Pristeri na boen njoensoe — Gi ala sortoe foe sma
1 Wan foe den moro prenspari marki ini na velddienst de foe doro na ati foe den sma di wi e préki gi. Na apostel Paulus ben de heri boen na ini disi. Na bijbel e meki wi si dat nanga jepi foe en sma no wawan ben tjari kon so fara foe teki dopoe, ma ooktoe foeroe gemeente ben opo.
2 San ben meki a ben abi succes? Na ini 1 Korinte 9:22, èn 23 tanapoe san a ben doe. Wi kan leri foeroe foe disi. A ben skrifi: „Mi ben tron ala sani gi ala sortoe foe sma, soso foe ben kan jepi wantoe . . ., foe den kisi nanga trawan wan prati na en.” A ben fiti ensrefi na a sortoe foe sma nanga soema a ben taki, efoe a ben de now na fesi wan djoe ofoe na fesi wan heiden.
3 A ben feni en wan boen sani foe tjari en pristeri kon tapoe den fanowdoe foe ibri aparti sma. Tapoe a fasi disi den arkiman foe en ben sa teki moro esi na boskopoe (Odo 25:11). Wi kan meki na doeltreffendheid foe wi ini na kotoigiwroko gro srefsrefi te wi e waka na baka na eksempre foe Paulus.
SREKA JOESREFI A FESI
4 Son prékiman, bifo den go abi wan prati na a dienst, ini prakseri e loekoe fa den ben sa tjari kenki kon ini na fasi tapoe san den e taki nanga wan oema, pikinnengre, owroesma, hindoe, moslim, atheïst, evolutionist nanga so moro fara. Den e go denki san den kan taki foe kan doro na ati foe na ososma èn foe sorgoe dati a man ofoe a oema no mandi foe soso. Den kweki na bekwaamheid foe opo wan bladzijde na ini na boekoe di den e pristeri, foe meki na ososma si dati na boekoe troetroe kan de leki wini gi en.
5 A moen disi wi e pristeri na Bijbeltori-boekoe. Te na ososma e broko en ede foe na situatie na grontapoe èn nanga ala prisiri ben sa wani si moro betre toestand, dan wi ben kan taki foe wantoe bodoi di fiti foe tori 71 nanga tori 115 èn kande kan behandel tekst di tanapoe drape. Efoe na sma broeja foedi ai taki dati na Gado gi pasi dati ogri nanga pina de, dan wi kan naki tori 4 opo èn taki foe prenspari prakseri foe tori 26 foe tjari na stré-aksi kon a krin. Te joe e gi kotoigi na jongoe sma, njan boen foe den foeroe prenki ini na boekoe èn efoe a fiti meki den si wan sani foe na inhouds-opgave.
6 Son sma ben feni en boen foe abi difrenti sortoe publikatie na den sodati den kan jepi difrenti sortoe foe sma. Na a pistori disi wi e denki kande na a Osofamiri libi-boekoe na Bigi Leriman-boekoe, na Kolokoe-boekoe, na Waarheid-boekoe, nanga so moro fara. No drai-drai foe pristeri wan bepaalde publikatie efoe joe si dati na ososma abi spesroetoe belangstelling gi den bodoi di tanapoe na ini.
FITI JOESREFI
7 Te joe e gi kotoigi na ala sortoe foe sma dan a de moro boen foe proeberi foe feni wan gemeenschappelijke fundamenti èn foe komoto foe na pasi foe trobi. Efoe joe miti wan sma di de katholiek, dan joe ben sa kan verkise foe bow na bijbel lezing foe joe lontoe Matéus 6:9, 10 èn taki dan foe na „Wi Tata begi”, sodati joe e gebroiki wortoe di e taki nanga na ati foe den sma dati. Te joe e taki nanga moslim, dan nofotron a de moro boen foe teki wan lezing foe den Hebrewboekoe, foe eksempre nanga Daniël 2:44 leki thematekst. A sa abi joe prakseri dati ini 1 Korinte 9:19-21 dati na apostel Paulus tapoe wan lobifasi ben e loekoe san de na denki foe den sma di a ben préki gi èn dati a ben fiti a fasi fa a ben e taki nanga den. Wi sa meki nanga doeltreffendheid nanga prisiri na ini Jehovah dienst gro efoe te na ini a ten disi wi abi wan srefi broko-ede gi den sma di e libi na ini wi gebied.