Fa fu sreka yusrefi fu pristeri wan tijdschrift
1. Fu san ede a moro bun fu sreka wisrefi fu pristeri den tijdschrift nanga wi eigi wortu, na presi fu pristeri den tijdschrift soleki fa a skrifi na ini Wi Kownukondre diniwroko?
1 Kande yu e aksi yusrefi: ’Fu san ede, wi musu sreka wisrefi fu pristeri den tijdschrift efu ibri Wi Kownukondre diniwroko abi eksempre kaba di e sori fa wi kan pristeri den tijdschrift?’ Furu sma feni taki den eksempre disi de wan bigi yepi, ma toku a de fanowdu fu sreka wisrefi. Wan takimakandra di e wroko na ini a wan kontren no abi fu wroko na ini wan tra kontren. Fu dati ede, wi no musu si en leki wan plekti fu pristeri den tijdschrift soifri soleki fa a skrifi na ini den eksempre. Srefi te wi e gebroiki den eksempre fu pristeri den tijdschrift, a moro bun fu taki sani nanga wi eigi wortu.
2. San yu musu hori na prakseri te yu e suku wan artikel fu pristeri?
2 Gebroiki wan artikel: Baka te yu leisi a tijdschrift, dan yu musu suku wan artikel di yu feni moi èn di o fiti gi den sma na ini a kontren fu yu. Efu yu e taki nanga overtoigi èn nanga faya te yu e pristeri na artikel, dan dati kan gi na ososma deki-ati fu leisi en tu. Kande yu sa wani taki fu wan artikel di sa hari sma prakseri na ini a kontren fu yu, ma toku a ben o bun fu sabi san skrifi na ini den tra artikel fu a tijdschrift. Disi sa yepi yu fu kenki a takimakandra fu yu te yu miti wan sma di wani taki fu tra sani.
3. Fa yu musu bigin a takimakandra fu man kisi bun bakapisi?
3 Poti wan aksi: Baka dati, yu musu suku den yoisti wortu fu bigin a takimakandra fu yu. Den fosi wortu di yu o taki prenspari gi a takimakandra. Kande a ben o bun fu poti wan aksi gi na ososma di o meki taki a wani sabi moro fu na artikel di yu e tyari kon na fesi. Aksi di e meki na ososma fruteri fa a e prakseri fu sani, abi moro bun bakapisi. Luku bun fu no poti aksi di kan meki na ososma firi syen, noso aksi di e meki taki a e firi taki a musu opo taki gi ensrefi.
4. Sortu wini yu e kisi te yu e leisi wan bijbeltekst gi na ososma te yu abi na okasi fu du dati?
4 Leisi wan bijbeltekst: Te fu kaba, leisi wan bijbeltekst gi na ososma efu yu abi na okasi fu du dati. Kande yu kan leisi wan bijbeltekst di de fu feni na ini na artikel di yu wani taki fu en. Te yu e leisi wan bijbeltekst gi na ososma, dan dati sa yepi en fu si taki a boskopu fu wi e komoto fu Gado Wortu (1 Tes. 2:13). Srefi te na ososma no wani a tijdschrift, a e kisi kotoigi fu di a e yere a bijbeltekst. Son preikiman ben hari a prakseri fu ososma di den leisi wan bijbeltekst bifo den poti wan spesrutu aksi. Yu kan poti prakseri na a bijbeltekst fu di yu e taki: „Grantangi, mi ben sa wani sabi fa yu e prakseri fu a bijbeltekst disi.” Baka dati, yu kan sori a sma wan sani na ini a tijdschrift di abi fu du nanga a bijbeltekst, èn yu kan taki wan sani syatu fu hari en prakseri moro bifo yu e pristeri a tijdschrift.
5. Sortu prenspari sani yu musu hori na prakseri te yu e sreka yusrefi fu pristeri den tijdschrift?
5 Wán spesrutu fasi no de fa fu taki sani te yu e pristeri den tijdschrift. Nofo tron, a moro bun fu hori yu takimakandra syatu èn fu no taki tumusi furu fu den tijdschrift. Hori wan takimakandra di yu feni bun èn di abi bun bakapisi. Sori sma o warti den tijdschrift de, èn taki fayafaya fu den. Te yu sreka yusrefi bun, dan yu sa man pristeri A Waktitoren nanga Ontwaakt! na wan moro bun fasi na sma di „abi a yoisti denki fu man kisi têgo libi”.—Tori. 13:48.