta di en wefi meki gi en di den ben trow wán yari, ben de a moro moi kado di a kisi.

Ibri yari furu sma e du muiti fu suku a moro bun kado di den kan gi wan mati noso wan famiriman tapu wan spesrutu dei. Èn furu sma ben o breiti efu a sma di den e gi a kado, lobi a kado. Fa a de nanga yu? Yu ben o wani gi wan sma wan kado di a lobi trutru? Noso yu ben o wani kisi wan kado di yu lobi?

Te wan sma e kisi wan kado, dan a e breiti srefisrefi. Ma a sma di e gi a kado e firi bun tu. Wi kan frustan disi, fu di Bijbel e taki: „Wan sma sa de moro koloku te a e gi sani, leki te a e kisi sani” (Tori fu den apostel 20:35). A no de fu taki dati a sma di e gi a kado e firi moro prisiri te a sma di e kisi a kado lobi a kado trutru.

Fa yu kan sorgu taki te yu e gi wan sma wan kado, dan yu nanga a sma e prisiri? Kande yu no man gi wan sma a moro bun kado di a ben kan kisi. Toku san yu kan du fu gi a sma wan kado di a o lobi trutru?