Gi kotoigi na „ala sortoe sma”
1 Te wi e miti sma foe difrenti koeltoeroe noso relisi background, dan wi e memre taki Jehovah wani „taki ala sortoe sma moesoe kisi froeloesoe èn kon kisi wan soifri sabi foe waarheid” (1 Tim. 2:4). Boiti wan toe spesroetoe traktaat nanga brochure di ben meki, wi abi toe kefalek boen boekoe di wi kan gebroiki ibri ten foe jepi sma di a relisi foe den no leri den a waarheid foe Gado nanga Krestes.
2 A boekoe De mens op zoek naar God e gi koni foe man si fa den moro bigi relisi foe grontapoe ben bigin èn foe dati ede a kan jepi sma na ala sei foe teki gersi a bribi foe den nanga san bijbel e leri foe a wan-enkri troe Gado. Na a tra sei, foe di a boekoe A moro bigi man di oiti ben libi e poti krakti na tapoe a libi foe Jesus Krestes, meki dati kan jepi wan sma foe kon sabi a Manpikin foe Gado moro boen èn foe kon krosibei na en, neleki fa dati ben pasa nanga foeroe sma na ini a fosi jarihondro (Joh. 12:32). Awansi o ten a fiti, joe kan proeberi foe gebroiki den rai di e kon now foe bigin poti den sma prakseri tapoe den boekoe disi.
3 Efoe joe denki taki a ben sa boen foe pristeri a „Moro bigi man”-boekoe na wan sma, dan joe ben sa kan aksi:
◼ „San joe e froestan te joe e denki foe Jesus Krestes? [Gi okasi foe piki.] Foeroe historiaman e erken Jesus leki a moro bigi man di oiti ben libi. [Kari wan foe den eksempre di skrifi na a inleiding foe a Moro bigi man-boekoe.] Bijbel e sori taki a libi foe Jesus ben de wan model gi wi foe waka na en baka.” Leisi 1 Petrus 2:21 nanga a fosi paragraaf tapoe a lasti bladzijde foe na inleiding na ini a Moro bigi man-boekoe. Efoe na ososma wani leri foe Jesus, dan pristeri en a boekoe. Bifo joe gowe, dan leisi Johanes 17:3 èn aksi en: „Fa wi kan teki a sabi disi di e tjari wi go na têgo libi?” Seti sani boen so taki joe kan go baka nanga a piki.
4 Te joe e go baka foe tjari kon na krin fa foe teki sabi di e gi sma libi, dan joe ben kan taki:
◼ „Mi ben pramisi joe taki mi ben o kon baka foe sori joe fa wi kan teki a sabi di e tjari wi go na têgo libi.” Pristeri a Sabi-boekoe, èn gebroiki a fosi kapitel foe demo wan studie.
5 Efoe joe wani pristeri a boekoe „De mens op zoek naar God”, dan joe ben kan aksi:
◼ „Nanga so foeroe difrenti relisi na ini a ten disi, oiti joe aksi joesrefi fa wi kan kon sabi sortoe wan Gado e feni boen?” Baka te a sma piki wan sani, opo a Op zoek naar God-boekoe na bladzijde 377. Poti prakseri tapoe penti nomroe 7, èn aksi efoe a ososma e agri taki a troe relisi moesoe man meki ala difrenti ras foe libisma kon libi na ini wánfasi. Soekoe wan foe den tekst di kari, èn efoe ten de ete, taki makandra nanga a sma foe wan toe foe den tra penti tapoe a lijst. Efoe a sma abi troetroe belangstelling, pristeri en a boekoe. Te joe e gowe, dan joe ben kan aksi: „Fa a troe relisi moesoe abi krakti tapoe a fasi fa wan sma e tjari ensrefi?” Seti sani so taki joe kan tjari wan gobaka foe piki na aksi.
6 Te joe e go baka foe tjari kon na krin fa a troe relisi moesoe abi krakti tapoe wan sma libi, dan joe ben sa kan aksi:
◼ „Fa joe e prakseri taki relisi moesoe abi krakti tapoe a fasi fa wan sma e tjari ensrefi? [Gi okasi foe piki.] Krestes ben gi wi wan markitiki foe ondrosoekoe wan relisi.” Leisi Mateus 7:17-20 langalanga foe bladzijde 12 ini a Op zoek naar God-boekoe. Baka dati gi na ososma wan kari foe leisi paragraaf 20 na bladzijde 13-14. Efoe ten de ete, dan taki makandra nanga na ososma foe den paragraaf 25-29 na bladzijde 16-18. Disi kan tjari joe go na wan studie foe a San Gado e aksi-brochure noso foe a Sabi-boekoe.
7 Sani foe bigin wan takimakandra: Foeroe jepisani de di sma kan feni foe gi leri na ini a Op zoek naar God-boekoe èn di wi kan gebroiki na a fosi takimakandra noso na wan gobaka. Joe kan bigin wan takimakandra soso foe di joe e poti wan aksi di fiti. Foe eksempre, loekoe den aksi disi nanga den tori nanga den bladzijde pe den de foe feni:
„Aksi di abi wan piki fanowdoe” — bladzijde 17, 18.
„Jesus ben de wan anansitori?” — bladzijde 237.
„Soema ben skrifi bijbel?” — bladzijde 241.
„A Koran nanga bijbel” — bladzijde 285.
„Boeweisi taki bijbel de troetroe foe Gado”— bladzijde 340, 341.
„San Jehovah Kotoigi e bribi” — bladzijde 356, 357.
„Fa foe kon sabi a troe relisi” — bladzijde 377.
8 Joe kan go na den bladzijde di joe soekoe na ini a Op zoek naar God-boekoe èn tjari a penti di joe e taki foe en kon na krin. Baka dati seti sani foe tjari wan gobaka foe di joe e poti wan tra aksi di joe kan piki nanga a San Gado e aksi-brochure noso a Sabi-boekoe. Sorgoe taki joe gi na ososma wan kari foe kon na a poebliki konmakandra èn libi wan strooibiljet na baka gi en.
9 Ala sortoe oprègti sma e soekoe waarheid foe Gado nanga Krestes. Wi kan jepi den te wi e doe wi kotoigi wroko. So boen, meki wi tan ’wroko tranga èn meki tranga moeiti, bika wi poti wi howpoe tapoe wan Gado di e libi èn di de wan Froeloesoeman foe ala sortoe sma’. — 1 Tim. 4:10.