Sreka den bijbelstudenti gi a diniwroko
1 A moro prenspari marki te wi e hori bijbelstudie, na foe meki njoen disipel, wrokoman di sa teki prati nanga wi foe gi trawan leri (Mat. 28:19, 20). So boen, a marki foe a studie a no foe gi sabi nomo; safrisafri a moesoe kweki opregti bribi ini den studenti foe wi èn moesoe sreka den foe prati a howpoe foe den nanga trawan (2 Kor. 4:13). Na sortoe praktis fasi wi kan jepi den foe tron bekwaam foe gi trawan leri? — 2 Tim. 2:2.
2 Poti a diniwroko leki wan marki: Na a bigin srefi, meki a kon na krin, taki troe anbegi wani taki toe foe „meki bekenti na poebliki foe kisi froeloesoe” (Rom. 10:10). A nen foe wi srefi, Jehovah Kotoigi, wani taki dati wi moesoe taki nanga trawan. Jepi den foe si taki a leri di den e kisi a no gi den eigi froeloesoe nomo. Te densrefi tron sma di e gi leri, dan denwan di e arki den, sa abi na okasi toe foe kisi froeloesoe. — 1 Tim. 4:16.
3 Loekoe sjatoe baka san joe ben leri: Wan warti jepisani foe gi leri, na foe hori wan sjatoe loekoe baka foe san joe ben leri baka ibri pisi ten. Den e jepi a studenti foe gro na jejefasi te njoen waarheid tori di a leri e fasi ini en froestan nanga ini en ati. Wisrefi ben ondrofeni disi te wi e gi piki tapoe den aksi foe na sjatoe loekoe baka di de wan pisi foe a Waktitoren-studie toe. Sreka eenvoudig krin aksi gi joe studenti foe meki a gi piki nanga en eigi wortoe.
4 Na sjatoe loekoe baka ben kan de leki wan situwâsi ini a velddienst. Poti wan aksi noso sori wan situwâsi di wi gwenti foe miti te wi e gi tra sma kotoigi. Meki a studenti sori san a ben o taki ala di joe na a ososma. Prèise en gi den sani di a ben doe boen, èn gi en praktis rai di sa jepi en foe abi moro boen bakapisi wan tra leisi. A leri disi di a kisi, sa leri en fa foe gebroiki den sani di a ben leri èn sa meki en kon bekwaam foe gebroiki bijbel.
5 Taki-go-taki-kon-boekoe: Sorgoe taki a studenti foe joe abi wan eksemplaar foe a Taki-go-taki-kon-boekoe, èn leri en foe gebroiki a boekoe. Sori en fa a boekoe e gi rai foe bigin takimakandra, foe gi piki tapoe bijbelaksi, noso fa foe doe nanga gens-taki. Gebroiki a boekoe na a studie foe sori den fasi fa foe taki nanga tra sma na wan overtoigi fasi. A boekoe disi kan bow a froetrow foe a studenti, meki a wani di a wani foe meki a Kownoekondre boskopoe bekènti kon moro tranga.
6 Poti krakti na tapoe o prenspari den konmakandra de: Den gemeente konmakandra, spesroetoe a diniwroko-konmakandra nanga a theokrasia diniwroko-skoro, seti foe sreka wi gi velddienst. Denwan di abi ondrofeni èn di de bekwaam e hori wan sjatoe loekoe baka foe den prenspari sani foe gi kotoigi na wan fasi di abi boen bakapisi èn den e demo den. Poti krakti na tapoe o prenspari den konmakandra de, èn doe san joe man foe jepi en foe fisiti den konmakandra. Te a e fisiti den doronomo, dan dati kan gi a studenti foe joe a deki-ati di a abi fanowdoe foe tron wan troe disipel foe Jesus.
7 Wan sani di joe no moesoe frigiti, na joe eigi persoonlijk eksempre. A wani di joe abi foe go ini a preikiwroko doronomo, sa sori a dipi warderi di joe abi gi a waarheid. So wan fasi foe handri e gi a studenti foe joe deki-ati foe doe moro foe sori a bribi foe en (Luk. 6:40). Ala den sani disi kan jepi wan njoen sma foe si a diniwroko leki wan grani, èn foe a de tangi taki a abi wan prati na ini. — 1 Tim. 1:12.