Yu E Du Yu Diniwroko Finifini?
1 Ini a buku Tori fu den Apostel, den e fruteri wi taki Yesus disipel ben du a diniwroko fu den fu di den ben gi sma „kotoigi finifini” (Tori. 2:40; 8:25; 28:23). Disi na sondro misi a sani di na apostel Paulus ben wani du (Tori. 20:24). Disi a no a marki di yu wani doro leki wan dinari fu a bun nyunsu? Fa yu kan du dati?
2 Sreka San Yu O Taki: Fu man gi wan bun kotoigi te yu e du a diniwroko, dan a prenspari taki yu sreka yusrefi. Disi de spesrutu so te yu e pristeri tijdschrift, fu di ala leisi wan tra sani e taki. Fu yepi wi fu man du dati moro bun, na uitgave disi fu Wi Kownukondre Diniwroko abi wan nyun sani. Dati na a faki na yu kruktu-anusei, di e kari wan tu fasi fu pristeri den nyun Waktitoren nanga Ontwaakt! Na ini ibriwan fu den uitgave fu den tijdschrift disi wi o poti prakseri na wan tori di e hari a prakseri fu furu sma. Fa yu kan gebroiki den syatu pristeri disi?
3 Teki wan fu den eksempre di yu denki taki a o moro bun gi yu gebied. Leisi na artikel dati heri bun, èn poti prakseri na spesrutu penti di kan hari a prakseri fu sma. Suku wan bijbeltekst di skrifi na ini a tijdschrift. A tekst disi musu abi fu du nanga a tori di yu o taki èn a musu de wan tekst di yu kan leisi gi na ososma. Taki wan syatu sani na a bosroiti fu gi a sma deki-ati fu leisi a tijdschrift. Efu a fiti, fruteri en syatu taki a kan gi wan bijdrage gi a wroko di Yehovah Kotoigi e du na heri grontapu. Now, oefen san yu o taki.
4 Sreka Sani fu Gebroiki Bijbel: Te yu sreka sani bun, dan furutron yu kan gebroiki wan bijbeltekst te yu e taki nanga wan sma. Na furu presi fu eksempre, preikiman di abi ondrofeni man du dati fu di den e go na a sma oso nanga a Bijbel na ini den anu, èn baka di den taki a sma odi den e taki:
◼ „Wi e aksi sma efu den e bribi a sani disi . . . ” Leisi Genesis 1:1, èn aksi a sma baka dati: „Yu feni taki a sani disi di skrifi dyaso bun?” Efu a sma e piki iya, dan taki: „Mi tu. Ma yu e denki taki, fu di Gado meki ala sani, dan en na a Sma di meki ogridu de?” Baka di yu arki a piki di a sma gi, leisi Preikiman 7:29. Opo a Sabi-buku, bladzijde 71, èn leisi paragraaf 2. Gi a sma deki-ati fu leisi a buku. Efu na ososma no e agri nanga san skrifi na Genesis 1:1, dan gi en deki-ati fu ondrosuku a Schepping-buku.
5 Go Baka na Ala Sma Di Wani Sabi Moro: Yu no man du yu diniwroko heri bun efu yu no e go baka na den sma di wani sabi moro. Efu yu abi wan bun takimakandra, dan skrifi a nen nanga na adres fu a sma, awinsi yu prati tijdschrift noso wan tra publikâsi. Du ala muiti fu yepi wan sma di wani sabi moro fu di yu e go baka wantewante. Sorgu taki yu e pristeri a sma wan bijbelstudie.
6 Den fosi yarihondro disipel ben sabi taki Yesus ben gi den a komando „fu gi kotoigi finifini” (Tori. 10:42). Wi musu du a srefi sani disi, bika dati na a wan-enkri fasi fa wi o man meki disipel (Mat. 28:19, 20). Meki wi du ala sani wi man fu du a diniwroko fu wi heri bun.—2 Tim. 4:5.