Prèise a fosi-gebore foe Jehovah!
1 Tapoe sonde, 9 Nisan 33 Gewoon Teri, wan bigi ipi sma di abi palm taki ini den anoe ben prèise a fosi-gebore Manpikin foe Jehovah, Masra Jesus Krestes, leki „a Sma di e kon leki a Kownoe ini a nen foe Jehovah!” (Lukas 19:38; Heb. 1:6) Tapoe moende nanga toedewroko, 10 nanga 11 Nisan, Jesus ben abi foeroe sani foe doe srefisrefi nanga en poebliki diniwroko, foe di en e meki den lasti dei foe en libi na grontapoe, den moro druk wan.
2 Ini a ten disi, wan moro bigi ipi sma nanga simbôlis palm taki ini den anoe e bari nanga wan tranga sten: „Froeloesoe wi kisi foe wi Gado, di e sidon tapoe a kownoestoeroe, èn foe a Pikin Skapoe” (Openb. 7:9, 10). Tapoe 26 maart, wi sa kon makandra foe hori a Memrefesa foe Krestes dede. Foe di a dei dati e kon moro krosibei, wi kan doe moro moeiti ini a diniwroko, èn na so wan fasi doe moro ini a bari foe prèise na heri grontapoe?
3 Doe moro ini a veld dienst: Foeroe preikiman ben gi den nen kaba foe wroko leki jepipionier ini maart. Joe ben sa wani foe moksi joesrefi nanga den? Efoe dati de so, dan gi joe pionier-formulier wantewante. Wan foe den owroeman sa breiti foe piki iniwan aksi di kande joe abi, di abi foe doe nanga a wroko.
4 Awinsi joe kan dini leki jepipionier noso no kan, joe sa wani foe abi wan dorodoro prati ini a diniwroko ini maart. Kande a gemeente ben sa kan foe seti sani foe gi groepoe-kotoigi ala dei ini a moen. Nofo gebied moesoe sreka foe man doe dati.
5 Ala gemeente moesoe seti sani foe kon makandra spesroetoe gi velddienst tapoe satra, 26 maart. Ala di foeroe sani de foe doe foe sreka gi a Memrefesa, wi e rikomanderi taki, ibri sma di man, moesoe teki prati ini a velddienst tapoe satra mamanten. Boiti taki joe e wroko oso foe oso, de seiker taki den wan di joe ben gi wan kari foe kon na a Memrefesa, abi vervoer, èn taki den abi a ten nanga a presi foe a konmakandra krinkrin na prakseri.
6 Kari trawan kon èn gi den deki-ati: Jesus ben gi den bakaman foe en a gebod: „Tan doe disi foe memre mi” (1 Kor. 11:24). Ala di den salfoe bakaman foe Jesus e gi jesi na a gebod dati, ibri foetoeboi foe Jehovah e kisi a kari foe fisiti èn foe poti prakseri na tapoe a Memrefesa. Na mindri foe trawan, joe moesoe kari bijbelstudenti, famiri, den sma nanga soema joe ben taki wan bijbel tori, patna di no de na bribi, nanga sma nanga soema joe e wroko makandra. Meki wan lijst so taki joe no pasa no wan sma.
7 Moro okasi sa de na a Memrefesa srefi, foe gi denwan di abi belangstelling deki-ati. De seiker foe doro drape froekoe, so taki joe man gi den njoen sma odi di e fisiti foe a fosi tron. Efoe difrenti foe joe bijbelstudenti de drape, a sa de joisti kande foe meki wan tra preikiman sidon nanga wan toe foe den te a konmakandra e hori. Gi den njoenwan wan kari foe fisiti den poebliki konmakandra foe a gemeente di wi gwenti foe hori. Na owroeman di den teki foe hori a poebliki taki, moesoe foe sreka boen foe hori wan lezing di e gi sma deki-ati.
8 Na a kaba foe a Memrefesa te wi e bondroe wi sten foe singi singi 105, „Prèise a Fosi-gebore foe Jehovah!”, dan meki a de so taki wi man loekoe go baka nanga satisfaksi na wan moen, di ben foeroe nanga theokrasia wroko foe prèise Jehovah!