Préki a boen njoensoe fri èn sondro frede
1 Wi leki Jehovah Kotoigi abi heri ipi réde foe préki a boskopoe foe a Kownoekondre nanga dek’ati èn nanga krin-ati. Na fosi presi wi e tek presi gi Gado djaso. Na a di foe toe presi na prensparifasi foe a boskopoe ensrefi e aksi dati wi taki nanga overtoigi. Na sékerfasi dati Jehovah de nanga wi èn sa gi wi krakti, moesoe meki wi préki na waarheid sondro frede (Jer. 1:17, 19). Moro fara na eksempre foe trawan, di nanga aladi den ben abi foeka nanga problema ben tan hori doro foe doe na wani foe Gado, kan gi wi dek’ati. Wi kan de séker taki wi tranga begi foe kisi dek’ati foe tan doe a wani foe Gado, sa kisi jesi. — Tori. 4:29, 31.
2 Efoe wi e ferstan boen o prenspari a boen njoensoe de, dan disi moesoe gi wi dek’ati foe taki foe en nanga krin-ati. Den kownoekondrewaarheid disi no e komoto foe wan libisma fonten, ma sma kon sabi den ’nanga jepi foe gadofasi openbaring’ (Gal. 1:11, 12). Na Kownoekondre de na markitiki nanga san ala sma sa moesoe kisi kroetoe. Foe dat’ede Jezus ben meki bekenti dati na sondro-frede prékiwroko foe wi foe a boen njoensoe de srefi moro prenspari leki na libi foe wi ini a ten disi. — Mark. 8:34, 35.
3 A gens di wi e kisi e meki wi bosroiti foe préki a boskopoe fri èn sondro frede kon moro tranga (1 Thess. 2:2). Soifri sabi omtrenti Jehovah nanga bribi na ini en Wortoe e gi wi wan inisé krakti di e meki wi kon fri foe frede gi den sma di e meki moeiti foe tapoe wi (1 Petr. 3:13, 14). Den pramisi foe Jehovah e gi wi sèkerfasi foe en lobifasi sorgoe gi wi. Wi no e kisi dek’ati toe na ini na pramisi foe Jezus dati a ben sa de nanga wi te na kaba foe na seti foe sani? (Matt. 28:20) Efoe wi e préki sondro frede, wi kan taki neleki na psalmsingiman nanga fertrow: „Jehovah de na mi sé; mi no sa frede. San libisma foe grontapoe kan doe mi?” — Ps. 118:6.
FERTROW TAPOE JEHOVAH
4 Wan soifri ondrosoekoe foe na tori foe getrow man meki wi abi wan dek’ati hori doro ini na dienst foe Gado. Petrus nanga den tra apostel den ben kon sabi den foe den krin-atifasi foe préki (Tori. 4:13; 5:29). Sjatoe baka di Paulus ben drai en libi, a bigin wantewante foe gi kotoigi „sondro frede” èn a tan doe dati (Tori. 13:46; 14:3). Ooktoe wi kan kisi krakti foe „sowan bigi-wolkoe” foe kotoigi di ben libi bifo na kristenten, net soleki foe den disiten eksempre foe wi brada èn sisa ini den kontren foe Malawi, Turkije, Korea nanga pisi foe Oost-Europa. Na njoensoe foe na bribi foe den èn den fri èn sondro frede prékiwroko e troesoe wi foe go doro nanga dek’ati ini Jehovah dienst. — Hebr. 12:1.
PRISTERI A TEGO LIBI-BOEKOE
5 Wi abi wan boen réde foe taki sondro sjensjen te wi e pristeri a Tégo libi-boekoe ini augustus. Nanga aladi wantoe ososma kande e sori belangstelling gi na boskopoe, wi sa feni kande na trawan wan sekere mate foe mi-no-kefasi nanga gens. Fa wi sa reageer tapoe dati? Na fasi fa a sma di wi e miti e tjari ensrefi sa tapoe wi foe préki nanga overtoigi èn sondro frede? Wi sa gi pasi dati omstandigheden di no de so boen ini na maatschappij meki wi faja kon kowroe? Efoe wi e ferstan omeni waarti a boskopoe di wi e tjari abi èn e ferstan o tranga libisma abi na sékerfasi fanowdoe foe na ferwakti tapoe tégo libi ini wan paradijs tapoe grontapoe wi no sa hori wisrefi a baka foe meki a boen njoensoe bekenti na trawan fri èn sondro frede.
6 Begi de ete wan sani nanga san wi kan ontwikkel sondro frede hori doro ini na diniwroko. Paulus ben taki dati „na ibri okasi foe begi na ini geest” kan abi leki bakapisi foe préki ’nanga na konifasi foe taki sondro frede’ (Ef. 6:18-20). Ini ten foe benawtoe Jehovah ben arki gawgaw na den begi foe na psalmsingiman foe di a meki ’a kon de sondro frede ini en sili nanga krakti’ (Ps. 138:3). Meki a de so dati wi makandra begi gi oensrefi opo na pasi gi wi ’foe sori moro dek’ati foe taki a wortoe foe Gado sondro frede’, nanga di wi e sori trawan a pasi foe tégo libi na ini wan paradijs na grontapoe. — Fil. 1:14.