Den poti aparti foe de prisiri prèiseman na heri grontapoe
„Prèise Jah, oen pipel! Prèise En, o oen foetoeboi foe Jehovah, prèise a nen foe Jehovah.” — PSALM 113:1.
1, 2. (a) Soema warti foe kisi a fajafaja prèise foe wi, akroederi Psalm 113:1-3? (b) Sortoe aksi fiti foe poti?
JEHOVAH GADO na a Gran Kriaman foe hemel nanga grontapoe, wi Universeel Soeverein te ala têgo ten. A warti srefisrefi foe kisi a fajafaja prèise foe wi. Dati meki Psalm 113:1-3 e komanderi wi: „Prèise Jah, oen pipel! Prèise En, o oen foetoeboi foe Jehovah, prèise a nen foe Jehovah. Meki a nen foe Jehovah kisi blesi bigin foe now èn te ten di no skotoe. Foe pe son e opo te pe son e dongo den moesoe prèise a nen foe Jehovah.”
2 Leki Kotoigi foe Gado, wi e prisiri foe doe dati. Fa a de wan span sani taki heri esi Jehovah Gado sa meki taki a prisiri prèisesingi disi di wi e singi na ini a ten disi, foeroe a heri grontapoe! (Psalm 22:27) A sten foe joe de foe jere na ini a bigi groepoe singiman disi di de na heri grontapoe? Efoe dati de so, dan a moesoe meki joe kolokoe troetroe foe de aparti foe a grontapoe disi di prati èn di no abi prisiri!
3. (a) San e meki taki a pipel foe Jehovah de aparti? (b) Na sortoe fasi wi poti aparti?
3 A prèise di wi e prèise Jehovah na ini wánfasi, seiker e meki wi de aparti. Wi e taki èn wi e gi leri akroederi makandra èn e gebroiki den srefi fasi foe meki ’den boen-atifasi foe Jehovah di de pasa marki’ bekènti (Psalm 145:7). Ija, leki a pipel foe Jehovah di gi densrefi abra, wi poti aparti gi a diniwroko foe wi Gado, Jehovah. Gado ben taigi Israèl, en pipel foe owroeten di ben gi densrefi abra, foe hori densrefi aparti foe den nâsi di ben de lontoe den èn foe de krin foe den doe foe den nâsi dati (Exodus 34:12-16). A ben gi a pipel foe en wet foe jepi den foe doe disi. So srefi na ini a ten disi, Jehovah gi wi en santa Wortoe, bijbel. A leri di a gi e sori wi fa wi kan tan aparti foe a grontapoe disi (2 Korentesma 6:17; 2 Timoteus 3:16, 17). Wi no poti aparti foe di wi de sondro tra sma na ini klooster nanga oso pe non e tan, neleki den moniki nanga den non foe Babilon a Bigiwan. Foe di wi e waka baka na eksempre foe Jesus Krestes, meki wi de prèiseman foe Jehovah na poebliki.
Waka baka a Moro Prenspari Prèiseman foe Jehovah
4. Fa Jesus ben poti na eksempre ini a prèise di a ben e prèise Jehovah?
4 Jesus noiti ben lasi a marki di a ben abi na prakseri foe prèise Jehovah. Èn disi ben poti en aparti foe grontapoe. A ben prèise a santa nen foe Gado na ini den snoga èn na ini a tempel na Jerusalem. Jesus ben preiki foe den waarheid foe Jehovah na poebliki, awansi a ben de na tapoe na ede foe wan bergi noso na sekanti, èn awansi pe ipi sma ben sa kon makandra. A ben froeklari: „Mi e prèise joe na poebliki, Tata, Masra foe hemel nanga grontapoe” (Mateus 11:25). Srefi di Jesus ben kisi kroetoe na fesi foe Pontius Pilatus, a ben froeklari: „Na foe a sani disi ede mi gebore, èn na foe a sani disi ede mi kon na grontapoe, so taki mi ben sa moesoe gi kotoigi foe a waarheid” (Johanes 18:37). Jesus ben sabi o prenspari a wroko foe en ben de. Awansi pe Jesus ben de, a ben gi kotoigi foe Jehovah èn ben prèise en na poebliki.
5. Gi soema Psalm 22:22 e fiti, èn sortoe fasi foe denki wi moesoe abi?
5 Wi e feni a profeiti froeklari disi di abi foe doe nanga a Moro Prenspari Prèiseman foe Jehovah na ini Psalm 22:22: „Mi sa meki joe nen bekènti na mi brada; na mindri foe a gemeente mi sa prèise joe.” Èn na ini Hebrewsma 2:11, 12, na apostel Paulus e fiti den vers disi tapoe Masra Jesus èn tapoe den wan di Jehovah Gado meki kon santa foe kisi hemel glori. Neleki en, den no e sjen foe prèise a nen foe Jehovah na ini a gemeente. Wi abi a srefi fasi foe denki disi te wi e go na den gemeente konmakandra foe wi? A teki di wi e teki prati na den konmakandra na wan fajafaja fasi, foe di wi e poti prakseri, e gi komentaar èn e singi, e prèise Jehovah. Ma a prisiri prèise foe wi e kaba nanga dati?
6. Sortoe komando Jesus ben gi den disipel foe en, èn fa sma di lobi a leti e gi glori na Gado?
6 Soleki fa Mateus 5:14-16 e taki, dan Masra Jesus ben gi den bakaman foe en a komando toe foe meki a leti foe den skèin, so taki tra sma ben sa prèise Jehovah. A ben taki: „Oenoe na a leti foe grontapoe. . . . Meki oen leti skèin gi sma, so taki den kan si den boen wroko foe oenoe èn gi glori na oen Tata, di de na hemel.” Sma di lobi a leti e gi Gado glori. Den e doe disi foe di den e taki èn e doe boen sani nomo foe sori taki den lobi trawan? Nôno, na presi foe dati den e doe dati foe di den e gi Jehovah glori na ini wánfasi. Ija, sma di lobi a leti e gi densrefi abra na Gado èn e tron den prisiri prèiseman foe en. Joe teki a kolokoe stap disi kaba?
Wi de nanga prisiri foe di wi e prèise Jehovah
7. Foe san ede den prèiseman foe Jehovah de so nanga prisiri, èn sortoe prisiri den ben abi na a dei foe a Pinksterfesa foe 33 G.T.?
7 Foe san ede den prèiseman foe Jehovah de so nanga prisiri? Bika prisiri na wan froktoe foe a santa jeje foe Gado. Den e kari prisiri, leti baka lobi na ini Galasiasma 5:22. Den disipel foe Jesus na ini a fosi jarihondro, ben sori a froktoe disi foe a jeje foe Jehovah. Ija, na a dei foe a Pinksterfesa foe 33 G.T., di Gado ben kanti en jeje kon na tapoe so wan 120 foe den disipel foe Jesus, den alamala ben bigin prèise Jehovah na ini difrenti tongo. Lespeki djoe di ben kon na Jerusalem komoto na foeroe nâsi, ’ben froewondroe’. Den ben bari taki: „Wi e jere den e taki na ini den tongo foe wi foe den boen bigi sani di Gado doe!” (Tori foe den Apostel 2:1-11) San ben de a bakapisi foe a prèise disi di den ben prèise Jehovah na wan moi fasi na ini difrenti tongo? So wan 3000 djoe nanga djoe proselietsma ben teki a Kownoekondre boen njoensoe di abi foe doe nanga a Mesias. Den ben teki dopoe, ben kisi a santa jeje, èn na wan fajafaja fasi den ben poti den sten foe den toe leki prisiri prèiseman foe Jehovah (Tori foe den Apostel 2:37-42). Fa dati ben de wan blesi!
8. San den kresten ben doe baka a Pinksterfesa, foe meki a prisiri foe den kon moro bigi?
8 A verslag e go doro: „Ala dei den ben de doronomo ini wánfasi na a tempel, èn den ben njan den njanjan foe den na ini oso foe sma èn ben gebroiki a njanjan nanga bigi prisiri èn nanga opregti ati, èn ala den sma ben lobi den. Na a srefi ten, ala dei Jehovah ben tan tjari den wan di kisi froeloesoe, kon na den” (Tori foe den Apostel 2:46, 47). A ben de soso na abi di den ben abi demakandra èn a njan di den ben njan nanga makandra, di ben gi den bigi prisiri? Nôno, a prenspari reide foe a prisiri di den abi, na a prèise di den e prèise Jehovah Gado ala dei. Èn a prisiri foe den ben kon moro bigi di den ben si taki doesoendoesoen sma e doe wan sani tapoe a boskopoe foe froeloesoe foe den. A de a srefi nanga wi na ini a ten disi.
Prisiri prèiseman na ini ala nâsi
9. (a) O ten èn fa Gado ben bigin gi sma foe ala nâsi na okasi foe jere a boen njoensoe foe en? (b) Foe san ede santa jeje ben kanti kon na tapoe Kornelius nanga den kompe foe en bifo den ben teki dopoe?
9 Jehovah no ben wani taki a wroko foe den foetoeboi foe en foe tjari a leti, ben de soso gi wán nâsi nomo. Foe dati ede, sensi 36 G.T., a ben gi sma foe ala nâsi na okasi foe jere a boen njoensoe foe en. Na ondro a tiri foe Gado, Petrus ben go na a oso foe wan heiden legre ofsiri na Cesarea. Drape a ben feni Cornelius, di ben kon makandra nanga den moro krosibei mati nanga famiri foe en. Ala di den ben arki nanga ala prakseri na den wortoe foe Petrus, den ben sori bribi na ini Jesus na ini na ati foe den. Fa wi sabi dati? Bika a santa jeje foe Gado ben kon na tapoe den heiden bribiman dati. Soleki fa a gwenti de, dan a presenti foe a jeje foe Gado ben gi soso baka te wan sma teki dopoe, ma na a okasi dati Jehovah ben sori taki a ben feni den sma disi di no de djoe, boen, bifo den ben dopoe. Efoe Jehovah no ben doe dati, dan Petrus no ben kan de seiker taki now Gado ben e teki heiden leki En foetoeboi èn taki den ben doro den markitiki foe teki dopoe na ini watra. — Tori foe den Apostel 10:34, 35, 47, 48.
10. Fa a ben taki na fesi sensi owroeten taki sma foe ala nâsi ben sa prèise Jehovah?
10 Foe sensi owroeten, Jehovah ben taki na fesi taki sma foe ala nâsi ben sa prèise en. A ben sa abi prisiri prèiseman na ibri kondre. Foe boeweisi disi, dan na apostel Paulus ben teki profeititori skrifi foe den Hebrew Boekoe foe bijbel. A ben taigi na internationaal gemeente foe kresten na Rome: „Erken makandra . . . neleki fa Krestes ben erken wi, nanga a glori foe Gado na prakseri. Bika mi e taki dati Krestes troetroe ben tron wan bedinari foe den wan di besnij foe a getrowfasi foe Gado ede, so taki a ben kan meki den sani di A ben pramisi den afo foe den, kon troe, èn taki den nâsi ben sa kan gi Gado glori foe di a abi sari-ati. Soleki fa a skrifi [na ini Psalm 18:49]: ’Dati meki na poebliki mi sa erken joe na mindri den nâsi èn gi joe nen mi sa plèi pokoe.’ Èn ete wan tron a e taki [na ini Deuteronomium 32:43]: ’Prisiri, oen nâsi, nanga en pipel.’ Èn ete wan tron [na ini Psalm 117:1]: ’Prèise Jehovah, ala oen nâsi, èn meki ala pipel prèise en.’” — Romesma 15:7-11.
11. Fa Gado jepi sma foe ala nâsi foe leri waarheid foe en, èn san na a bakapisi?
11 Sma no kan prèise Jehovah na ini wánfasi, boiti efoe den poti a howpoe foe den na tapoe Jesus Krestes, a sma di Gado poti foe tiri sma foe ala nâsi. Foe jepi den foe froestan den waarheid foe en di e tjari sma go na têgo libi, dan Gado seti wan internationaal leri programa. A e gi tiri nanga jepi foe en getrow srafoe groepoe (Mateus 24:45-47). San na a bakapisi? Moro leki feifi miljoen prisiri sten e singi prèisesingi gi Jehovah na moro leki 230 kondre. Èn miljoenmiljoen sma moro e sori taki den abi belangstelling foe doe a srefi sani. Loekoe omeni sma ben kon na a Memrefesa na ini 1996: 12.921.933. A moi srefisrefi!
Den ben taki na fesi foe wan bigi ipi foe prisiri prèiseman
12. Sortoe span fisjoen na apostel Johanes ben si, èn san na a troetroe sani foe san a ben si?
12 Na apostel Johanes ben si na ini wan fisjoen „wan bigi ipi” komoto na ala nâsi (Openbaring 7:9). San na a prenspari tori foe den prèisesingi di a bigi ipi disi e singi makandra nanga a salfoe fikapisi foe Gado? Johanes e froeteri wi: „Tangi foe wi Gado, di e sidon na tapoe a kownoestoeroe, èn foe a Pikin Skapoe, meki wi kisi froeloesoe” (Openbaring 7:10). Sondro frede den e meki disi bekènti na ibri pisi foe grontapoe. Ala di wi e wai nanga palmtaki, foe taki en so, wi e prèise Gado na ini wánfasi leki na Universeel Soeverein èn nanga prisiri wi e erken na fesi hemel nanga grontapoe, taki „tangi foe” en nanga en Manpikin, a Pikin Skapoe, Jesus Krestes, „wi kisi” froeloesoe. O, fa a ben naki na ati foe na apostel Johanes foe si a span fisjoen disi foe a bigi ipi! Èn fa a e naki wi ati na ini a ten disi foe si a troetroe sani di Johanes ben si, èn foe de srefi wan pisi foe dati!
13. San e poti a pipel foe Jehovah aparti foe grontapoe?
13 Leki foetoeboi foe Jehovah, wi e feni en wan bigi sani foe tjari en nen (Jesaja 43:10, 12). A de di wi de Kotoigi foe Jehovah e meki taki wi de tra fasi foe a grontapoe disi. Fa a de wan prisiri sani foe tjari na aparti nen foe Gado èn foe abi a doe di wi e doe a wroko foe Gado leki a marki di wi poti na ini wi libi! A bigi prakseri di Jehovah abi foe meki en santa nen kon santa èn foe regtfardiki en universeel soevereiniteit nanga jepi foe a Kownoekondre, e meki taki a libi foe wi wani taki wan sani. Èn a jepi wi foe abi wan presi na ini a prakseri di a abi, di abi foe doe nanga en nen nanga en Kownoekondre. A doe disi na dri fasi.
Wi kisi a waarheid
14, 15. (a) San na wán fasi fa Gado jepi wi foe abi wan presi na ini a prakseri di a abi, di abi foe doe nanga en nen nanga en Kownoekondre? (b) Fa a Kownoekondre di ben opo na ini 1914 G.T., de tra fasi foe a wán di ben fadon na ini 607 b.G.T.?
14 Na a fosi presi, Jehovah gi en pipel a waarheid. A moro span sani di tjari kon na krin, na taki en Kownoekondre ben bigin tiri na ini 1914 (Openbaring 12:10). A hemel tiri disi de tra fasi foe na agersi kownoekondre na Jerusalem, pe den ben gwenti foe poti den kownoe na ini a lin foe David na tapoe a kownoestoeroe. A kownoekondre dati ben fadon, èn sensi 607 b.G.T., Jerusalem ben de krinkrin na ondro a tiri foe heiden grontapoemakti. A njoen Kownoekondre di Jehovah ben opo na ini 1914, na wan hemel makti di noiti no sa de na ondro no wan sma, leki Jehovah wawan, èn a no sa kisi pori (Danièl 2:44). So srefi, a tirimakti foe en de tra fasi. Fa? Openbaring 11:15 e piki: „Tranga sten ben de foe jere na ini hemel, e taki: ’A kownoekondre foe grontapoe ben tron a kownoekondre foe wi Masra èn foe en Krestes, èn a sa tiri leki kownoe foe têgo èn foe ala ten.’”
15 „A kownoekondre foe wi Masra èn foe en Krestes” abi makti na a heri grontapoe foe libisma. A njoen fasi disi foe sori a soevereiniteit foe Jehovah, di abi na ini toe en Mesian Manpikin nanga den 144.000 brada foe Jesus, foe soema a moro bigi pisi foe den kisi wan opobaka now foe kisi hemel glori, a no de soso wan sabidensi afersi — wan theoretis sani di studenti ben sa wani taki foe en. Nôno, a hemel Kownoekondre disi na wan troetroe tiri. Èn a kolokoe froewakti di wi abi foe libi foe têgo ini volmaaktifasi leki wan bakapisi foe a tiri foe en, e gi wi foeroe reide foe tan de nanga prisiri. Foe di wi kisi den sortoe waarheid dati foe a Wortoe foe Jehovah, dan ala ten a e boeweigi wi foe taki boen foe en (Psalm 56:10). Joe e doe disi doronomo foe di joe e froeteri ala sma taki a Mesian Kownoekondre foe Gado e tiri now na hemel?
Wi e kisi jepi foe a santa jeje èn foe wan bradafasi na heri grontapoe
16, 17. San na a di foe toe nanga a di foe dri fasi fa Gado jepi wi foe abi wan presi na ini a prakseri di a abi?
16 Wan di foe toe fasi fa Gado jepi wi foe abi wan presi na ini a prakseri di a abi, na foe gi wi en santa jeje, di e meki taki wi man meki den moi froktoe foe a santa jeje na ini wi libi èn feni a boen foe en (Galasiasma 5:22, 23). Moro fara, Paulus ben skrifi salfoe kresten: „Wi . . . ben kisi . . . a jeje di e kon foe Gado, so taki wi ben sa kan sabi den sani di Gado ben gi wi nanga switifasi” (1 Korentesma 2:12). Foe di wi e gi jesi na a jeje foe Jehovah, meki nownow wi alamala kan sabi èn froestan den boen sani di a gi wi na wan switi fasi na ini a ten disi — den pramisi foe en, den wet foe en, den gronprakseri foe en, èn so moro. — Teki gersi Mateus 13:11.
17 Foe taki foe a di foe dri fasi fa Gado e jepi wi, wi abi wi bradafasi na heri grontapoe èn a prisiri seti di Jehovah orga foe anbegi en. Na apostel Petrus ben taki foe dati di a ben froemane wi foe „abi lobi gi a heri brada libimakandra” (1 Petrus 2:17). Wi lobi-ati, internationaal famiri foe brada nanga sisa e jepi wi foe dini Jehovah nanga bigi prisiri foe ati, soleki fa Psalm 100:2 e komanderi wi: „Dini Jehovah nanga prisiri. Kon na en fesi nanga wan prisiri babari.” Vers 4 e taki moro fara: „Kon na ini den portoe foe en nanga tangi, na ini den fesi djari foe en nanga prèisesingi. Gi en tangi, blesi en nen.” So boen, awansi wi e preiki na poebliki noso e go na den konmakandra foe wi, wi kan abi prisiri. Fa wi feni vrede nanga seikerfasi na ini den moi fesi djari foe a jeje tempel foe Jehovah!
Prèise Jehovah nanga prisiri!
18. Foe san ede wi kan de nanga prisiri na ini a prèise di wi e prèise Jehovah awansi wi kisi froefolgoe noso tra problema?
18 Awansi sortoe moeilek situwâsi, froefolgoe, noso tra problema wi kisi kande, meki wi de nanga prisiri taki wi de na ini na oso foe Jehovah foe anbegi (Jesaja 2:2, 3). Memre taki prisiri na wan eigifasi foe na ati. Den fosi kresten brada nanga sisa foe wi ben de prisiri prèiseman foe Jehovah awansi den ben kisi foe doe nanga foeroe problema èn ben lasi foeroe sani (Hebrewsma 10:34). Den kompe bribiman foe wi na ini a ten disi de neleki den. — Mateus 5:10-12.
19. (a) Sortoe komando di gi ibritron baka e poesoe wi foe prèise Jehovah? (b) Foe san a têgo libi foe wi e anga, èn san na a fasti bosroiti foe wi?
19 Wi alamala di e dini Jehovah e prisiri foe gi jesi na den komando foe bijbel foe prèise en. Ibritron baka, a boekoe Openbaring e poti krakti na tapoe den prèise foe Gado nanga den wortoe „Prèise Jah!” (Openbaring 19:1-6) Na ini den siksi vers foe Psalm 150, den e taigi wi 13 leisi foe prèise Jehovah. Disi na wan universeel kari gi ala kriatoeroe foe moksi densrefi na ini a singi di den e singi prèisesingi gi Jehovah nanga prisiri. A têgo libi foe wi e anga foe a moksi di wi e moksi wisrefi nanga a bigi groepoe singiman disi di e singi Halelujah! Ija, den wan-enkri sma di sa libi foe têgo na den wan di e gi prèise na Jehovah sondro foe tapoe. Foe dati ede, wi abi a fasti bosroiti foe tai hori krosibei na en loyaal gemeente na heri grontapoe, foe di a kaba e kon krosibei. Dan wi kan howpoe foe si fa den lasti wortoe foe Psalm 150 kon troe dorodoro: „Ibri sani di e bro, meki a prèise Jah. Prèise Jah, oen pipel!”
San joe ben sa piki?
◻ San e meki taki a pipel foe Jehovah de aparti?
◻ Foe san ede den foetoeboi foe Jehovah de so nanga prisiri?
◻ San e poti wi aparti foe grontapoe?
◻ Na sortoe dri fasi Gado jepi wi foe abi wan presi na ini a prakseri di a abi?
[Prenki na tapoe bladzijde 17]
Awansi pe Jesus ben de, a ben gi kotoigi foe Jehovah èn ben prèise en na poebliki