Sori taki wi e gro na jejesé foe di wi e teki wan faja prati na a fisiti foe komakandra
1 Jeje gro de wan marki foe san ala dienstknegti foe Jehovah e winsi foe kisi en. Paulus ben skrifi: „Meki wi . . . nanga di wi e taki na waarheid, gro ini lobi ini ala sani ini en di de na ede, Kristus” (Ef. 4:15). Fa wi e doro jeje gro? Paulus e kari toe sani namkoe „na taki foe waarheid” èn „nanga lobi”. San de moro fara fanowdoe?
2 A de krin dati moro foeroe de fanowdoe leki wan opregti bribi, foe di Paulus ben skrifi ooktoe ’dati nanga na mofo sma e meki wan publiki bekenti foe jepi’ (Rom. 10:10). Joe e sori taki joe e gro na jejesé foe di te komakandra de joe e doe wan publiki bekenti? Joe kan meki joe actieffasi foe teki prati kon moro betre? Joe no ben si taki joe e leri moro foeroe foe den komakandra efoe joe e teki wan faja prati na den?
SREKA A FESI
3 Persoonlek studie nanga sreka a fesi sa jepi joe foe feni na dek’ati foe taki wan sani. Sreka wantoe kommentaar a fesi foe difrenti paragraaf. Poti wan strepi na ondro srotowortoe èn efoe a de fanowdoe meki sjatoe aantekening na a kantilin.
4 Te joe e studeri èn e prakseri dipi poti prakseri tapoe bijbeltekst di skrifi de ma di den wortoe no skrifi alamala di joe ben sa kan lési gi den noso taki sjatoe foe na inhoud foe den èn ben sa kan sori fa a e fiti na ini na stof. Prakseri toe fa son punt kan gebroiki na ini wi persoonlek libi noso na ini wi diniwroko.
TAPOE KOMAKANDRA
5 Te joe sreka joesrefi a fesi joe kan gi piki di abi waarde. Hori na prakseri taki a ’e gi moro foeroe kolokoe foe gi leki foe kisi’ (Tori. 20:35). Sabi taki trawan e njan boen foe joe kommentaar èn e kisi boen winimarki foe den. Sonwan ben kisi jepi foe meki wan bigin foe gi kommentaar foe di a fesi den ben meki na studieleider kon sabi tapoe sortoe paragraaf den ben sreka a fesi foe gi wan piki.
6 Na fosi kommentaar leki wan piki tapoe wan aksi moesoe de sjatoe èn to the point. Den sortoe kommentaar dati de troetroe moro koemakriki foe gi èn tra sma kan froestan en moro betre. Proeberi foe gi nanga joe égi wortoe kommentaar, presi foe joe lési nomo ini den boekoe. Nanga disi wawan kaba joe froestan foe Gado Wortoe sa kon moro foeroe èn joe sa kisi jepi na ini joe jeje gro.
STUDIELEIDER KAN JEPI
7 Den studieleider kan doe foeroe foe gi dek’ati foe abi wan moro betre prati na den komakandra. Loekoe fini soema e gi wawantron nomo kommentaar èn gi den wan persoonlek dek’ati, kan de wan bigi jepi. Den studieleider sa hori den égi kommentaar sjatoe èn poti aksi di e opo okasi foe piki efoe a de fanowdoe foe meki tra punt kon moro boen na fesi.
8 Meki a de so taki wi alamala e meki moeiti foe prijse Jehovah now ini na kristen gemeente foe di doronomo wi e teki prati na wan fajafasi, nanga san wi e sori taki wi e gro na jejefasi èn e gi trawan dek’ati na ini lobi nanga heri boen wroko. — Ps. 35:18; Hebr. 10:24, 25.