De wan sma di e bow trawan

¹ Foe di wi e libi na ini „moeilek ten di de tranga foe pasa”, meki wi alamala abi deki-ati fanowdoe (2 Tim. 3:1). Foe di Paulus ben sabi heri boen taki, srefi na ini a ten foe en, a sani disi ben de fanowdoe, meki a ben broko en ede fa foe gebroiki a demakandra di a ben abi nanga en brada leki wan okasi foe „gi deki-ati a wan na a trawan”. A ben gi en brada tranga foe „feti baka den sani . . . di e bow makandra” (Rom. 1:11, 12; 14:19). Den moeiti disi di a ben doe ben abi boen bakapisi, foe di „den sili foe den disipel ben kon tranga, ala di den ben gi den deki-ati foe tan na ini a bribi” (Tori. 14:22). Wi abi a sortoe foe deki-ati dati troetroe fanowdoe na ini a ten disi.

² Wi kan bow trawan nanga den sani di wi e taki. Te wi e gebroiki den wortoe di wi e taki na wan joisti fasi, dan den kan de „leki gowtoe apra na ini solfroe kerfoe wroko” (Odo 25:11). Efoe wi abi wan prati na den konmakandra, dan wi e „gi makandra deki-ati” (Hebr. 10:25). Wi kan gebroiki wi tongo na wan positief fasi te wi e froeteri trawan ondrofenitori foe wi, e prèise den, noso e taki foe jeje afersi. Efoe wi e gebroiki wi tongo na so wan boen fasi, dan a ’de boen foe bow trawan, èn foe prati san de boen nanga den arkiman’.​—Ef. 4:29.

³ Taki foe sani di e bow trawan: Na Filipisma 4:8, Paulus ben gi tirilin di kan jepi wi na ini den sani di wi e taki. A ben taki dati wi moesoe poti prakseri na tapoe ala sani di de troe, di de foe serjoesoe belang, di de regtfardiki, di de krin, di switi, di sma e taki boen foe en, di abi boen maniri, èn ala sani di de foe prèise. Efoe den sani di wi e taki gron tapoe Gado Wortoe, dan wi kan de seiker taki den sani di wi e taki sa de troe èn boen gi trawan (Joh. 17:17). A gi di wi gi wisrefi abra na Gado leki kresten, den sani di wi e leri na den gemeente konmakandra, a fasi fa wi e doe wi diniwroko dorodoro, nanga tra sani leki disi, na afersi di wi moesoe denki dipi foe den. Positief takimakandra foe den markitiki nanga den gronprakseri foe Gado Wortoe seiker sa jepi wi foe kon „koni foe kan kisi froeloesoe” (2 Tim. 3:15). Wi kan taki foe a warderi di wi e warderi a krin fasi fa den wan na ini a krin organisâsi foe Jehovah e tjari densrefi. Wi kan prèise den switi sani di den brada foe wi e doe foe boen-atifasi ede (Joh. 13:34, 35). Sani di sma e taki boen foe den abi na ini toe den boen kresten eigifasi foe bribi, prisiri, vrede nanga langa pasensi di wi e si na ini wi brada. A taki di wi e taki nanga makandra foe den sani disi de ‘boen foe bow’ trawan.​—Rom. 15:2.

⁴ Ibri dei, wi e toeka nanga den kwinsi foe a grontapoe, di e meki wi lasi-ati. Wi e kisi kowroe-ati srefisrefi te wi kan poti den sani disi na wan sei èn abi lobi demakandra nanga wi brada. A ten di wi kan de nanga makandra èn di abi foeroe waarde, na wan goedoe di wi moesoe si leki wan warti sani. Efoe wi na sma di ala ten e gi trawan deki-ati èn di e bow trawan toe, dan trawan sa kan taki troetroe foe wi: „Den gi mi jeje kowroe-ati.”​—1 Kor. 16:18.