Na warderi di joe abi gi Krestes dede
1 „Na Manpikin foe libisma no ben kon. . .foe sma dini en, ma foe en dini sma èn foe gi en sili leki wan froeloesoe paiman na a presi foe foeroe sma” (Mat. 20:28). No wan tra libisma di oiti ben libi na grontapoe ben kan doe san Jesus Krestes ben doe gi na libisma famiri. Nanga jepi foe na fasi fa a ben libi èn na dede foe en na wan pina-oedoe, te foe kaba, a ben tjari wi go tapoe na pasi foe kisi na moro bigi presenti di iniwan sma ben sa kan kisi: têgo libi. Ma tokoe, moro foeroe sma no abi foeroe warderi foe san Krestes ben doe gi wi.
2 Denki pikinso fa Jesus ben miti nanga den tin gwasiman. Di den ben si Jesus, den ben bari: Jesus, Leriman, abi sari-ati nanga oenoe!” (Luk. 17:13) A ben abi sari-ati nanga den troetroe èn ben taigi den akroederi na Wet, foe go èn sori densrefi na den priester. Di den ben de na pasi e go, ala den tin gwasiman ben kon betre.
3 Ma soso wán ben drai kon baka na Jesus foe taki en tangi. Den tra neigi? Den ben tan go den eigi pasi sondro foe denki foe go taki den jepiman tangi (Luk. 17:15-17). Soema wi gersi? Wi wani de leki a man di ben drai go baka. En ben abi troetroe warderi. Na so wi e denki foe Krestes dede?
4 Sori na warderi foe wi: Ibri jari a Genootschap e gi leki rai foe leisi spesroetoe bijbeltekst ini a wiki bifo a Memrefesa. Den tekst di den ben gi leki rai foe leisi ini bijbel, wi kan feni ondro den datum foe 12 te 17 april tapoe na Kalender foe Jehovah Kotoigi 1992. Wi kan sori wi warderi foe di wi e leisi èn e go denki dipi foe den sani disi di ben feni presi ini Jesus libi, leti bifo en dede.
5 Wi velddienst aktiviteit abi foe doe nanga wi warderi gi na Memrefesa. Owroeman sa wani seti sani boen so dati pionier nanga preikiman kan sreka sani foe doe moro ini a velddienst ini april.
6 Disi na, leki fa a gwenti de, a moen te tintin doesoen de ini a jepipionier dienst. April di pasa, dan wi ben abi 384 sma djaso ini Sranan di ben teki prati na a jepipionier dienst. Joe kan abi wan prati na dati ini april a jari disi? Efoe joe no man wroko leki jepipionier, dan sreka sani foe doe moro ini a preikiwroko, so leki fa joe situwâsi e gi pasi foe dati.
7 Bow warderi na tra sma: Ibri jari, foeroe sma di e sori belangstelling e kon makandra nanga oenoe na a Memrefesa. Foe eksempel, foe den 10.650.158 sma di ben fisiti a Memrefesa na a heri grontapoe april di pasa, moro leki 6.370.000 ben de sma di e sori belangstelling. Disi e sori taki a kan dati na organisâsi gro kon moro bigi.
8 Wi moesoe gebroiki den uitnodiging di na Genootschap druk èn pe disi de fanowdoe wi moesoe sreka sani foe go teki èn tjari den bijbelstudie èn den sma di abi belangstelling. De na wan switifasi èn de fajafaja te joe e kari den kon.
9 Jepi den foe kan si san ede a Memrefesa ben seti, soema e njan èn dringi foe den simbôl, èn san den simbôl wani taki (1 Kor. 11:23-26). Froeklari so srefi, na howpoe di den wan abi di e gebroiki den simbôl èn sortoe howpoe den sma abi di e loekoe nomo, di no e teki foe den simbôl (Joh. 10:16; Openb. 14:3, 4). Disi sa jepi sma di abi belangstelling, foe si dati ala sma moesoe foe ’sori bribi’ èn dati foe fisiti na Fesa foe Memre Krestes dede wan leisi wan jari, no nofo. — Joh. 3:16.
10 Na Fesa foe Memre Krestes dede de wan toemoesi aparti okasi. Foe di wi e sreka wisrefi dorodoro na tapoe, wi e sori dati troetroe wi e warderi ala san Jehovah nanga Krestes ben doe gi wi. Te wi e bow warderi gi na okasi disi na den bijbelstudie foe wi èn na tra sma di abi belangstelling, dan so srefi den sa feni jepi foe sori bribi ini na froeloesoe paiman di Jehovah ben gi nanga jepi foe Jesus Krestes.