Pristeri den tijdschrift di e gi kotoigi fu a waarheid
1. O prenspari A Waktitoren nanga Ontwaakt! de?
1 A Waktitoren—A e taki fu Yehovah Kownukondre nanga Ontwaakt!, na den moro prenspari publikâsi di wi e tan gebroiki na ini a Kownukondre preikiwroko èn a wroko fu meki disipel (Mat. 24:14; 28:19, 20). Den tu tijdschrift disi e kon na a yoisti ten, èn wi e prisiri srefisrefi fu prati den doronomo na ini a Kownukondre diniwroko di wi e du na difrenti fasi.
2. Sortu sani kenki na A Waktitoren nanga Ontwaakt!, èn fu san ede?
2 Na ini den yari di pasa, wi si taki wan tu sani kenki na den tijdschrift srefi, na den sani di skrifi na ini, èn na a fasi fa wi e prati den. Den kenki disi ben abi leki marki fu meki den tijdschrift moro moi èn fu hari a prakseri fu moro sma. Na so fasi a Kownukondre boskopu kan naki na ati fu ’ala sortu sma so taki den kan kisi frulusu èn taki den kan kon sabi a waarheid soifri’.—1 Tim. 2:4.
3. Fa wi o pristeri den tijdschrift na ini a preikiwroko?
3 Sensi yanuari 2006, wi kon sabi fa fu pristeri Ontwaakt! fu ibri mun na difrenti fasi. Now wi sa du a srefi nanga A Waktitoren—A e taki fu Yehovah Kownukondre. A tijdschrift disi e kon tu leisi wan mun, ma wi o pristeri wán fu den nomo na ini a preikiwroko. Eksempre di e sori fa fu pristeri ibri tijdschrift, o de fu feni na tapu a lasti bladzijde fu Wi Kownukondre diniwroko. Nofo tron den pristeri disi e taki fu den fosi artikel na ini a tijdschrift, ma son leisi den e taki tu fu tra artikel di furu sma wani leisi. Wi man gebroiki den eksempre disi moro bun, te wi sabi san skrifi na ini den artikel, èn te wi e taki nanga wi eigi wortu so taki wi kan hari a prakseri fu sma na ini a kontren fu wi.
4. Fu san ede a kan bun fu pristeri den tijdschrift tra fasi leki den eksempre di skrifi na ini Wi Kownukondre diniwroko?
4 Aladi Wi Kownukondre diniwroko abi tu eksempre di e sori fa fu pristeri ibriwan fu den tu tijdschrift, toku yu kan gebroiki tra fasi fu pristeri den tijdschrift. Wán reide fu san ede yu kan du disi, na taki kande moro furu sma na ini a kontren sa wani leisi wan fu den tra artikel. Noso kande yu feni taki yu kan abi moro bun bakapisi te yu e taki fu wan artikel di yu feni moro moi.
5. San yu musu du bifo yu e sreka yusrefi fu pristeri den tijdschrift?
5 Fa fu sreka yusrefi fu pristeri den tijdschrift: Yu musu sabi fosi san skrifi na ini den artikel di yu wani pristeri. A no ala ten yu o kaba leisi ala den artikel na ini a tijdschrift bifo yu bigin gebroiki en na ini a preikiwroko. Ma yu musu de fayafaya èn yu musu taki komoto fu yu ati te yu e taki fu den artikel di yu wani pristeri. Yu kan du dati soso te yu sabi san skrifi na ini den artikel.
6. Fa wi kan sreka wisrefi fu pristeri den tijdschrift na wan tra fasi?
6 Wan tra sani di yu kan du, na fu sreka yusrefi na so wan fasi taki den bigin wortu di yu o taki kan fiti na difrenti situwâsi. Kande na a bigin fu wan takimakandra yu kan hari a sma prakseri, fu di yu o poti wan aksi di abi fu du nanga na artikel. Ala ten yu musu frutrow tapu a krakti fu Gado Wortu fu naki sma ati (Hebr. 4:12). Suku wan bijbeltekst di fiti èn di abi fu du nanga a tori di yu wani taki. A ben o moro bun fu gebroiki wan bijbeltekst di skrifi na ini na artikel di yu o gebroiki. Prakseri fa yu kan sori a sma taki a tekst abi fu du nanga na artikel.
7. Fa wi kan pristeri den tijdschrift na wan moro bun fasi?
7 Na ibri okasi: Efu wi wani abi bun bakapisi, dan wi musu pristeri den tijdschrift na a fasi fa wi ben sreka wisrefi. Wroko makandra nanga a gemeente te unu o prati den tijdschrift tapu satra. Pristeri den tijdschrift gi sma di ben teki tra publikâsi kaba. Ala ten yu kan pristeri den tijdschrift gi den bijbelstudenti fu yu èn gi tra sma di yu e miti te yu e tyari gobaka. Kande yu kan pristeri den tijdschrift gi sma di yu e miti te yu e go na wenkri, te yu de na pasi, noso te yu e wakti na datra-oso. Du muiti a heri mun fu meki a fasi fa yu e pristeri den tijdschrift kon moro bun.
8. Na sortu fasi A Waktitoren nanga Ontwaakt! na tumusi aparti tijdschrift?
8 A Waktitoren nanga Ontwaakt! na tumusi aparti tijdschrift. Den e gi Yehovah glori leki a Moro Heiwan fu hemel nanga grontapu (Tori. 4:24). Den tijdschrift e trowstu sma nanga yepi fu a bun nyunsu fu Gado Kownukondre èn den e gi sma deki-ati fu poti bribi na ini Yesus Krestes (Mat. 24:14; Tori. 10:43). Boiti dati, den e poti prakseri na den sani di e pasa na grontapu èn di de wan kontru fu Bijbel profeititori (Mat. 25:13). Yepi sma na ini yu kontren fu kisi wini fu den tijdschrift disi, fu di yu e sreka yusrefi fu pristeri den na ibri okasi!
9. Fa wi kan seti sani fu man tyari wan gobaka?
9 Efu yu ben man libi wan tijdschrift gi wan sma, noso efu yu taki nomo nanga wan sma fu wan tori di abi fu du nanga den sani di sma e bribi, dan de srekasreka fu poti wan aksi gi en, noso fu taki wan sani di o poti a sma na prakseri broki. Disi kan meki taki yu kisi na okasi fu go baka na a sma, noso fu abi wan tra takimakandra nanga en. Efu wi e sai den siri fu waarheid fayafaya, dan wi kan de seiker taki Yehovah sa opo na ati fu den sma di wani sabi En trutru èn di wani dini En.—1 Kor. 3:6.