Yehovah gi mi moro leki san mi ben fruwakti

Di mi bigin du a pionierwroko, mi libi kenki èn mi du sani di mi no ben denki taki mi ben o man du (Ef. 3:20). Ma kande yu e aksi yusrefi fu san ede mi bigin pionier. Meki mi fruteri fa sani waka.

Mi gebore na ini Berlijn, na Doisrikondre, wan tu mun baka di a Di Fu Tu Grontapufeti ben bigin na ini 1939. Syatu fosi a feti kaba na ini 1945, opolani ben e frei abra Berlijn èn den ben e trowe furu bom na tapu a foto. Wan fu den leisi den bom sutu na ini a strati fu wi. Ma mi, mi papa, mi mama, nanga mi pikin sisa ben man lowe go na wan presi pe sma ben e kibri te den bom ben e fadon na ini a foto. Fu di wi ben frede taki wi ben kan lasi wi libi, meki wi go tan na Erfurt, a presi pe mi mama gebore.

Mi mama ben e suku a tru bribi fayafaya. A ben e leisi buku fu filosofiaman èn a ben ondrosuku difrenti kerki, ma a no feni san a ben suku. Na ini a yari 1948 tu Yehovah Kotoigi kon na wi oso. Mi mama meki den kon na inisei èn a bigin poti wan lo aksi gi den. A no taki wán yuru nanga den srefi, dan a taigi mi nanga mi pikin sisa: „Mi feni a tru bribi!” Syatu baka dati, mi, mi mama nanga mi pikin sisa bigin go na den konmakandra na ini Erfurt.

Na ini 1950 wi froisi go baka na Berlijn èn drape wi go na gemeente Berlin-Kreuzberg. Di wi froisi go na wan tra presi na ini Berlijn, wi ben e go na gemeente Berlin-Tempelhof. Bakaten mi mama dopu, ma mi ben feni taki mi no ben klari ete fu dopu. Fu san ede?

SAN YEPI MI FU NO SYENSYEN MORO?

A ben muilek gi mi fu du moro gi Yehovah fu di mi ben syensyen. Mi ben e go na ini a preikiwroko, ma tu yari langa mi no taki nanga nowan sma na ini a preikiwroko. Ma di mi kon sabi brada nanga sisa di ben e lobi Yehovah èn di ben e dini en nanga deki-ati, dan dati yepi mi. Fosi, sonwan fu den ben de na ini den strafuman-kampu fu den Nazisma noso den ben de na ini strafu-oso na Owstu Doisrikondre. Trawan ben e tyari buku go na Owstu Doisrikondre, aladi den ben kan kisi strafu. Na eksempre fu den naki mi ati trutru. Mi ben prakseri taki efu den brada nanga sisa disi ben de klariklari fu dede èn fu go na strafu-oso fu di den ben lobi Yehovah nanga den brada nanga sisa fu den, dan mi musu meki muiti fu no syen so furu.

Wan tra sani di yepi mi fu no syensyen, na a spesrutu preikiwroko di den brada ben orga fu prati wan brochure na ini 1955. Na ini wan brifi di ben de na ini na Informateur,a Brada Nathan Knorr meki bekènti taki a spesrutu preikiwroko disi ben o de a moro bigiwan di na organisâsi ben orga. A taki dati efu ala preikiman na heri grontapu o du a wroko disi, dan a mun disi o de a moro moi ten gi wi alamala na ini a preikiwroko. Na so a ben de trutru! Syatu baka dati mi gi misrefi abra na Yehovah, èn na ini 1956 mi dopu makandra nanga mi papa nanga mi sisa. Ma heri esi mi ben musu teki wan tra prenspari bosroiti.

Furu yari langa mi ben sabi taki a moro bun sani di mi ben kan du nanga mi libi, na fu pionier, ma mi ben draidrai fu teki a bosroiti dati. Mi bosroiti fu go wroko gi wan import-export bedrijf na ini Berlijn fu di mi ben wani leri a wroko. Baka dati mi no bigin pionier fu di mi ben wani wroko go doro fu leri du a wroko moro bun. Dati meki na ini 1961 mi go na Hamburg, a foto na ini Doisrikondre di ben abi a moro bigi haven. Mi ben lobi a wroko disi so te, taki mi ben e draidrai fu du a furuten diniwroko. San mi ben o du?

Mi breiti taki Yehovah gebroiki difrenti brada fu yepi mi fu frustan taki na anbegi fu Yehovah na a moro prenspari sani. Wan tu fu den mati fu mi ben bigin pionier kaba èn den ben de bun eksempre gi mi. Boiti dati, Brada Erich Mundt di ben de na ini wan strafuman-kampu fosi, gi mi deki-ati fu frutrow tapu Yehovah. A taki dati na ini a strafuman-kampu, den brada di ben e frutrow tapu densrefi ben kon abi wan swaki bribi. Ma den wan di ben e frutrow tapu Yehovah nanga den heri ati horidoro èn den ben man du furu na ini na organisâsi fu Yehovah.

Brada Martin Poetzinger di ben tron wan memre fu a Tiri Skin bakaten, ben tan gi den brada deki-ati nanga den wortu disi: „Deki-ati na wan fu den moro prenspari fasi di wi musu abi!” Mi denki dipi fu den wortu disi. Te fu kaba mi bosroiti fu libi mi wroko èn mi bigin pionier na ini yuni 1963. Dati ben de a moro bun bosroiti di mi teki! Baka tu mun, srefi fosi mi bigin suku wan tra wroko, mi kisi a grani fu dini leki spesrutu pionier. Wan tu yari baka dati, Yehovah gi mi wan blesi di mi no ben fruwakti srefisrefi. Mi kisi a kari fu go na a di fu 44 klas fu Gileadskoro.

MI LERI WAN PRENSPARI SANI NA GILEADSKORO

Wan fu den moro prenspari sani di mi leri na a skoro na disi: „No gi abra te yu kisi wan wroko fu Yehovah.” Brada Nathan Knorr nanga Lyman Swingle ben lobi taigi wi a sani disi. Den gi wi deki-ati fu tan na ini a toewijzing fu wi awinsi a no makelek. Brada Knorr ben taki: „San yu o luku? Yu o luku fa a presi doti? Yu o luku den maskita noso freifrei? Yu o luku fa den sma pôti? Noso yu o luku den bon, den bromki nanga den lafu fesi fu den sma? Leri fu lobi den sma!” Wan dei di Brada Swingle fruteri wi fu san ede son brada tapu nanga a zendeling-wroko, en ai bigin furu nanga watra. A ben musu wakti pikinso, fosi a ben man taki go doro. A sani dati naki mi ati trutru. Dati meki mi bosroiti fu horibaka gi Krestes nanga den brada fu en awinsi san e pasa.​—Mat. 25:40.

Di wi kisi den toewijzing fu wi, dri brada di ben e dini na Betel aksi wan tu fu wi sortu kondre wi ben o go. Den ben e taki soso bun sani fu den kondre pe den tra Gilead studenti ben o go. Ma di mi taki dati mi ben o go na Kongo (Kinsyasa), den tan tiri fu wan momenti, dan den taki: „Oh, Kongo! Yehovah o de nanga yu!” Na a ten dati, na ini nyunsu den ben e taki furu fa sma ben e feti na ini Kongo èn fa den ben e kiri makandra. Ma mi ben tan prakseri san mi leri na Gileadskoro. Syatu baka di mi klari a skoro na ini september 1967, mi, Heinrich Dehnbostel nanga Claude Lindsay go na Kinsyasa, a mamafoto fu Kongo.

WI LERI FURU LEKI ZENDELING

Baka di wi doro na ini Kinsyasa wi leri Fransitongo dri mun langa. Baka dati wi teki opolani go na Lubumbashi, di ben nen Elisabethville fosi. Lubumbashi de na a zuidsei fu Kongo krosibei fu Sambia. Wi go tan na ini wan zendeling-oso na ini a foto.

Na furu presi fu Lubumbashi nowan sma ben preiki a bun nyunsu ete. Dati meki wi ben breiti taki wi ben de den fosiwan di preiki gi furu sma drape. Fosi yu denki wi ben kon abi so furu Bijbelstudie, taki wi no ben abi nofo ten gi ala sma di ben wani studeri. Wi preiki tu gi heiheiman di ben e wroko gi lanti noso gi skowtu. Furu fu den ben sori bigi lespeki gi Gado Wortu èn gi a preikiwroko fu wi. Furu fu den sma ben e taki Swahilitongo. Dati meki mi nanga Claude Lindsay leri taki a tongo dati tu. Syatu baka dati, den brada seni wi go na wan Swahilitongo gemeente.

Wi ben ondrofeni furu moi sani, ma wi ben kisi tesi tu. A ben pasa furu leisi taki wi ben miti nanga drungu srudati di ben waka lontu nanga gon noso nanga skowtu di ben lei gi wi taki wi du wan ogri. Wan leisi di wi ben hori konmakandra na ini a zendeling-oso wan heri grupu skowtu nanga gon broko kon na inisei. Den tyari den brada go na a skowtu-oso èn den meki den sidon na tapu a gron te tin yuru neti. Baka dati den seni wi gowe.

Na ini 1969 mi bigin dini leki distrikt-opziener. Son leisi mi ben musu waka langa pasi di ben tokotoko èn di ben lai grasi. Na ini wan dorpu wan mamafowru nanga den pikin fu en ben e tan na ondro a bedi fu mi te neti. Noiti mi o frigiti fa mi ben skreki wiki te a fowru disi ben bigin bari te mamanten te a presi ben dungru ete. Mi lobi prakseri fa mi nanga den brada ben sidon lontu wan faya te neti e taki fu den moi leri fu Bijbel.

A moro bigi problema ben de den sma di ben du neleki den na Yehovah Kotoigi, ma di ben de memre fu a Kitawala grupu.b Sonwan fu den ben dopu èn den ben tron owruman srefi na ini a gemeente. Den sma disi di ben de leki „bigi ston di kibri na ondro watra” no ben man kori den brada nanga sisa di ben abi wan tranga bribi (Yud. 12). Te fu kaba Yehovah sorgu taki den sma disi komoto na ini a gemeente. Baka dati furu sma kon na ini waarheid.

Na ini 1971 mi bigin dini na a bijkantoro na ini Kinsyasa pe mi du difrenti wroko. Mi ben piki brifi di sma ben seni kon na a bijkantoro, mi ben poti den buku di den gemeente ben seni aksi na ini dosu, èn mi ben wroko na a Dienstafdeling. Na Betel mi leri fa fu orga a wroko na ini wan bigi kondre pe son presi no ben abi bun pasi, pe stroom no ben de ala yuru èn pe bus no ben rèi. Son leisi a ben teki omeni mun fosi den brifi fu unu ben doro den gemeente. Wi ben seni den brifi disi nanga opolani èn baka dati den ben puru den poti na ini wan boto. Son leisi a boto disi ben fasi omeni wiki na ini a liba di ben tapu nanga grasi. Ma toku wi ben man du a wroko na ini den sortu muilek situwâsi disi.

A ben moi fu si fa den brada ben seti bigi kongres, aladi den no ben abi furu moni. Den srefi ben meki den podium, den ben gebroiki langa grasi fu meki muur èn den ben lolo a grasi disi tu fu sidon na en tapu. Den ben gebroiki bambu leki postu èn den ben frekti grasi leki wan mata dan den ben meki daki noso tafra fu en. Den ben piri den buba fu den bon èn den ben gebroiki den fu tai den postu na makandra. Ala leisi baka mi ben fruwondru fu si ala den koni sani di den brada nanga sisa ben e du fu man hori a kongres. Mi ben kon lobi den brada nanga sisa disi trutru. Di mi ben musu go dini na wan tra presi mi ben misi den furu.

MI GO DINI NA KENIA

Na ini 1974 mi froisi go na a bijkantoro fu Nairobi, na Kenia. Wi ben abi furu fu du, fu di a bijkantoro fu Kenia ben e tiri a preikiwroko fu tin kondre di ben de krosibei. Na ini wan tu fu den kondre disi lanti ben tapu a wroko fu wi. Omeni leisi den brada seni mi go luku den brada nanga sisa ini den kondre disi, spesrutu na Etiopia pe den ben kisi frufolgu nanga hebi tesi. Den ben fon furu fu den noso den ben poti den na strafu-oso. Den kiri sonwan fu den srefi. Ma den brada nanga sisa horidoro fu di den ben abi wan bun matifasi nanga Yehovah èn nanga makandra.

Na ini 1980 mi trow nanga Gail Matheson. Gail na fu Kanada èn wi ben de na ini a srefi klas fu Gileadskoro. Mi nanga en ben e skrifi brifi gi makandra. Gail ben de zendeling na ini Bolifia. Baka 12 yari wi miti baka na New York. Syatu baka dati wi trow na ini Kenia. Mi breiti taki mi trow nanga Gail fu di a e denki neleki Yehovah èn a de tevrede nanga san a abi. Te nanga now Gail de wan bigi yepi gi mi.

Na ini 1986 mi ben e dini leki distrikt-opziener aladi mi ben de wan memre fu a Bijkantoro Komte. Mi nanga Gail ben e go na difrenti kondre di ben de ondro a bijkantoro fu Kenia.

Mi e memre ete fa a ben de di wi ben sreka sani fu hori wan kongres na Asmara (na ini Eritrea) na ini 1992. Na a ten dati lanti no ben tapu a wroko fu wi drape. A wan-enkri presi di wi feni fu hori a kongres, ben de wan owru maksin. A ben doti èn a ben brokobroko. Inisei ben takru moro dorosei srefi. Ma a dei fu a kongres mi no ben man bribi o moi den brada nanga sisa ben seti a presi. A ben fiti fu anbegi Yehovah drape. Furu osofamiri tyari moimoi krosi èn den tapu iniwan presi di no ben moi fu si. Wi ben abi wan span kongres èn ala den 1279 sma di ben de drape ben lobi en.

Di mi ben de distrikt-opziener, dan wi ben musu fiti wisrefi na ala sortu situwâsi fu di wi ben e tan na difrenti presi. Wan leisi wi ben e tan na ini wan bigi oso krosibei fu a se, èn wan tra leisi wi ben e tan na ini wan pikin oso di meki fu senki èn a toilet ben de 100 meter moro fara. Ma awinsi pe wi ben de, wi ben lobi wroko makandra nanga den fayafaya pionier nanga preikiman. Di den brada seni wi go na wan tra presi, dan wi ben sari fu libi den furu mati di wi ben abi.

DEN BLESI DI WI KISI NA INI ETIOPIA

Na ini wan tu fu den kondre pe a bijkantoro fu Kenia ben e teki fesi, lanti ben gi wi primisi fu du wi wroko. Disi pasa na ini a pisi ten fu 1987 te go miti 1992. Dati meki wi bigin seti bijkantoro nanga tra kantoro fu orga a wroko na ini den kondre dati. Na ini 1993 den brada seni mi nanga Gail go na a kantoro fu Addis Abeba na ini Etiopia. Furu yari langa den brada nanga sisa ben e du a wroko kibrikibri, teleki lanti gi den primisi fu du a wroko fu den.

Yehovah blesi a wroko na ini Etiopia. Furu brada nanga sisa bigin du a pionierwroko. Moro leki 20 procent fu ala den preikiman ben e dini leki gewoon pionier ibri yari sensi 2012. Boiti dati, den skoro fu na organisâsi yepi den brada nanga sisa furu èn na ini 2017 moro leki 120 Kownukondre zaal ben bow kaba. Na ini 2004 a Betel famiri froisi go na ini wan nyun gebow èn a kongreshal di bow na a srefi presi ben de wan bigi blesi tu gi den brada nanga sisa.

Na ini den yari di pasa mi nanga Gail tron bun mati fu furu brada nanga sisa na ini Etiopia. Wi lobi den trutru fu di den abi switifasi nanga lobi. Now wi kon siki èn dati meki wi ben abi fu froisi go na a bijkantoro na ini Doisrikondre. Drape wi e kisi bun sorgu, ma wi e misi den mati fu wi na ini Etiopia.

YEHOVAH MEKI A GRO

Wi si fa Yehovah meki a wroko gro (1 Kor. 3:6, 9). Fu eksempre, di mi preiki a fosi leisi gi wan tu man fu Rwanda di ben kon wroko na ini den kopro mijn fu Kongo, preikiman no ben de na ini Rwanda. Now wi abi moro leki 30.000 brada nanga sisa na ini a kondre dati. Na ini 1967 Kongo (Kinsyasa) ben abi sowan 6000 preikiman. Now sowan 230.000 preikiman de drape èn moro leki wán milyun sma go na a Memrefesa na ini 2018. Na ini ala den kondre pe a bijkantoro fu Kenia ben e tiri a wroko, a nomru fu preikiman kren nanga 100.000.

Moro leki 50 yari pasa Yehovah gebroiki difrenti brada fu yepi mi fu bigin nanga a furuten diniwroko. Aladi mi e syensyen ete, toku mi leri fu frutrow tapu Yehovah nanga mi heri ati. Den sani di mi ondrofeni na ini Afrika leri mi fu abi pasensi èn fu de tevrede nanga san mi abi. Mi nanga Gail lobi fa den brada nanga sisa drape abi so furu switifasi, fa den e horidoro èn fa den e frutrow tapu Yehovah. Mi de nanga tangi gi a bun-ati fu en. Iya, Yehovah gi mi moro leki san mi ben fruwakti.​—Ps. 37:4.