Sreka joe eigi tijdschrift pristeri
1 Wi e warderi den Waktitoren nanga Ontwaakt! tijdschrift foe di den abi artikel di e kon na a joisti ten èn di e gi wi bodoi, di e taki foe ala sani, foe sani di abi foe doe nanga grontapoe afersi èn „den dipi sani foe Gado” (1 Kor. 2:10). Wi alamala e memre den foeroe njoen sani èn sani di e bow wi, di wi leisi na ini den tijdschrift disi di Jehovah e gebroiki foe tjari a waarheid safrisafri kon na krin (Odo 4:18). Wi wani de fajafaja foe prati den so fara leki a kan.
2 Ondrosoekoe joe gebied: Sortoe sma e libi na ini joe gebied? Efoe den e hasti densrefi na ini a libi, dan kande a de fanowdoe taki joe e sreka wan pristeri di sjatoe èn di no langabere. Efoe joe abi gebied pe den sma no e hasti densrefi na ini a libi, dan kande joe kan taki moro sani ini joe pristeri. Efoe moro foeroe foe den ososma e wroko na deiten, dan kande joe kan abi moro boen bakapisi te joe e fisiti den lati na bakadina noso na mofoneti. Kande joe ben kan miti wan toe foe den na deiten nanga jepi foe stratiwroko noso te joe e wroko wenkri foe wenkri. Wan toe preikiman abi boen bakapisi te den e go miti sma na wan informeel fasi na ini parkeer presi èn na ini den park.
3 Kon sabi den tijdschrift joesrefi: Leisi ibri uitgave wantewante te joe kisi en. Soekoe den artikel di joe e prakseri taki kande den sa hari den sma na ini joe gebied. Nanga sortoe tori den e broko den ede? Soekoe wan spesroetoe penti di joe kan kari foe na artikel di joe wani pristeri. Prakseri foe wan aksi di joe kan poti foe wiki a belangstelling. Teki wan tekst di e fiti foe leisi gi na ososma efoe joe e kisi na okasi gi dati. Prakseri fa joe ben kan poti wan fondamenti gi wan gobaka.
4 Sreka den bigin wortoe foe joe: Prakseri boen na fesi sortoe wortoe joe wani gebroiki foe bigin taki soema na joe, èn foe bigin nanga wan takimakandra. Wan toe sma abi boen bakapisi foe di den bigin na a fasi disi: „Mi leisi wan kefalek moi artikel na ini a tijdschrift disi, èn mi wani prati en nanga tra sma.” Foeroe sma e bigin nanga wan aksi di e poti prakseri na tapoe a penti di den wani foe taki foe en. Foe eksempre:
5 Te joe e poti krakti na tapoe wan artikel di e taki foe a de di ogridoe de na ala sei, joe ben kan aksi:
◼ „San wi moesoe doe foe sribi te neti sondro foe frede taki wan sma sa foefoeroe wi noso sa doe wi ogri?” Froeklari taki joe abi bodoi di e taki foe wan loesoe gi a problema disi. Heri esi a loesoe disi sa poeroe ibri tra sortoe broeja toe na sociaal sei. Sori go na wan sani na ini a tijdschrift di e gi so wan howpoe. Te joe e go baka, dan joe kan poti a prakseri foe na ososma na tapoe kapitel 1 foe a Sabi-boekoe.
6 Te joe e pristeri wan artikel di e taki foe na osofamiri libi, joe ben sa kan taki disi:
◼ „Moro foeroe papa nanga mama feni taki a de wan troetroe tjalensi foe kweki wan osofamiri na ini den dei disi. Foeroe boekoe skrifi foe a tori disi, ma srefi den sabiman no e agri nanga makandra. Wan sma de di kan gi wi tiri di wi kan froetrow?” Taki foe spesroetoe sani foe a tijdschrift nanga a sma, di e sori a koni rai di de foe feni na ini bijbel. Te joe e meki a gobaka, taki foe a fasi fa den Boekoe foe bijbel e prakseri foe a kweki foe pikin, di a Sabi-boekoe, bladzijde 145-148 e sori.
7 Te joe o poti prakseri tapoe wan artikel di e taki foe wan problema na sociaal sei, joe ben kan taki:
◼ „Foeroe sma e firi taki den de ondro druk bikasi foe a moeilek ten pe wi e libi na ini. Joe e denki taki a ben de a wani foe Gado taki wi moesoe libi na a fasi disi?” Sori go na wan artikel di e sori fa foe kakafoetoe gi den problema foe a ten disi noso di e gi reide foe froewakti wan tamara di no abi broko-ede. Na a tra fisiti foe joe, taki foe a prenki nanga na ondro-edeprakseri tapoe bladzijde 4-5 foe a Sabi-boekoe, èn baka dati, bigin wantewante nanga wan oso-bijbelstudie.
8 Fiti joesrefi na a ososma: Joe sa miti sma di abi belangstelling gi difrenti sani èn di abi difrenti background. Sreka wan pristeri di joe kan fiti na ibri ososma. Sreka joesrefi na so fasi taki joe kan fiti san joe wani taki na wan mansma, wan oemasma, wan bigisma, noso wan jongoesma. Nowan strak lin de di e sori san joe moesoe taki. Gebroiki san boen gi joe èn di abi boen bakapisi. Ma de fajafaja, taki sani di komoto na joe ati, èn de wan sma di e arki boen. Den sma di abi a „joisti jejefasi” sa si na opregtifasi foe joe èn den sa handri boen na tapoe dati. — Tori foe den Apostel 13:48.
9 Jepi makandra: Te wi e prati idea nanga makandra, dan wi e leri njoen fasi foe taki. Te wi e oefen den pristeri foe wi nanga makandra, dan dati e gi wi ondrofeni nanga froetrow (Odo 27:17). Efoe joe e oefen san joe wani taki, joe sa firi moro korostoe èn boen te joe de na a doro foe wan sma. A de prenspari taki papa nanga mama e gebroiki ten foe jepi den pikin foe sreka densrefi, foe arki te den e oefen a pristeri foe den, èn foe gi rai foe doe en moro boen. Den njoenwan kan abi winimarki te den e wroko nanga preikiman di abi moro ondrofeni.
10 A no abi foe de moeilek foe sreka joe eigi pristeri gi den tijdschrift. A de nomo fanowdoe foe abi wan spesroetoe sani na prakseri di joe wani taki èn dan foe taki en na wan fasi di e hari a sma prakseri. Te joesrefi e bigin doe wan sani èn e prakseri na fesi, dan joe kan meki wan boen pristeri èn tra sma sa piki boen na tapoe dati.
11 A prati di wi e prati tijdschrift na wan foe den moro prenspari fasi fa wi e prati a Kownoekondre boskopoe na heri grontapoe. Efoe joe kan poti A Waktitoren nanga Ontwaakt! na ini den anoe foe opregti sma, dan den tijdschrift kan taki gi densrefi. Prakseri ala ten foe a waarde foe den èn fa a boskopoe foe den kan kibri libi. A fasi disi foe ’doe boen èn foe prati sani nanga tra sma’ na a sani di e plisi Jehovah srefisrefi. — Hebr. 13:16.