YU BEN SABI A SANI DISI?

Sortu frantwortu futuboi na ini Bijbel ten ben abi?

NA INI Bijbel ten son futuboi ben abi a frantwortu fu luku na oso noso den gudu fu wan tra sma.

Di Yosef, a manpikin fu Yakob, ben de wan srafu na ini Egepte, a tron a futuboi di ben e luku na oso fu en basi. A basi fu en ben „libi ala sani gi Yosef fu a luku den gi en” (Gen. 39:2-6). Bakaten di Yosef tron wan makti tiriman na ini Egepte, a ben poti wan futuboi tu fu luku en eigi oso.​—Gen. 44:4.

Na ini a ten fu Yesus, den sma di ben abi gron ben e libi na ini a foto. Dati meki den ben e poti wan futuboi fu luku a wroko di den wrokoman ben e du ibri dei na a gron.

Suma ben e kisi so wan frantwortu? Na a ten fu den apostel, Columella wan skrifiman fu Rome ben gi sma a rai taki efu den ben o poti wan srafu leki futuboi, dan a ben musu de „wan srafu di sabi du a wroko bun”. A ben musu de wan sma di ben o „sorgu taki den wrokoman du a wroko, ma a no ben musu du ogri nanga den”. Columella taki tu: „A moro prenspari sani na taki wan futuboi no musu denki taki a sabi ala sani èn ala ten a ben musu wani leri nyun sani.”

Gado Wortu e gebroiki na eksempre fu wan futuboi fu sori fa son sani musu go na ini a Kresten gemeente. Fu eksempre, na apostel Petrus ben gi Kresten a deki-ati fu gebroiki den koni di Gado gi den „fu dini makandra leki bun futuboi di Gado sori bun-ati”.​—1 Petr. 4:10.

Yesus gebroiki na eksempre fu wan futuboi na ini na agersitori di skrifi na Lukas 16:1-8. Boiti dati, di Yesus fruteri a profeititori di ben sori o ten a ben o tiri leki Kownu, a taigi den bakaman fu en taki a ben o poti wan „koni srafu di de fu frutrow” noso wan „futuboi di de fu frutrow trutru”. A moro prenspari wroko di a futuboi dati ben o du, na taki a ben o gi den bakaman fu Yesus leri fu Gado na a ten fu a kaba (Mat. 24:45-47; Luk. 12:42). Wi de nanga tangi taki a futuboi disi e sreka buku nanga tra sani di e tranga wi bribi. Wi breiti tu taki den sani disi de fu kisi na heri grontapu.