San yu kan du fu libi na ini a nyun grontapu

Na ini na artikel na fesi wi si taki heri esi Gado o pori na ogri grontapu disi. A o puru ala den problema tu. Wi kan de seiker taki a sani disi o pasa. Fu san ede? Fu di Bijbel, a Wortu fu Gado, e pramisi:

„Grontapu e pasa gowe.”—1 YOHANES 2:17.

Ma wi kan de seiker taki sma o tan na libi fu di a srefi Bijbeltekst e taki:

„A sma di e du a wani fu Gado o tan fu têgo.”

Sobun efu wi wani tan na libi, dan wi musu du a wani fu Gado. Ma wi musu kon sabi Gado fosi wi kan du a wani fu en.

TAN NA LIBI FU DI YU „KON LERI SABI” GADO

Fowtow: 1. Wan ati-oso zuster sidon na gron, a weri èn a e stress. 2. Te a teki wan pauze, a e si taki wan tra zuster de nanga prisiri te a e leisi wan tijdschrift. 3. A tra zuster e leisi wan Bijbeltekst gi en èn a e gi en wan jw.org karta.

Yesus ben taki: „Efu sma wani kisi têgo libi, den musu leri sabi yu, a wan-enkri tru Gado” (Yohanes 17:3). Efu wi wani tan na libi te a kaba kon èn efu wi wani libi fu ala ten, dan wi musu ’leri sabi Gado.’ Disi no wani taki dati wi e bribi nomo taki Gado de, noso fu sabi wan tu sani fu en nomo. Ma wi musu tron en mati. Te wi wani de bun mati fu wan sma, wi e pasa ten nanga a sma dati. Na so a de tu nanga Gado. Luku wan tu prenspari sani san wi musu sabi efu wi wani de wan bun mati fu Gado.

Tru tori di wi e leri fu Bijbel

Wi e leri taki Gado ben wani taki wi libi na ini wan Paradijs.

A meki den fosi libisma, Adam nanga Eva, èn a ben poti den na ini wan moi presi di ben nen a dyari fu Eden. Den no ben abi sondu èn Gado ben gi den ala san den ben abi fanowdu fu de koloku. Den ben kan libi fu ala ten. Solanga den ben tan mati fu Gado den no ben o dede. Ma den bosroiti fu no gi yesi na wan wet fu Gado.

Wi kon sabi fu san ede libisma e pina.

Fu di a fosi man, Adam, ben trangayesi Gado, meki a lasi a kans fu libi fu têgo èn ala tra libisma lasi disi tu. Bijbel e taki: „Wán man meki sondu kon na grontapu èn sondu tyari dede kon. Dati meki ala sma e dede, bika den alamala sondu” (Romesma 5:12). Neleki fa wan sma kan kisi wan siki fu en papa nanga mama, na so ala den pikin fu Adam kisi sondu fu en. Dati meki wi e kon owru èn wi e dede.

Wi kon sabi san Gado du kaba fu yepi wi.

Bijbel e taki: „Gado ben lobi grontapu so te, taki a gi en wan-enkri Manpikin, so taki ala sma di e bribi na ini en no sa dede, ma sa kisi têgo libi” (Yohanes 3:16). Gado seni Yesus kon na grontapu fu pai gi wi. Prabhakar, wan man fu 86 yari na ini India, e taki: „A sani disi e sori mi taki Yehovaha lobi mi trutru. A fasi fa a sori taki a lobi mi e gi mi a howpu taki mi o man libi fu ala ten.”

Wi kon sabi fa wi kan sori warderi gi san Gado du gi wi.

Bijbel e taki dati wi kan sori warderi gi san Gado du gi wi, te wi e „hori den komando fu en” (1 Yohanes 2:3). Nanga furu lobi Yehovah Gado e sori wi san wi kan du fu de koloku nownow kaba (Yesaya 48:17, 18). Gado no wani taki wi pina. A pramisi taki efu wi e gi yesi na en, wi o abi wan koloku libi nownow kaba èn wi o man libi fu ala ten.

LEISI BIJBEL IBRI DEI

Na ati-oso zuster e luku go na hemel te a e leisi Bijbel na ini a pauze. — Yu o man tan na libi te Gado o pori a grontapu disi. Begi en fu yepi yu èn du a wani fu en

Wi e nyan fu man tan na libi. Ma Yesus ben taki: „Sma no musu libi fu brede wawan, ma fu ibri wortu di Yehovah mofo taki.”—Mateyus 4:4.

Wi man feni den wortu fu Yehovah na ini Bijbel. Te yu e studeri a santa buku disi, yu o leri san Gado du na ini a ten di pasa, san a e du nownow èn san a o du na ini a ten di e kon.

BEGI GADO FU YEPI YU

San yu kan du efu yu wani libi leki fa Gado wani, ma a muilek gi yu fu stop du den sani di a no lobi? Kon leri sabi Gado moro bun. Dati o yepi yu fu stop nanga den sani dati.

Luku na eksempre fu wan uma di wi o kari Sakura. A ben e libi wan yayolibi. Di a bigin studeri Bijbel, a kon leri taki a musu „lowe gi hurudu” (1 Korentesma 6:18). Sakura begi Gado fu gi en krakti èn te fu kaba a stop nanga a morsu libi disi. Ma a abi fu tan feti ete. A e taki: „Te den morsu sani dati e kon na ini mi prakseri, mi e begi Yehovah èn mi e taigi en krin fa mi e firi, fu di mi sabi taki mi no man feti a feti disi mi wawan. Begi yepi mi fu kon moro krosibei na Yehovah.” Milyunmilyun sma e kon leri sabi Yehovah neleki Sakura. Yehovah e gi den a krakti di den abi fanowdu fu tyari kenki kon èn fu libi na wan fasi di e gi en prisiri.—Filipisma 4:13.

O moro yu e kon sabi Gado, o moro Gado o kon sabi yu leki wan bun mati (Galasiasma 4:9; Psalm 25:14). Dati o meki taki yu man pasa go na ini a nyun grontapu. Ma fa a nyun grontapu dati o de? A tra artikel o gi wi a piki.

a Yehovah na a nen fu Gado soleki fa a skrifi na ini Bijbel.