Yepi yonguwan fu kakafutu gi ranpu
1 Yehovah wani taki wi nyanbun fu en diri presenti fu a libi. Nanga dati ini prakseri a gi unu wan skotumarki fu fri gi unu srefi, sotaki wi kan pruberi fu doro den winsi fu unu ati. Ma makandra nanga na fri dati fu handri, Yehovah e aksi wi nanga reti frantiwortu fu san wi e du. — Preyk. 11:9.
2 Fa wi kan kakafutu, aladi wi de onvolmaakti èn e sondu, gi na ranpu di kan kon tapu wi leki bakapisi fu na fasi fa wi e tyari wi libi? (Preyk. 11:10) A kan srefi taki yonguwan di no abi ondrofeni man fu kibri den srefi fu ranpu? Koloku gi unu na piki de iya. Yehovah sabi heri bun taki wi abi tiri fanowdu, èn tapu wan lobifasi a ben sorgu gi ray èn richtlijn fu yepi yonguwan nanga sosrefi tu owruwan fu psa sondro fu kisi mankeri den muylekhèyt di yu kan teki gersi nanga bergi èn di e marki den lasti dey disi. — Ps. 19:7; 119:9; 2 Tim. 3:1.
FRANTIWORTU FU PPA NANGA MMA
3 Te muylekhèyt e kon, dan yonguwan abi ppa nanga mma fanowdu, di e frustan den frantiwortu fu den èn di man fu ’opo den anu di anga èn den kindi di kon slap, sotaki san malengri no lusu komoto na skrufu, ma moro furu meki a kon gosontu baka’ (Hebr. 12:12, 13). Fu yepi den pikin fu den tan tapu na pasi di e go na libi, dan ppa nanga mma musu poti na denki fu den pikin fu den reti. Gi disi pasensi èn na koni fu du sani esi-esi de fanowdu èn sosrefi tu blesi fu Yehovah de fanowdu.
4 Ppa nanga mma no man fu kibri den pikin fu den krinkrin teyge takru krakti. Ma fa na denki fu wan pikin kan kon tranga? Fu di ’den e tyari en kon bigi ini den seryusu frumane fu Yehovah’ (Ef. 6:4). Gi disi sani soleki osofamiri stuka, yeye èn moreel tiri, santa aktiviteit dorosey fu skoro, na gi fu trangaleri di fiti èn wan bun eksenpre fu ppa nanga mma de fanowdu.
5 Na buku San yongu sma e aksi — Praktis piki, di ben gi fri tapu na „Gi yu srefi ini a dini fu Gado”-distriktkongres, meki fu yepi yongu sma. So srefi tu a e yepi ppa nanga mma fu taki-go-taki-kon fu yoysti markitiki nanga den pikin fu den. Efu den weti fu Gado stanpu go bun ini na ati èn yeye fu na pikin, dan den weti disi kan dini leki wan di e tiri ofu e sori a pasi. Osofamiri takimakandra fu a materiaal ini na nyun publikâsi disi sa tranga yonguwan fu kakafutu gi ranpu.
6 Di na Yongu sma e aksi-buku ben gi fri a yari di psa, na kongrestakiman ben poti en prakseri tapu den yonguwan di ben kon makandra èn a ben poti prakseri tapu na wartifasi fu na buku. Ppa nanga mma ben kisi na deki-ati fu kobroyki en leki fondamenti gi ososfamiri takimakandra. Na a kba fu ibri kapitri wan spesrutu pisi e kon di nen „Aksi fu takimakandra”. Den aksi disi no meki fu luku na pisi tori finifini paragraaf fu paragraaf. Ibri aksi e go fu wan ofu moro onderkopjes. Wantu osofamiri-edeman wani poti den aksi baka di na heri kapitri leysi. Trawan kande wani poti den aksi baka di na tori na ondro den ondrokop dati leysi.
YEPI YONGUWAN INI NA KONTREN FU WI
7 Wi e miti kande furu yonguwan na ini na kontren fu wi. Wantu aksi di den e aksi e kisi wan piki na ini na buku disi, èn fu dati-ede ini na preykiwroko, ini yanuari wi sa poti den sma prakseri tapu na Yongu sma e aksi-buku. Kande yu ben prakseri fu wan pristeri di yu ben sa wani kobroyki sote. Ofu kande yu ben sa wani fu taki wan sani soleki san e kon now:
8 „Furutron wi e memre den yongu yari fu wi leki na moro koloku ten fu wi libi. Ma leki wan sari sani wi e si now furu onkoloku yonguwan, a no so? [Gi okasi fu piki.] Den markitiki di e kenki meki wan bruya grontapu du kon nanga furu problema di e abi krakti tapu yongu sma èn e puru nanga tranga na koloku fu den. Pe den kan feni tiri di de fu frutrow? [Gi okasi fu piki.] Luku san a beybri e rikomanderi na ini Psalm 119:9: [Leysi.] Na beybri e poti krakti tapu na frantiwortu fu ppa nanga mma fu gi leri san de yoysti, èn e gi na ini Odo 1:8 na komando disi: [Leysi.] Ini akruderi nanga disi na buku San yongu sma e aksi — Praktis piki abi furu praktis richtlijn, di abi en fondamenti ini na beybri, èn a lay nanga ondrofeni fu na trutru libi di sa yepi yonguwan fu si fa nanga bun bakapisi den kan go miti na tamara fu den èn na so fasi kan de koloku. [Sori tapu difrenti nen fu kapitri fu wiki na belangstelling.] Yu kan nyanbun fu na bun buku disi di lay nanga prenki fu wan bijdrage fu Sƒ 5,-.”
9 Na beybri e sori taki yonguwan musu tiri den krakti fu den go na a sey fu marki di de koni èn e hori langa. Na buku disi seyker san sori sma tapu na fonten fu koni di no abi kba — na beybri. Fa a de wan warti wrokosani fu tyari yonguwan go na wan gudu libi now, èn na wan seyker tamara! — Preyk. 12:1.