Fa mi kan meki wan ososma arki?
1 Na ini a foto foe Filipi, „wan seiker oema di ben nen Lydia, di ben e seri purper krosi, . . . ben e arki, èn Jehovah bradi opo en ati foe poti prakseri tapoe den sani di Paulus ben e taki” (Tori. 16:14). San a verslag disi e leri wi? Na arki di wan ososma e arki, na a sani di e opo a pasi gi en foe leri waarheid. Den boen bakapisi foe wi foe prati a Kownoekondre boskopoe, e anga foeroe tron foe a wani di na ososma wani foe arki. Te wan sma e arki wi kaba, a moro makriki foe pristeri a boskopoe foe wi, dan te wi moesoe kisi en foe arki. Ma foe kisi wan sma foe arki, kan de wan tjalensi. San wi kan doe?
2 Fosi wi abi wan prati na ini a diniwroko, wi moesoe poti prakseri tapoe den krosi di wi e weri èn a fasi fa wi e sorgoe wisrefi èn den sani di wi abi na wi. Foe san ede? Sma e wani arki moro foeroe na wan sma di e pristeri ensrefi tapoe wan warti fasi. Wi e weri krosi di fiti èn tokoe de bescheide? Ala di sjabisjabi krosi kan de pôpi na ini grontapoe, tokoe wi e kibri wisrefi gi den sortoe no-ke-fasi, foe di wi na dinari di e teki presi gi a Kownoekondre foe Gado. Den krin krosi di wi e weri, èn a sorgoe di wi e sorgoe wisrefi e gi wan boen kotoigi foe a Kownoekondre boskopoe di wi e preiki.
3 Abi switifasi èn lespekifasi: Ala di den fasi fa sma e si sani na ini a ten disi e kenki, tokoe foeroe sma abi lespeki gi bijbel ete èn sa piki na wan boen fasi tapoe wan lespeki nanga switi takimakandra foe sani di de na ini bijbel. Wan waran, opregti lafoe kan meki na ososma firi boen èn e opo a pasi gi wan prisiri takimakandra. Na opregtifasi nanga den boen maniri foe wi, moesoe sori densrefi na a fasi fa wi e taki èn na a fasi fa wi e tjari wisrefi, san abi na ini toe na arki di wi e arki nanga lespeki na den sani di na ososma e taki.
4 A marki foe wi na foe prati a howpoe foe bijbel nanga trawan. Nanga disi na prakseri, wi moesoe de seiker taki a takimakandra foe wi e hari a prakseri èn a no moesoe abi feantifasi noso tjalansifasi na ini. A no de fanowdoe foe lasi ten foe hari go hari kon nanga wan sma di e kakafoetoe krinkrin (2 Tim. 2:23-25). Wi kan teki pristeri poeroe di e gi deki-ati èn di fiti foe den foeroe difrenti pristeri, di Wi Kownoekondre Dienst nanga a Redeneren-boekoe e gi wi. A no de foe taki, dati wi moesoe sreka wisrefi boen tapoe den pristeri disi, so taki wi kan taki na wan waran fasi èn nanga overtoigi. — 1 Petr. 3:15.
5 Baka a fosi fisiti foe wi foeroe sma no man memre finifini san wi ben taki. Ma pikinmoro alamala kan memre a fasi fa a sani ben taki. Noiti wi moesoe si a krakti foe switifasi nanga boenfasi leki wan soso sani. Sondro tweifri, foeroe sma de na ini wi gebied di wi kan agersi nanga skapoe èn di sa arki waarheid leki fa Lydia ben doe dati na in a fosi jarihondro. Te wi e poti finifini prakseri tapoe a fasi fa wi e weri krosi èn e sorgoe gi wisrefi, èn so srefi a fasi fa wi e taki, dan dati kan gi den opregtiwan deki-ati foe arki a Wortoe foe Gado èn piki na wan boenfasi na tapoe. — Mark. 4:20.