Persoonlijk studie—Wan afersi di wi moesoe poti prakseri na tapoe
1 Sortoe sani e gi wi reide foe poti serjoesoe prakseri na tapoe? Wi moesoe doe troetroe moeiti foe bow èn foe hori wan krosibei matifasi nanga Jehovah. Persoonlijk studie e plèi wan bigi ròl ini a kweki di wi e kweki so wan krosibei matifasi. Ini a ten disi a no foeroe foe wi abi den situwâsi di e gi pasi taki wi kan gi foeroe ten na a prakseri di wi e prakseri dipi foe sani èn na persoonlijk studie. Tokoe, efoe wi no e leisi a Wortoe foe Gado doronomo, wi kan kon so swaki taki wi no abi a krakti moro foe kakafoetoe gi a jeje nanga den skin lostoe foe grontapoe.
2 Kweki wan angri gi a Wortoe: Di wi fosi ben leri foe den prakseri foe Gado, dan kande wi ben de fajafaja foe kisi moro sabi. Ma baka wan pisi ten, na angri foe wi gi njanjan na jeje fasi kon moro mendri kande. A kan de fanowdoe foe „kweki angri” gi njanjan na jeje fasi (1 Petr. 2:2). Fa wi kan kweki so wan angri?
3 A switi smeri di e kon foe njanjan di wi lobi sa meki taki wi e kisi moro angri, foe di wi e memre taki a njanjan dati switi. Sjatoe pisi ten gi persoonlijk studie kan abi a srefi krakti na wi tapoe, ma now na wan jejefasi. Efoe wi e njanboen foe wan pikinso switi njanjan na jeje fasi, dan dati kan gi wi angri foe den moro dipi sani foe waarheid. A satisfaksi di e kon foe di wi e leri, kan gi wi deki-ati foe go moro dipi ini a Wortoe foe Jehovah.
4 Kweki wan routine di e wroko moro boen gi joe: Son sma e poti wan heri neti na wan sei foe doe persoonlijk studie, ala di trawan e froekisi foe studeri moro sjatoe èn foe doe dati moro foeroe tron. Efoe joe feni taki joe kan poti joe prakseri na tapoe sani moro boen te a de froekoe mamanten, dan joe kan bosroiti foe studeri bifo joe e gebroiki joe mamanten njanjan. Efoe joe kan poti joe prakseri na tapoe sani moro boen te neti, dan joe kan froekisi foe studeri bifo joe e go sribi te neti. Awinsi san na joe situwâsi, a prenspari sani de foe studeri na wan fasti ten èn foe hori joesrefi na a routine di moro boen gi joe.
5 Te wi e kisi deki-ati foe doe moro persoonlijk studie, dan kande wi de esi-esi foe taki dati a schema foe wi foeroe kaba. Ma wi alamala moesoe de eerlijk te wi go loekoe baka fa wi e gebroiki a ten foe wi. Wi e gebroiki foeroe joeroe ibri dei, foe di wi e loekoe telefisi programa? Wi de klariklari foe libi wan toe sani na baka di wi lobi foe doe? Efoe troetroe wi e go ondrosoekoe fa wi e gebroiki a ten foe wi, dan dati sa sori taki ibri dei momenti de, di wi kan gebroiki moro boen foe doe persoonlijk studie.—Ef. 5:15, 16.
6 Wi moesoe poti ala wi prakseri na tapoe a studie foe Gado Wortoe. Efoe wi e proeberi foe doe tra sani na a srefi ten, dan dati sa meki taki wi no abi so foeroe boen bakapisi. Efoe wi abi a gwenti foe studeri ala di wi e njan, e arki radio noso e loekoe telefisi, dan kande wi no sa meki san wi e proeberi foe leri, kon de wan pisi foe wi (1 Tim. 4:15). So boen, a de fanowdoe foe poeroe ala sani na pasi di kan poeroe wi prakseri.—Loekoe a Handleiding-boekoe, bladzijde 33-34.
7 A studeri di wi e studeri bijbel ibri dei èn a gebroiki di wi e gebroiki bijbel rai de prenspari, bikasi dati na a fasi fa wi e kisi tiri foe Jehovah. Meki a kon tron wan marki foe joe foe teki a waarheid poeroe foe den bodoi di skrifi tapoe den bladzijde di druk èn meki den go na ini joe ati. Meki boen gebroiki foe ibri okasi, a no abi bisi o sjatoe a de, foe leisi, foe go loekoe sani sjatoe baka noso foe prakseri dipi foe sani na jeje fasi.—Deut. 6:6-8; Kol. 1:9, 10.