Pristeri Na soekoe di sma e soekoe Gado
1 Te wi e preiki oso foe oso, e doe stratiwroko ofoe e preiki tra fasi leki fa a gwenti de, wi e miti sontron sma di de foe wan no-kresten relisi. Efoe wi abi soso wan frafra sabi foe na relisi bakagron foe den, dan a kan de moeilek gi wi foe preiki foe Gado kownoekondre nanga boen bakapisi. Now, nanga a njoen publikâsi Na soekoe di libisma e soekoe Gado (Bakratongo), wi kan kisi inzicht ini den bigi relisi foe grontapoe èn froestan moro betre san den sma disi e bibri. Wi kan de srekasreka foe jepi so foeroe sma leki a kan foe komoto „foe na trapoe foe Didibri” — 2 Tim. 2:24-26; Tit. 3:2.
2 Te wi e doe na diniwroko foe wi, dan wantoe sma sa meki a kon a krin taki den na moslim, djoe, hindoe, Sikh, boeddhist ofoe memre foe wan tra bigi relisi groepoe. Wi kan poti prakseri na tapoe disi na wan switi fasi èn kande wi kan taki: „A de wan moi sani foe miti sma foe foeroe difrenti relisi. Nanga a soekoe di libisma e soekoe Gado, den teki difrenti sei. [Djaso efoe na situwâsi e gi pasi foe dati, joe kan kobroiki den tekst foe na Tori foe takimakandra.] Ma joe no e agri nanga mi taki libisma abi na gwenti foe hori na a relisi foe den papa nanga mama na presi foe den srefi soekoe Gado? Nanga tra wortoe, den ben gebore na ini wan bepaalde relisi. Dati den e meki kon a krin na ini a fosi kapitel foe na boekoe disi Na soekoe di libisma e soekoe Gado. [Sori bladzijde 8, paragraaf 12.] A kan de wan toemoesi moi sani foe leri moro foe tra relisi. Na boekoe disi e froeklari na bigin, den kobroiki nanga den leri foe den bigi relisi foe grontapoe.” Drai dan den bladzijde foe na boekoe èn sori wantoe prenki foe na relisi foe na ososma. Froeklari sjatoe taki a boekoe tjari kon a doro leki wan pisi foe wan moeiti di e doe na a heri grontapoe foe jepi opregti libisma nanga a soekoe di den e soekoe Gado. Pristeri na boekoe baka dati.
3 Joe kan sori langalanga toe go na a kapitel di abi foe doe nanga na relisi foe na ososma. Wan hindoe sa feni en wan span sani foe si na karta foe India, na tapoe bladzijde 23, èn den fowto na tapoe bladzijde 96 èn 117. Wanwan tron so dan wi e miti kande wan Sikh nanga wan tai-ede di den gwenti weri. Den bladzijde 100-101 e gi wan sjatoe tori foe na bribi dati.
4 A sa de kande wan onfroewakti prisiri gi wan Moslim te a si den lo fowto foe Mekka nanga na Ka’ba na tapoe bladzijde 289 nanga den tori di teki foe na Qor’aan skrifi na tapoe bladzijde 288 nanga tra bladzijde. Boeddhist sma di e soekoe froelekti kande e sori belangstelling gi kapitel 6 èn den prenki di ben poti na dati na tapoe bladzijde 141 en 157. Sma di komoto foe Sneisi moesoe foe warderi kapitel 7 foe na tauïsme nanga confucianisme. Den prenki na tapoe bladzijde 171 èn 173 kan wiki na belangstelling gi na boekoe. Foeroe Japan sma abi na boeddhist bribi èn na sjintoïst bribi èn den sa si den srefi na ini den prenki na tapoe bladzijde 190 èn 195 na ini a kapitel foe „Sjintô — Japan e soekoe Gado”.
5 Na ini son kontren wi e miti sma foe na djoe relisi. Kapitel 9, „Djoe kerki — E soekoe Gado nanga jepi foe den Boekoe èn den leri foe libisma”, ben sa moesoe wiki na belangstelling foe den. Den gwenti foe abi belangstelling gi algemeen kweki èn foe dati-ede na heri boekoe sa taki nanga foeroe foe den. Wi e miti so srefi atheïst nanga agnostici, èn kapitel 14, di abi leki nen „A no bribi di sma no e bribi ini na ten disi — Na ondrosoekoe wroko moesoe go doro?” sa taki nanga den opregti sma na den mindri. Den boeweisi foe na boen foe bribi na ini Gado sma kan feni foe bigin foe bladzijde 334.
6 Gi ibriwan sma di abi wan relisi foe na krestenhèit, kapitel 10 kan wiki na belangstelling. Na tapoe bladzijde 236 den e aksi: „Jesus — Sortoe boeweisi a ben abi taki a abi na makti?” Na tapoe bladzijde 243 nanga 251 wi e si toe foe den wondroe di Jesus ben doe. Fa wi doe sabi taki Gado ben feni Jesus boen? Na prenki na tapoe bladzijde 253 e piki na aksi dati.
7 Efoe wi wani fiti na pristeri foe wi na ibri aparti sma, dan a de krin taki wi moesoe sabi san skrifi na ini a boekoe èn moesoe de froetrow nanga na fasi fa den kapitel e waka baka makandra èn nanga den prenki. (Foe kisi moro fara bodoi, sori go na Taki-go-taki-kon nanga jepi foe den Boekoe, bladzijde 21-24.) Dan kande wi man foe sai na waarheid siri foedi wi e pristeri na njoen boekoe disi na wan taktik fasi (1 Kor. 9:19-23; Kol. 4:5, 6). Foe di nofotron na ini a heri boekoe den e teki na bijbel foe gersi nanga tra sani, dan wan boen fondamenti de foe bigin bijbelstudie. Wan tra artikel sa gi rai fa wi kan meki gobaka foe bigin bijbelstudie nanga sma foe foeroe fasi foe bribi.