Gi den beibri stukaman deki-ati fu go na fesi
1 Ini grontapu a go na fesi abi moro furu fu du nanga technologie ofu afersi na skinfasi. Ma dati de tra fasi na Yehovah pipri. Morofuru wi e du muiti fu go na fesi na yeyefasi. Wi breiti taki wi kisi a deki-ati di ben meki wi tron disipel fu Krestes di abi faya fu du sani èn di e meki froktu. — Yoh. 15:8; 2 Petr. 1:5-8.
2 Ini den Evangelie a wortu „disipri” e kobroiki morofuru gi den wan di no e bribi wawan ini den leri fu Krestes, ma di e handri so srefi soifri akruderi dati (Mat. 28:19, 20). Den beibri stukaman frustan disi bun? Fa wi kan gi den deki-ati fu go na fesi so taki den tron disipri?
POTI A BELANGSTELLING GO TAPU A ORGANISÂSI
3 A de krin fu si taki a go di a stukaman e go na fesi abi fu du nanga en warderi gi Yehovah organisâsi. Fu dati-ede, wan pisi fu wi frantiwortu leki leriman de fu poti a belangstelling fu a stukaman go tapu a organisâsi. Yari langa kba wi kisi deki-ati fu kobroiki feifi te tin miniti fu ibri beibristudi ten fu fruteri wan sani fu na organisâsi. A brochure Yehovah Kotoigi — Den tyari kon na wan na a heri grontapu ini a du fu Gado wani kan kobroiki fu du disi. A sma nanga suma yu e studeri abi wan? Efu a no de so, sorgu taki a kisi wan wantewante. Gi en deki-ati fu leisi en, èn fruteri en taki na ibri studi wi sa luku wan pisi fu en.
4 Den bodoi tapu bladzijde 14 nanga 15 fu a Du Gado wani-brochure abi leki marki fu bow warderi gi ibriwan fu den gemeente konmakandra. Fu san-ede yu no e luku soso wan ofu tu paragraaf makandra nanga en ibri wiki? Sori en fa ibri konmakandra e skoro wi èn e leri wi fu sorgu gi wan aparti fanowdu. Yepi a stukaman fu frustan taki a gro na yeyefasi de a bakapisi „te a e konmakandra nanga trawan” (Hebr. 10:24, 25). Gi en deki-ati na wan waran fasi fu kon nanga unu na a Kownukondrezaal. Drape a sa ondrofeni na wánfasi èn na lobi di wi leki a pipri fu Yehovah, di tyari kon na wan, e nyanbun fu en. — Ps. 133:1; Yoh. 13:35.
A TRANGA FU GRO NA YEYEFASI
5 Sma di e kon pas musu tron trutru stukaman fu Gado Wortu, èn den musu go na fesi ini sabi, ini a frustan fu sani, èn ini a kobroiki fu den gronprakseri fu a Wortu. Fu dati-ede wi sa go doro nanga a studi na ini a Têgo libi-buku nanga a Anbegi ini wànfasi-buku ofu a Tru vrede-buku, srefi awasi a stukaman dopu bifo a kba studeri den buku disi. A stukaman kan kisi wan fu den buku disi, srefi awasi a o teki wantu mun ete bifo a go bigin fu stuka a di fu tu buku. Disi kan wiki en yeye nyan lostu èn gi en tranga fu leisi moro, san sa meki a go moro esi na fesi. Wi musu poti so srefi krakti tapu a waarde fu abi wan abonnement tapu Na Waktitoren nanga Ontwaakt! èn fu teki tra buku fu a Genootschap fu tan skinskin nanga a ’marki fu fanowdu nnyan na a yoisti ten’ (Luk. 12:42). Den wan di e du disi sa kan rutu steifi na ini a bribi, den sa kon bow ini bribi èn den sa kon kánkán na ini a bribi. — Kol. 2:7.
6 Fu di beibri stukaman sa tron wi konpe kotoigi ini a ten di e kon, meki den abi wi yepi fanowdu fu kan gro kon lepi (Hebr. 5:14.). Wi musu prijse den na wan fasi di fiti fu gi den deki-ati fu go na fesi (Fil. 3:16). A e prati den sani di a e leri nanga den famiri nanga mati fu en? A skrifi en nen na a teyokrasia diniwroko skoro efu a doro den marki fu du dati? A abi na winsi fu tron wan preikiman fu a bun nyunsu?
7 Efu wi leki preikiman e du wi pisi, dan wi kan fruwakti furu blesi fu Yehovah (2 Kor. 9:6). Noiti wi musu frigiti a krakti di begi abi tapu beibristudenti. Aksi Yehovah fu tyari den so taki den kan du bun tapu san den e leri (1 Kor. 3:6, 7). Meki a de so taki den e meki positief stap fu tai den srefi fayafaya nanga a gemeente èn yepi sobun taki a nen fu Yehovah kisi glori èn prijse.