Disriktkongres e gi sma wan kari di e hari den prakseri!—Dei foe dei prèise Jehovah nanga prisiri!
1 „Efoe a trompet no e piki krin, dan soema sa sreka ensrefi foe go na feti?” na apostel Paulus ben aksi (1 Kor. 14:8). A kari di ben gi na a „Prisiri Prèiseman”-distriktkongres ben de tranga èn krin? Ija, na so a ben de. ’Prèise Jehovah nanga prisiri èn ala dei’ ben de a boskopoe di ben hari sma prakseri! A kari disi ben boeweigi joe ati foe doe wan sani? A kongresprograma ben foeroe nanga krakti reide foe tan prèise Jehovah, a Kownoe foe têgo, doronomo.—Ps. 35:27, 28.
2 Den hemel di e meki sma kisi dipi respeki, e meki a glori foe Jehovah bekènti „a wan dei baka a tra dei” (Ps. 19:1-3). Efoe den mekisani di no abi libi èn di no abi sten foe taki, e prèise Jehovah doronomo, dan a no de so taki wi leki koni libisma moesoe firi taki wi moesoe opo wi sten foe prèise Jehovah ala ten gi den eigifasi foe en nanga den sani di a e doe, di joe no kan teki gersi nanga no wan tra sani? Soema e froedini en moro foe wi prèise en nanga prisiri leki a toemoesi boen Mekiman foe wi?—Ps. 145:3, 7.
3 Dei foe dei: A psalm singiman ben skrifi nanga jepi foe santa jeje: „Dei foe dei oenoe moesoe froeteri a boen njoensoe foe froeloesoe foe en. Bikasi Jehovah bigi èn a e froedini en taki wi prèise en foeroe” (Ps. 96:2, 4). A sani disi skrifi soso gi den pionier? Nôno! Dan a de so, taki disi wani taki dati wi alamala moesoe taki nanga trawan foe Jehovah, awansi pe èn o ten dati kan, srefi tapoe den dei te wi no e doe na oso-foe-oso diniwroko? Ija! A de tranga fanowdoe foe prèise Jehovah ala dei èn taigi trawan foe den sani di a seti foe froeloesoe sma. Sma moesoe sabi taki Jehovah na Kownoe foe Têgo èn taki En gi grontapoe tirimakti na a Manpikin foe En di kisi glori, Jesus Krestes. Lobi gi Jehovah nanga gi libisma sa meki taki wi e tan taki nanga sma foe a boskopoe disi èn foe den sani di a seti foe froeloesoe sma, awansi pe den sma de foe feni.—Ps. 71:15.
4 Ibri dei foe en diniwroko djaso tapoe grontapoe, Jesus Krestes ben gi a moro moi eksempre foe wan sma di e taki krinkrin taki a e prèise Jehovah. A ben taki: „Na poebliki mi e prèise joe, Tata, Masra foe hemel nanga grontapoe” (Mat. 11:25). Foe di Jesus ben handri akroederi den sani di a ben taki, dati meki a ben prèise Jehovah na poebliki awansi pe a ben de toe. Èn awansi pe den ipi-ipi sma ben kon makandra—awansi a ben de na ini den snoga, na a tempel na Jerusalem, na tapoesei foe wan bergi, noso na se-sjoro—Jesus ben prèise Jehovah. Efoe wi e waka finifini na ini den foetoestap foe Jesus, foe di wi e tan gi Jehovah glori ala dei baka doronomo na poebliki èn na ini den sani di wi e doe, dan wi sa ondrofeni prisiri, kolokoe bakapisi foe dati.
5 Gi piki tapoe a kari: Joe sa gi piki tapoe a kari foe prèise Jehovah na poebliki ibri dei? Memre, taki a no abi trobi o owroe joe de. Psalm 148:12 e kari jonkoeman, jongoewenke, owroe man, nanga boi foe prèise Jehovah. Jongoewan, joe sa prèise Jehovah na mindri den skoromati nanga den skoromeester noso skoromisi na ini a njoen skoro jari disi? Bigisma, a de so taki den sma nanga soema joe e wroko na joe wrokopresi e jere foe Jehovah nanga den sani di a abi na prakseri, te na okasi disi de foe joe taki nanga den? Wi alamala sa moesoe meki a taki di wi e taki foe Jehovah, tron wan pisi foe wi libi neleki fa wi abi foe bro èn abi foe njan ala dei. Srefi te den sma di no e ke nanga a boskopoe foe wi, no e arki wi, dan tokoe wan Sma de di e arki wi, èn en sa pai wi baka.—Mal. 3:16.
6 Foe di a kaba foe a sistema e kon moro krosibei, meki a kari e go na ala presi foe grontapoe: „Prèise Jah, oen pipel!” (Ps. 106:1) Meki a prèise di wi e prèise Jehovah, kon moro tranga dei foe dei, so taki ala sma sa sabi taki a Sma di nen Jehovah, En na a Moro Hei Wan foe heri grontapoe.—Ps. 83:18.