LES 34
Taki sani di e meki sma firi bun
A BOSKOPU di wi musu tyari gi sma, na bun nyunsu trutru. Yesus ben taki: „A bun nyunsu musu preiki na ini ala kondre fosi” (Mark. 13:10). Yesus srefi ben gi na eksempre fu di a ben fruteri fu „a bun nyunsu fu Gado kownukondre” (Luk. 4:43). Bijbel e taki tu fu a sani di den apostel ben preiki, leki „a bun nyunsu fu Gado” nanga „a bun nyunsu fu a Krestes” (1 Tes. 2:2; 2 Kor. 2:12). So wan boskopu e gi sma krakti èn a e meki den firi bun.
Wi e agri nanga a „têgo bun nyunsu” di wan ’engel di e frei na mindrisei fu hemel’ e meki bekènti. Fu dati ede wi e gi sma tranga: „Frede Gado èn gi en glori” (Openb. 14:6, 7). Na ala presi wi e fruteri sma fu a tru Gado, fu en nen, fu den moi fasi di a abi, fu den wondruwroko di a du, fu a moi sani di a abi na prakseri, fu a frantwortu di wi abi na en, èn fu san a e aksi fu wi. A bun nyunsu wani taki tu taki Yehovah Gado sa pori den ogriwan di no e lespeki en kwetikweti èn di e pori a libi gi tra sma tu. Ma a no de na wi fu krutu den sma gi suma wi e preiki. A sani di wi wani trutru na taki furu sma sa piki bun tapu a Bijbel boskopu. Disi sa meki taki a bun nyunsu trutru sa de wan bun boskopu gi den.—Odo 2:20-22; Yoh. 5:22.
No taki tumusi furu fu tori di e meki sma lasi-ati. A no de fu taki, dati a libi abi sani di e meki sma lasi-ati. Wi no e du neleki wi no e si den sani disi. Te yu wani bigin wan takimakandra, dan yu kan kari wan problema di sma na ini yu kontren sabi, èn yu kan taki syatu fu a problema dati. Ma furu tron a no bun fu taki tumusi langa fu soso a problema wawan. Doronomo sma e yere nyunsu di e meki den lasi-ati, sobun efu yu e taki fu sani di no switi fu yere, dan dati kan meki den tapu den doro noso tapu den yesi gi yu. Te yu bigin taki nanga wan sma kaba, dan so esi leki yu man, yu musu pruberi fu meki a sma si den moi tru tori di skrifi na ini Gado Wortu (Openb. 22:17). Baka dati, srefi efu a sma no wani taki moro fara, dan toku yu libi wan sani na baka di a kan go sidon prakseri fu en èn di kan meki en firi bun. Disi kan meki taki wan tra leisi a sa wani yere moro fu a tori.
A srefi sani wi kan taki tu te yu kisi a kari fu hori wan lezing. No fruteri den arkiman wan lo tori di e meki den lasi-ati, nomo fu di den tori dati lai. Efu wan takiman e taki bun langa fu libisma di no man tiri bun, fu ogridu, èn efu a e fruteri doronomo fa furu sma e du hurudu, dan dati kan meki taki den arkiman lasi-ati. Soso te yu sabi seiker taki yu sa taki wan bun sani te fu kaba, dan yu kan kari wan tu problema na ini yu lezing. Efu yu kari wan tu problema nomo, èn yu no e taki tumusi furu fu den, dan yu lezing kan de soifri san den arkiman abi fanowdu. A problema kan sori tu san na den prenspari sani di e meki wan spesrutu situwâsi opo kon. Na so fasi yu kan gebroiki dati fu sori fu san ede a fasi fu Bijbel na a moro bun fasi fu lusu a problema. Pe dati kan, dan kari den problema langalanga sondro fu go taki tumusi furu fu den.
Furu tron te yu e hori yu lezing, dan yu no sa man puru ala takru pisi fu wan tori, èn a no ben o bun fu du dati tu. A tranga wroko di yu abi na fu moksi den bun sani nanga den takru sani na so wan fasi, taki te fu kaba a heri tori fu yu e meki den arkiman firi bun. Fu man doro disi, dan yu musu sabi san yu musu taki, san yu no musu taki, èn tapu sortu sani yu musu poti krakti te yu e taki. Na ini a Bergitaki, Yesus ben frumane den arkiman fu en fu no du neleki den Fariseiman nanga den leriman fu Wet, di ben denki densrefi wawan. A ben kari wan tu eksempre fu sori san a ben wani taki nanga dati (Mat. 6:1, 2, 5, 16). Ma Yesus no ben fruteri soso fu den sani di den kerki tiriman dati no ben du bun. Na presi fu dati, dan Yesus ben poti moro krakti tapu a frustan di wan sma musu frustan san Gado wani de èn taki wan sma musu libi akruderi den sani dati (Mat. 6:3, 4, 6-15, 17-34). A sani di Yesus du, ben abi kefalek bun bakapisi.
Meki sma firi bun nanga a fasi fa yu e taki. Efu yu musu hori wan lezing na ini yu gemeente pe yu sa taki fu sani di wi musu du leki Kresten, dan meki muiti fu gi den arkiman deki-ati, na presi fu sori den tapu den fowtu nomo. Sorgu taki yusrefi e du den sani di yu e gi trawan deki-ati fu du (Rom. 2:21, 22; Hebr. 13:7). Te yu e taki sani, dan du dati fu di yu lobi den arkiman, èn no fu di yu e mandi nanga den (2 Kor. 2:4). Efu yu abi na overtoigi taki den brada nanga sisa fu yu wani plisi Yehovah, dan yu sa sori disi nanga den sani di yu e taki, èn den sa kisi trutru winimarki fu dati. Luku fa na apostel Paulus ben sori na overtoigi disi, soleki fa dati skrifi na 1 Tesalonikasma 4:1-12; 2 Tesalonikasma 3:4, 5; nanga Fileimon 4, 8-14, 21.
Sontron a de fanowdu taki owruman musu warskow den brada gi fasi fu libi di no bun. Ma efu den owruman abi sakafasi, dan disi sa yepi den fu taki nanga den brada na wan safri-ati fasi (Gal. 6:1). A fasi fa den owruman sa taki sani, musu sori taki den e lespeki ala sma na ini a gemeente (1 Petr. 5:2, 3). Bijbel e gi yonkuman rai, taki den musu luku bun trutru fa den e taki sani (1 Tim. 4:12; 5:1, 2; 1 Petr. 5:5). Te a de fanowdu fu gi piri-ai, fu gi trangaleri, fu poti sani reti, dan disi musu pasa soifri leki fa Bijbel srefi e taki (2 Tim. 3:16). Noiti wan takiman musu gebroiki wan bijbeltekst nomo fu meki dati horibaka gi san ensrefi e denki fu wan tori. Srefi te wan takiman musu gi rai fu di a wani poti sani reti baka, dan toku a sa musu taki na wan fasi di e meki den arkiman firi bun. Disi a kan du fu di a e poti krakti tapu fa wi kan sorgu taki wi no go du ogri sani, fa wi kan lusu problema, fa wi kan pasa wan tranga ten, fa wi kan kenki wan fasi fu libi di no bun, èn fa den sani di Yehovah e aksi wi, e kibri wi.—Ps. 119:1, 9-16.
Te yu e sreka yu lezing, dan prakseri bun san yu sa taki na a kaba fu ibri prenspari pisi fu yu lezing, èn san yu sa taki na a kaba fu a heri lezing. Furu tron, dan na den sani di yu e taki leki lasti, na den sani dati den arkiman o memre langa ten ete. Den sani dati sa meki den firi bun?
Te yu e taki nanga tra bribiman leki yu. Futuboi fu Yehovah e warderi den okasi di den abi fu de makandra nanga tra Kresten na den konmakandra. Disi na ten di e gi den krakti baka fu anbegi Gado. Bijbel e gi wi deki-ati fu hori na prakseri „fu gi makandra deki-ati” te wi e kon makandra na wi presi fu anbegi (Hebr. 10:25). Disi wi kan du te wi e hori lezing èn te wi e gi komentaar, ma sosrefi te wi e taki nanga makandra bifo èn baka den konmakandra.
Aladi kande a fosi sani di wi o taki nanga makandra na sani di e pasa nanga wi na ini wi libi fu ala dei, toku wi e kisi moro furu deki-ati te wi e taki fu tori di abi fu du nanga na anbegi fu wi. Wi kan fruteri makandra ondrofenitori fu den prisiri sani di wi e miti na ini wi santa diniwroko. Te wi e sori tu taki wi wani sabi moro fu makandra fu yepi makandra trutru, dan dati na wan sani di e gi krakti tu.
Wi musu luku bun taki a grontapu lontu wi, no abi krakti tapu wi. Di Paulus ben skrifi den Kresten na ini Efeise, dan a ben taki: „Now di unu no e lei moro, dan ibriwan fu unu musu taki tru te unu e taki nanga trawan” (Ef. 4:25). Fu taki tru na presi fu taki lei, wani taki sosrefi fu no gi glori na sani nanga sma di grontapu e si leki gado. Na so Yesus ben warskow tu gi „a bedrigi fasi fu gudu” (Mat. 13:22). Sobun, te wi e taki nanga makandra, dan wi musu luku bun fu no gi sma deki-ati fu go suku den gudu disi fu di wi e meki den gersi moro kefalek leki fa den de trutru.—1 Tim. 6:9, 10.
Na apostel Paulus e gi wi a rai fu meki trawan firi bun nanga den sani di wi e taki. Di a ben gi a rai dati, dan a taigi wi fu no krutu noso lagi wan brada di no e du wan tu sani fu di a „swaki na ini a bribi”, noso fu di a no e frustan ala sani ete di wan Kresten mag du. Fu tru, efu wi wani meki trawan firi bun te wi e taki nanga den, dan wi musu hori na prakseri fa den sma de, fu pe den komoto, èn o furu den gro kaba na ini a bribi. A ben o de wan trutru sari tori, efu wi ’ben o poti wan sani fu meki wi brada [noso sisa] naki futu fadon’.—Rom. 14:1-4, 13, 19.
Te wan sma e feti nanga wan seryusu problema, soleki te wan sma siki so kefalek taki a no sa man kon betre moro, dan a e warderi wan takimakandra di e gi en krakti. Kande so wan sma e meki furu muiti fu kon na den konmakandra. Den sma di sabi disi, kan aksi en: „Fa yu e firi?” Sondro tweifri, a sa warderi en taki trawan wani sabi fa a e go nanga en. Ma kande a no e feni en wan prisiri sani fu taki nomonomo fu a siki fu en. Efu yu ben o sori taki a warti furu èn efu yu ben o prèise en, dan dati kan du moro fu meki en ati sidon. Yu e si taki a lobi Yehovah ete? Yu e si taki a e horidoro na ondro wan muilek situwâsi? Yu e kisi deki-ati te a e gi wan komentaar? Kande yu kan sori tapu den sani di a e du bun èn sani di a e du gi a gemeente, na presi fu sori tapu san a no man du. Yu no denki taki dati ben o moro bun?—1 Tes. 5:11.
Efu wi wani taki den takimakandra fu wi e meki trawan firi bun, dan a de trutru prenspari taki wi luku san Yehovah e denki fu a tori di wi e taki nanga a tra sma. Na ini Israel fu owruten, dan den wan di ben krutu den sma di Yehovah ben poti fu teki presi gi en, èn den wan di ben kragi fu a mana, ben kisi wan strafu fu Gado di no ben switi kwetikweti gi den (Num. 12:1-16; 21:5, 6). Wi e sori taki wi kisi winimarki fu den eksempre disi, te wi e sori lespeki gi den owruman èn te wi e warderi a yeye nyanyan di e kon nanga yepi fu a getrow èn koni srafu grupu.—1 Tim. 5:17.
Furu tron a no de wan problema fu feni bun sani fu taki te wi de makandra nanga wi Kresten brada. Ma toku, efu wan sma e taki soso fu sani di no bun, dan yu no musu draidrai fu taki fu tra sani di e meki trawan firi bun.
Awansi wi e preiki gi trawan, awansi wi e taki komoto fu a podium, noso awansi wi e taki nanga wi brada noso sisa, toku meki wi taki nanga koni. Te wi e du disi, dan nanga wi heri ati wi sa taki sani ’di bun, èn di e gi sma deki-ati te a de fanowdu; dan den sma di e arki wi, kan yere sani di bun gi den’.—Ef. 4:29.