Doe wi Kownoekondre-diniwroko leki Jehovah Kotoigi
1 Leki Jehovah Kotoigi wi abi na moro bigi grani na grontapoe. Wi e teki presi gi Jehovah na ini wan universeel kroetoe pe ala den wan di e kisi anbegi leki gado, e kisi kroetoe (Jes. 41:1, 23; 43:12). Foe jepi wi foe opo taki gi na howpoe foe wi na wan warti fasi, Jehovah ben sreka wan bibliotheek foe publikâsi di lai boen (1 Petr. 3:15). Na Index foe Waktitorenpublikâsi (Bakratongo) na wan prenspari jepisani foe feni den bodoi di wi abi fanowdoe. Te wi sabi wantoe foe den prenspari marki foe en, dan disi sa jepi wi foe kon moro koni na ini na gebroiki foe en.
2 Wi alamala moesoe sabi na prenspari ede-wortoe „Jehovah” heri boen. Joe kan feni na ini a Index 1986 (Bakratongo) verwijzing di e froeklari foe san-ede Jehovah foe wan pisiten e gi pasi taki ogri de? So srefi joe sa feni na ini na Index 1981-1985 (Bakratongo), na ede „Nen” di den tjari kon na mindrisei. Drape verwijzing tjari kon na wan foe ala sani san ben kon a doro foe na nen Jehovah.
3 Ete wan tra ede-wortoe di de toemoesi prenspari na „Jehovah Kotoigi”. A e tjari kon na wan den verwijzing di e sori go na Jehovah Kotoigi leki wan organisâsi. Joe sabi san na wi officieël fasi foe si sani na ini a tori foe na tjari foe wapen foe tapoe slag gi joe srefi, na kenki foe bijbelstudie-jepisani gi relisi boekoe foe trawan, ofoe sociaal seti? Gi den sortoe aksi disi joe sa feni verwijzing ondro na ondro-ede „fasi foe doe ini a tori foe — ”. Moro fara den e froeteri njoensoe foe njoenmodo-ten historia foe Jehovah Kotoigi na ini difrenti kondre, èn na ondro na ede „Sani di tra sma e taki”, di den tjari kon na mindrisei, wan finifini lijst de foe kommentaar abra Jehovah Kotoigi.
4 Bodoi foe na fasi fa den dienstknekti foe Jehovah e doe den Kownoekondre-diniwroko na ini a ten disi, sma kan feni te den e meki gebroiki foe wantoe prenspari ede-wortoe. Ondro na ede-wortoe „Datum” wan ede de „A kon a krin foe den bribi overtoigi”, di den tjari kon na mindrisei. Verwijzing de di e sori go na prenspari froeklari foe na froestan di wi abi ini na tori foe leri, profeititori nanga profeiti eksempel èn den seti baka makandra akroederi na ten di den ben pasa. „Datum di wani taki wan sani na a sei foe profeititori” e kon wantewante na baka dati. Disi na jari na ini san profeititori ofoe profeiti eksempel ben kon troe ofoe ben bigin foe kon troe.
5 Libihistoria foe getrow dienstknekti foe Jehovah na wan fonten foe deki-ati nanga leri gi wi. Den kan jepi wi foe poti wan steifi fondamenti gi na tamara na ini wi pikin èn na ini den sma nanga soema wi e studeri na bijbel. Joe sa feni den libihistoria disi, di seti akroederi den persoonlijk nen èn titel foe den artikel, na ondro „Libihistoria foe Jehovah Kotoigi”.
6 Wan sani di na pipel foe Jehovah abi den wawan na a bijbel leri foe toe presi foe go gi den wan di Jehovah feni boen — wan hemelwan èn wan grontapoewan. Na ede-wortoe na ondro san wi e feni verwijzing foe den wan di e kisi „na hemel kari” na „Gemeente foe Gado” (Hebr. 3:1; Tori 20:28; 1 Tim. 3:15). Tra ede-wortoe na „Fikapisi” nanga „144.000”. Toe ede-wortoe, „Bigi ipi” nanga „Tra skapoe”, na den moro prenspari wan di e sori go na bodoi di e taki foe den wan di abi na howpoe foe libi foe têgo na grontapoe. — Openb. 7:9; Joh. 10:16.
7 Efoe wi de jongoe ofoe owroe, na grani foe de wan foe Jehovah Kotoigi, abi krakti na tapoe ibri pisi foe wi libi. Na ini artikel di o kon, na ini Wi Kownoekondredienst, den sa sori fa na Index (Bakratongo) kan jepi wi na ini wi diniwroko, na ini na gemeente, na ini wi osofamiri èn na ini na velddienst.