Gado meki wi fu libi fu têgo

Fu san ede libisma no wani dede? Bijbel e taki dati na so Gado meki wi (Preikiman 3:11). A e taki tu dati „Gado na lobi” (1 Yohanes 4:8). Yu denki taki wan Gado di lobi wi ben o poti a firi na ini wi fu libi fu têgo, aladi a sabi taki wi no man kisi a libi dati?

A de krin taki nowan sma wani dede. Iya, Bijbel e sori taki dede na wan „feanti” di wi no lobi kwetikweti (1 Korentesma 15:26). Son sma e dede yongu, trawan e libi langa, ma te fu kaba ala sma e dede. Furu sma e frede te den e prakseri taki den o dede. Oiti wan kaba o kon na dede? A sani dati kan?

HOWPU DE

Yu sabi taki Gado noiti no ben wani taki libisma dede? A Bijbel buku Genesis e sori taki Gado ben wani taki sma libi fu têgo na grontapu. Di Yehovah Gado meki grontapu a poti ala sani na tapu di libisma abi fanowdu fu man tan na libi èn de koloku. Baka dati a meki a fosi man, Adam, èn a poti en na ini wan paradijs, wan moi dyari na ini Eden. Dan „Gado si taki ala den sani di a meki, ben de heri bun”.​—Genesis 1:26, 31.

Di Gado meki Adam, a ben bun dorodoro èn a no ben abi nowan fowtu (Deuteronomium 32:4). Sosrefi Adam en wefi, Eva, ben bun dorodoro. En frustan nanga en skin no ben mankeri noti. Yehovah ben taigi den: „Meki pikin èn kon furu, teleki unu kon lai na grontapu èn basi ala sani na grontapu. Basi den fisi na ini se, den meti di e frei na loktu, nanga ibri meti di e kroipi na gron.”​—Genesis 1:28.

A ben o teki ten fosi grontapu kon lai nanga den pikin nanga den bakapikin fu Adam nanga Eva. Eva ben o meki pikin, èn den pikin dati ben o meki pikin baka, teleki grontapu kon lai nanga sma soleki fa Gado ben abi na prakseri (Yesaya 45:18). Yu denki taki Yehovah ben o gi Adam nanga Eva a howpu dati efu den no ben o man libi langa nofo fu si fa heri grontapu kon lai nanga den pikin noso den granpikin fu den?

Prakseri taki Gado ben taigi den tu fu basi den meti. Adam ben musu gi den wan nen èn a sani dati ben o teki ten (Genesis 2:19). Ma fu man basi den meti, a ben o abi fu kon sabi moro fu den èn a ben o abi fu kon sabi fa fu sorgu den. Dati ben o teki moro ten srefi.

We, fu di Gado ben taigi den fosi tu libisma fu basi den meti, meki a de krin taki Gado ben meki den fu libi langa. Èn Adam libi langa tu.

DEN LIBI BUN LANGA

Bijbel e sori taki wan ten ben de taki libisma ben e libi furu yari moro langa leki now. A e taki: „Ala nanga ala, Adam libi neigi hondro dritenti yari.” Baka dati a e taki fu siksi tra man di ben libi moro leki 900 yari! Dati ben de Set, Enos, Keinan, Yered, Metusala, nanga Noa. Den alamala ben e libi fosi a Frudu fu a ten fu Noa, èn Noa ben e libi 600 yari kaba fosi a Frudu kon (Genesis 5:5-27; 7:6; 9:29). Fa a du kon taki den ben man libi so langa?

Den man dati ben e libi syatu baka a ten di Adam nanga Eva no ben abi sondu ete. Kande na fu dati ede den ben man libi so langa. Ma fu san ede wan sma musu de sondro sondu fu man libi langa? Èn fa wan kaba o kon na dede? Fu man kisi piki tapu den aksi disi, wi musu frustan fosi fu san ede wi e kon owru èn e dede.