Profeititori di kon tru

Na ini a fosi artikel wi ben taki fa a lukuman na Delphi ben kori Croesus èn fa a sani dati meki taki a lasi a feti teige a kownu fu Persia. Ma Bijbel e taki fu wan moi profeititori di abi fu du nanga a kownu fu Persia èn di kon tru finifini.

Sowan 200 yari na fesi, langa ten fosi a kownu ben gebore, a profeiti Yesaya, di ben de wan Hebrewsma, taki dati Sirus ben o teki a makti foto Babilon abra èn a taki tu fa a ben o du dati.

Yesaya 44:24, 27, 28: „[Yehovah] taki: . . . ’Na mi e taigi a bigi watra: ’Yu musu tron dampu. Mi o meki ala den liba fu yu kon drei.’ Na mi e taki fu Sirus: ’En na mi skapuman. A o du ala san mi wani.’ Mi ben taki fu Yerusalem: ’Sma o bow en baka’, èn fu a tempel: ’Den o poti yu fondamenti baka.’”

Soleki fa a Griki historia skrifiman Herodotus ben taki, a legre fu Sirus meki a watra fu na Eufraat-liba di ben pasa na ini a foto Babilon, lon go na wan tra sei. A sani disi di Sirus ben du, meki taki den srudati fu en ben man waka pasa na ini a liba fu go na ini a foto. Baka di Sirus teki a foto abra, a fri den Dyu di ben de na ini katibo na ini Babilon èn a gi den primisi fu drai go baka na Yerusalem. Den go bow a foto disi baka di ben pori 70 yari na fesi.

Yesaya 45:1: „Mi, Yehovah, teki mi salfuwan Sirus na en reti-anu èn mi tyari en fu go wini den pipel. Mi o gebroiki en fu puru a makti fu den kownu. Mi o opo den tu doro fu a portu, so taki a portu no tapu te a e kon na ini a foto.”

Den Persiasma ben kan go na ini a foto fu di sma no ben tapu den bigi doro na ini a skotu fu a foto. Efu den Babilonsma ben sabi san Sirus ben o du, dan den ben o sroto ala den portu di ben e opo na a sei fu a liba. A sani disi meki taki den Persiasma ben man teki a foto abra sondro problema.

A moi profeititori disi na wan fu den someni trawan di de fu feni na ini Bijbel èn di kon tru finifini.a Nofo tron na falsi gado e yepi sma fu taki san o pasa na ini a ten di e kon. Ma den Bijbel profeititori de tra fasi fu di den e komoto fu a sma di ben taki: „Mi na a sma di e fruteri sensi a bigin san o pasa te fu kaba. Na mi e fruteri langa ten na fesi san mi o du na ini a ten di e kon.”​—Yesaya 46:10.

A tru Gado wawan di nen Yehovah, kan taki so wan sani. Dati meki a nen fu en wani taki: „A e meki kon tron.” Disi e sori taki a man sabi fa sani o waka na ini a ten di e kon èn taki a kan meki sani waka soleki fa a wani. Sobun, wi kan de seiker taki a o du ala den sani di a pramisi.

PROFEITITORI DI E KON TRU NA INI A TEN DISI

Yu wani sabi san Bijbel profeititori e taki fu a ten fu wi? Sowan 2000 yari na fesi, Bijbel ben taki dati „na ini den lasti dei muilek ten o de di tranga fu pasa”. Den lasti dei fu san? A no den lasti dei fu grontapu noso fu libisma, ma fu a feti di sma e feti, a kwinsi di sma e kwinsi trawan, èn fu a pina di sma e pina dusundusun yari kaba. Meki wi go luku wan tu fu den profeititori di abi fu du nanga „den lasti dei”.

2 Timoteyus 3:1-5: „Na ini den lasti dei . . . , sma o lobi densrefi nomo. Den o lobi moni. Den o lobi dyaf. Den o abi heimemre. Den o taki ogri fu trawan. Den o trangayesi papa nanga mama. Den no o de nanga tangi. Den no o tai hori na trawan. Den no o lobi trawan. Den no o wani meki kruderi. Den o fruteri ogri-ati lei fu trawan. Den no o man dwengi densrefi. Den o du ogri-ati sani. Den no o lobi san bun. Den o tori trawan. Den o du san densrefi wani. Den o abi bigimemre. Den o lobi prisiri na presi taki den lobi Gado. A o gersi leki den e dini Gado fayafaya, ma a libi fu den o sori taki dati no de so.”

Yu no feni taki moro nanga moro sma e tyari densrefi na a fasi disi? Yu no si taki furu sma na wi lontu lobi densrefi, taki den lobi moni, èn taki den abi bigimemre? Yu no si taki furu sma e fruwakti furu fu trawan aladi den srefi no wani agri nanga trawan? A no de fu taki dati pikin na ala sei e trangayesi den papa nanga mama èn taki furu sma lobi prisiri moro leki den lobi Gado. Èn sani e kon moro ogri dei fu dei.

Mateyus 24:6, 7: „Unu o yere taki feti e feti èn unu o yere nyunsu taki feti de. . . . A wan pipel o go feti nanga a tra pipel, èn a wan kownukondre o go feti nanga a tra kownukondre.”

Son ondrosuku di sma du e sori taki a nomru fu sma di dede na ini feti sensi 1914, pasa moro leki 100 milyun. Prakseri fa sma sari èn pina fu a sani disi ede. Ma a sani dati meki taki den kondre tapu nanga feti?

Mateyus 24:7: ’Angriten o de.’

Wan organisâsi fu den Verenigde Naties e taki: „Na ini wan grontapu pe nofo nyanyan de gi ala sma, 815 milyun sma e go sribi nanga leigi bere ibri neti. Dati na wán fu ibri neigi sma. San moro ogri, na taki wán fu ibri dri sma e siki fu di den no e nyan bun.” Sma e denki taki ibri yari sowan dri milyun pikin e dede fu angri.

Lukas 21:11: „Bigi gronseki o de.”

Ibri yari, sowan 50.000 gronseki de di hebi nofo taki sma man firi den. Sowan 100 fu den gronseki dati e pori gebow èn bijna ibri yari wan hebi gronseki e pasa. Wan ondrosuku e sori taki na a pisi ten fu 1975 te go miti a yari 2000, gronseki kiri 471.000 sma.

Mateyus 24:14: „A bun nyunsu disi fu a Kownukondre o preiki gi sma na heri grontapu, so taki sma fu ala kondre kan yere dati, èn dan a kaba o kon.”

Den moro leki aiti milyun Yehovah Kotoigi e preiki a bun nyunsu fu Gado Kownukondre na ini sowan 240 kondre. Den e preiki a bun nyunsu na ini bigi foto, na farawe dorpu, na busi èn srefi te na tapu den bergi. A profeititori e sori taki te a wroko du na a fasi fa Gado wani, dan „a kaba o kon”. San dati wani taki? Dati wani taki dati wan kaba o kon na a tiri fu libisma èn Gado Kownukondre o bigin tiri grontapu. Sortu pramisi o kon tru te Gado Kownukondre o tiri? Leisi moro fara, dan yu o si.