O ten a kaba o kon? San Yesus ben taki

LUKU TU SANI DI YESUS BEN TAKI FU A TEN FU A KABA:

„Fu dati ede, tan na ai bika unu no sabi a dei noso a yuru.”​—MATEYUS 25:13.

„Tan luku, tan na ai, bika unu no sabi o ten den sani disi o pasa.”​—MARKUS 13:33.

Sobun nowan sma na grontapu sabi o ten a kaba o kon. Ma Gado poti „wan ten” fu den sani disi pasa. A poti a „dei nanga a yuru” (Mateyus 24:36). Disi wani taki dati wi no man sabi srefisrefi o ten a kaba fu a grontapu disi de krosibei? Nôno. Yesus ben taigi den disipel fu en fu poti prakseri na wan tu sani di ben o pasa èn di ben o sori taki a kaba de krosibei.

DEN SANI DI BEN O PASA

Den sani disi ben o sori taki „a kaba fu a grontapu disi de krosibei.” Yesus ben taki: „A wan pipel o go feti nanga a tra pipel, èn a wan kownukondre o go feti nanga a tra kownukondre. Na ini a wan presi baka a trawan angriten nanga gronseki o de” (Mateyus 24:3, 7). A ben taki tu dati „takru siki ben o de” di e kiri ipi-ipi sma (Lukas 21:11). Yu e si taki den sani disi e pasa?

Na ini a ten disi, sma e pina fu di feti, angriten, gronseki nanga siki, de na ala sei fu grontapu. Fu eksempre, na ini 2004 wan bigi gronseki na ini na India Se meki taki wan tsunami kiri moro leki 225.000 sma. Na ini dri yari, a COVID-19 siki kiri moro leki 6,9 milyun sma na heri grontapu. Yesus ben taki dati den sani disi ben o sori taki a kaba fu a grontapu disi de krosibei.

„DEN LASTI DEI”

Bijbel e kari a pisi ten fosi a kaba „den lasti dei” (2 Petrus 3:3, 4). Soleki fa 2 Timoteyus 3:1-5 e taki, dan na ini den lasti dei sma no ben o tyari densrefi na wan bun fasi. (Luku a faki „Syatu fosi a kaba fu grontapu.”) Yu e si fa sma e denki densrefi nomo, fa den gridi, fa den abi ogri-ati èn fa den no e sori lobi gi trawan? Ala den sani disi e sori krin taki wi de krosibei fu a kaba fu grontapu.

O langa wi o libi na ini den lasti dei? Soleki fa Bijbel e sori, dan dati o de „wan syatu pisi ten.” Dan Gado o pori „den wan di e pori grontapu.”​—Openbaring 11:15-18; 12:12.

A PARADIJS DE KROSIBEI!

Gado poti a dei nanga a yuru kaba fu pori na ogri grontapu disi (Mateyus 24:36). Ma moro bun nyunsu de. Gado „no wani taki wan sma lasi libi” (2 Petrus 3:9). A e gi wi na okasi fu leri sabi en èn fu gi yesi na en. Fu san ede? Fu di a wani taki wi tan na libi te a o pori a grontapu disi èn a wani taki wi libi na ini a nyun grontapu, a paradijs.

Gado seti sani so taki sma na heri grontapu kan leri sabi san den kan du fu libi na ini a nyun grontapu di en Kownukondre o tiri. Yesus ben taki dati a bun nyunsu fu Gado Kownukondre ben o preiki gi sma „na heri grontapu” (Mateyus 24:14). Na ini 2019, den Yehovah Kotoigi na heri grontapu gebroiki moro leki 2 milyard yuru fu preiki èn fu leri sma sani fu Bijbel. Yesus ben taki dati a preiki wroko ben o du na heri grontapu fosi a kaba kon.

Heri esi libisma tiri o kon na wan kaba. Ma a bun nyunsu na taki yu kan tan na libi te disi o pasa èn taki yu o man libi na ini a paradijs di Gado pramisi. A tra artikel o sori san yu musu du fu kan libi na ini a nyun grontapu.