Fa fu gebroiki den eksempre di e sori fa wi kan pristeri publikâsi
1. Fa wi musu si den eksempre di e sori fa wi kan pristeri den publikâsi?
1 Den eksempre di e sori fa wi kan pristeri den tijdschrift nanga den tra publikâsi fu wi, e kon doronomo na ini Wi Kownukondre diniwroko. Te wi e teki prati na a preikiwroko, dan wi no musu taki den srefi wortu leki fa na eksempre di skrifi e sori. Wi e kisi den eksempre disi fu sori wi san wi ben sa kan taki. Furu tron wi sa abi moro bun bakapisi te wi e taki nanga wi eigi wortu, aladi wi e hori na eksempre na prakseri. Te wi e taki soleki fa wi gwenti fu taki, dan dati o yepi fu meki na ososma firi bun. Boiti dati, wi o sori taki wi de opregti èn taki wi de seiker fu san wi e taki.—2 Kor. 2:17; 1 Tes. 1:5.
2. Te wi e sreka wisrefi fu pristeri a bun nyunsu, dan fu san ede wi musu hori na prakseri san na den gwenti fu den sma fu a presi pe wi e preiki?
2 Fiti a takimakandra fu yu na a situwâsi: Den gwenti di den sma fu wan presi abi, abi krakti tapu a fasi fa wi o pristeri a bun nyunsu. Yu kan taki na ososma odi èn go doro baka dati nanga wan takimakandra? Noso a de so taki den sma fu a birti drape wani taki yu musu bigin taki wantewante san yu abi fu taki? Na ibri presi a de tra fasi èn srefi na ibri sma a de tra fasi tu. Sosrefi te wi e poti aksi gi na ososma, dan wi musu abi a koni fu man si sani krin. Kande a fiti na son presi fu poti spesrutu aksi, ma te yu ben o poti a srefi aksi dati gi tra sma, dan a kan meki a sma firi wan fasi. Fu dati ede, wi musu man si sani krin èn wi musu fiti wisrefi na den gwenti di den sma fu a presi drape abi te wi e pristeri a bun nyunsu.
3. Fu san ede wi musu hori na prakseri san na den gwenti èn a fasi fu denki fu den sma di wi e miti?
3 Boiti dati, te wi e sreka wisrefi gi a preikiwroko, wi musu hori na prakseri san na den gwenti èn a fasi fu denki fu den sma na ini a kontren pe wi e wroko. Fu eksempre, te yu ben o taki nanga wan fayafaya Lomsusma fu Mateyus 6:9, 10, dan yu ben o taki tra fasi nanga en leki te yu ben o taki nanga wan sma di no sabi a „Wi Tata Begi”. Efu wi ben o meki pikinso muiti fu prakseri na fesi san wi o taki, dan furu tron wi o man fiti a takimakandra fu wi na so wan fasi taki wi e hari a prakseri fu den sma di wi e miti na ini a preikiwroko.—1 Kor. 9:20-23.
4. Fu san ede a de tumusi prenspari fu sreka wisrefi bun?
4 Srefi te wi abi na prakseri fu gebroiki wan fu den eksempre soleki fa a skrifi, toku wi musu sreka wisrefi bun na fesi. Wi musu leisi na artikel noso a kapitel bun fu san wi o taki èn wi musu luku sortu penti kan meki den sma angri fu kon sabi moro. Yu kan taki fu den penti disi tu aladi yu e gebroiki na eksempre di e sori fa fu bigin wan takimakandra. Wi o de fayafaya fu pristeri den moi sani di skrifi na ini den publikâsi fu wi, soso te wi sabi san skrifi na ini den.
5. Fu san ede wi kan sreka wisrefi fu hori wan tra takimakandra, èn fa wi kan du dati?
5 Tra fasi fu bigin wan takimakandra: Wi musu hori wisrefi nomonomo na den eksempre di e sori fa fu bigin wan takimakandra? Nôno. Efu a moro makriki gi yu fu bigin wan takimakandra na wan tra fasi, noso fu gebroiki wan tra bijbeltekst, dan yu kan du dati. Yu kan du dati spesrutu nanga den tijdschrift, fu di yu o luku na sortu okasi yu kan taki fu wan tra artikel di kan hari a prakseri fu sma na ini a kontren fu yu. Te wan demonstrâsi musu hori na a Diniwroko Konmakandra di e sori fa fu pristeri wan fu den publikâsi, dan sani kan seti na so wan fasi taki den hori wan takimakandra di fiti fu gebroiki na ini a kontren fu yu gemeente. Na a fasi disi ala sma kan kisi yepi fu pristeri a bun nyunsu na wan bun fasi.