Yu ben sabi a sani disi?
San yepi a disipel Stefanus fu tan abi wan korostu firi di sma ben e frufolgu en?
STEFANUS ben tanapu na fesi 71 man di ben abi bigi atibron. Den man disi ben de memre fu a Sanhedrin, a moro hei krutubangi fu Israel. Sobun, den man disi ben de wan tu fu den moro makti man na ini Israel. Na Granpriester Kayafas ben teki fesi na a krutu disi. Na a srefi man disi ben teki fesi di den gi Yesus dedestrafu (Mat. 26:57, 59; Tori 6:8-12). Ma baka di den kari wan tu falsi kotoigi kon na fesi, den si wan sani di ben meki den fruwondru. A fesi fu Stefanus ben de „leki a fesi fu wan engel”, sobun a ben abi wan korostu firi.—Tori 6:13-15.
San yepi Stefanus fu tan abi wan korostu firi aladi a ben de na ini so wan muilek situwâsi? Fosi den srepi Stefanus kon na fesi a Sanhedrin, a ben kisi wan wroko fu den apostel èn a ben du a wroko dati fayafaya nanga yepi fu a yeye fu Gado (Tori 6:3-7). Di a ben de na fesi a Sanhedrin a srefi yeye disi ben yepi en. A santa yeye ben trowstu en èn a ben yepi en fu memre ala den sani di a ben leri (Yoh. 14:16). Na ini Tori fu den apostel kapitel 7, wi e leisi fa Stefanus e taki sondro fu frede nanga den man fu a Sanhedrin. A santa yeye yepi en fu memre moro leki 20 difrenti pisi fu den Hebrew Buku fu Bijbel (Yoh. 14:26). Ma Stefanus kisi moro deki-ati di a kisi wan fisyun pe a ben si fa Yesus e tanapu na a reti-anusei fu Gado.—Tori 7:54-56, 59, 60.
Wisrefi kan kisi fu du nanga gens nanga frufolgu (Yoh. 15:20). Te wi e studeri Gado Wortu doronomo èn te wi e du a preikiwroko fayafaya, dan Yehovah kan gi wi en santa yeye. Dati o meki taki wisrefi o abi a krakti fu tanapu kánkan te sma e frufolgu èn wi o abi wan korostu firi tu.—1 Petr. 4:12-14.