A moro prenspari dé ini 1983
1 Omeni waarde na libi foe Jezus Kristus abi gi joe? Judas no ben warderi en moro foeroe leki na prijs foe wan srafoe, ma Jehovah ben si en wan enkri gebore Manpikin leki na moro diri sani foe heri en mekiwroko! En libisma-libi ben abi someni waarde dati a ben kan gebroiki foe ferloesoe na heri libismafamiri (1 Joh. 2:2). Disi ben moe kon nanga na dede foe en, wan foe den moro prenspari sani ini na libisma historia.
2 Foe dat-ede a de wan sani di fiti dati kristensma kisi na komando foe memre a sani dati na a fasi di Jezus srefi ben poti (1 Kor. 11:22-26). Na joisti datum foe na fesa disi no ben lasi, ma ben skrifi soifri èn tan kibri te now. Na jari disi na memrefesa e fadon na toedewroko, 29 maart, sodati na dé disi de a moro prenspari dé ini 1983. San joe kan doe foe meki na dé dati gi joe de na moro prenspari dé foe na jari? A prenspari fasi di ibriwan foe wi e gi na a memrefesa foe memre na dede foe Kristus, sa sori moro foeroe omeni waarde wi e gi na a ferloesoe ofrandi di a ben tjari foe na boen foe wi. — 1 Joh. 5:13.
Meki na warderi foe wi gi na dé kon moro bigi
3 Den jari di psa na Genootschap ben gi wan bijbellési-schema foe na wiki di e waka na fesi na memrefesa. Na heri schema tanapoe ini na wi Kownoekondredienst disi. Foe san-ede a jari disi joe no ben sa doe pikinso moro leki soso foe lési den pisi foe na bijbel? Son sma e feni en wan switi sani foe teki na ten foe na dé pe prakseri no sa poeroe, sodati den kan poti densrefi troetroe tapoe den sani di ben psa ini Jezus libi let bifo a dede foe en ben feni presi èn kan go prakseri dipi foe disi. Tra sma ben si taki den ben kan tjari den sani disi di ben psa kon libilibi ini den prakseri foe di nanga tapoe ai den ben arki na den pisi foe na bijbel di e pré tapoe den cassette-lolo foe na Genootschap (Ps. 63:6). Na a fasi disi den sani di ben psa e kon a libi èn den kan meki wan dipi marki sodati wi warderi e kon moro bigi. Sosrefi toe na Genootschap ben gi wan njoen schema foe na Avondmaal lezing di na jari disi a moro bigi pisi foe den takiman sa gebroiki en. Nanga disi den brada nanga sisa na a heri grontapoe sa kisi kowroe ati nanga den srefi prakseri na jeje fasi.
4 Séker disi de sosrefi toe wan joisti ten foe meki wan inventaris foe wi libi. Na warderi foe joe gi na ofrandi foe Kristus ben bewégi joe foe tjari den fanowdoe kenki kon ini joe libi sodati joe kan kisi en boen-ati? Na apostel Petrus ben taki foe Jezus: „Ensrefi ben tjari ini en égi skin wi sondoe na a oedoe, sodati gi wi a sondoe ben kon a wan kaba èn wi ben sa libi gi regtvaardikifasi” (1 Petr. 2:24). Te wi e prakseri foe wi libi, dan kande wi e si taki wi moe tjari bepaalde kenki kon foe na boen foe wi.
5 San wi kan taki foe na dé foe na memrefesa srefi? Son sma ben si taki na heri dé den ben kan gi na theocratis afersi. Den e bigin a dé foe di den e taki na détekst makandra nanga na heri osofamiri makandra ofoe den e doe disi den wawan èn disi e anga foe fa den omstandigheden de. Begi di e komoto foe na ati séker sa jepi wi foe kon ini na joisti jejefasi èn foe libi nanga dipi warderi go na a fesa foe na neti dati (Ef. 6:18). Son sma kande kan teki wan afoe dé fri foe den grontapoewroko ofoe srefi wan heri dé èn go ini na velddienst makandra nanga foeroe trawan foe Gado pipel di e meki na dé disi de wan spesroetoe dé foe anbegi.
6 Ini na moen april gewoonlek doesoen-doesoen sma e go ini na foeroeten dienst. A jari april di psa ini Sranankondre 158 jepi pionier ben de! Now di na memrefesa e fadon a jari disi na a kaba foe maart, a no ben sa de wan moi sani foe sori na opregti warderi foe wi gi na lobi seti foe Kristus ferloesoe ofrandi foe di wi e go ini a moen april ini na foeroeten dienst? A de now na ten foe aksi foe de wan foe den.
7 O moro a grontapoe a lontoe e go moro dipi ini ogridoe, wi moe meki a si taki wi de na sortoe foe sma „ini santa libifasi èn doe foe frede foe Gado” (2 Petr. 3:11). Meki wi meki now plan foe meki na pisi ten lontoe na memrefesa de wan ten pe wi e sori wi spesroetoe warderi gi san Jehovah ben doe nanga jepi foe na dede foe en Manpikin.