Ten kon kenki
1 Bijbel e froeteri wi taki: „A fasi fa grontapoe disi tan e kenki” (1 Kor. 7:31). Fa dati de troe na ini a ten disi! Srefi na ini wi libiten, na ala sei foe a libimakandra wi si bigi kenki na ini a prakseri foe sma èn a fasi fa den e tjari densrefi. Efoe wi wani abi boen bakapisi te wi e tjari a Kownoekondre boskopoe gi den, dan wi moesoe tan fiti a fasi fa wi e pristeri a boskopoe na a ten di e kenki. Wi wani foe pristeri a boen njoensoe na tapoe so wan fasi, taki a e meki sma kisi belangstelling èn a e doro na ati foe den.
2 Foeroe jari pasa a ben de so taki, na ini foeroe kondre a kotoigi wroko ben difrenti, èn a moro prenspari reide ben de taki, sma ben abi wan moro korostoe libi èn ben abi seikerfasi. Relisi ben abi wan santa presi na ini a libi foe den. Sma ben si bijbel leki wan toemoesi warti sani. Na ini a ten dati, foeroe tron a gi foe kotoigi ben abi foe doe nanga boeweisi di ben sori fa sani di sma ben taki foe fondamenti leri, no de troe. Na ini a ten disi, a libi foe sma broeja. Sma e spotoe nanga relisi. Pikinso sma abi bribi na ini bijbel. Èn gi foeroe trawan, na evolutie leri pori den bribi na ini Gado.
3 Wan opziener di e rèis ben taki: „Na ini a ten disi, so foeroe problema nanga moeilek sani de na ini sma libi, taki wi abi foe leri den fa foe libi.” A no de foe taki, dati den fosi broko-ede foe sma abi foe doe nanga densrefi, den osofamiri, èn den sani di e meki den prakseri. Disi na den sani di den e taki foe moro foeroe te den miti makandra. Wi moesoe hori dati na prakseri na ini a preiki wroko foe wi.
4 A Kownoekondre foe Gado na a wan-enkri howpoe di de seiker gi a tamara: A moro bigi pisi foe sma no abi foeroe froetrow na ini libisma tiri. Den e denki taki wan froewakti, foe si wan moro betre grontapoe na ini a libiten foe den, no de. Falsi relisi no man gi den no wan reide foe abi howpoe. Foe dati ede, a moro bigi fanowdoe foe a libisma famiri, na foe jere a boen njoensoe foe a Kownoekondre foe Gado. Sori fa, te foe kaba, a sa loesoe ala den problema di libisma abi foe kakafoetoe gi.
5 Bijbel na a wan-enkri fonten foe gi tiri èn di joe kan froetrow: Na ini a ten disi, tiriman ben bidrigi boen foeroe sma di e froetrow na tapoe libisma koni èn na tapoe den filosofia foe grontapoe. Sma moesoe kon froestan ete taki „a no de na wan man di e waka srefi foe poti en foetoe na pasi” (Jer. 10:23). A moro prenspari sani di den kan leri, na taki den moesoe ’froetrow na tapoe Jehovah nanga den heri ati èn no anga tapoe den eigi froestan’ (Odo 3:5). Ala di ten kon kenki, bijbel no kenki. Foe dati ede, ala ten wi moesoe poti prakseri na tapoe Gado Wortoe na ini a diniwroko foe wi, èn leri trawan foe warderi a tiri di Gado e gi nanga jepi foe en Wortoe, di en santa jeje e horibaka gi (2 Tim. 3:16, 17). Foe doro a marki dati, wi moesoe tan sori sma a prensparifasi foe bijbel, foe di wi e sori go na tapoe na ini den pristeri foe wi, foe di wi e gebroiki en foe piki den aksi foe den, èn foe poti krakti tapoe a fanowdoe foe studeri en èn foe fiti a praktis koni foe en.
6 Srefi na ini a ten disi pe sani e kenki, den marki foe wi na ini a diniwroko e tan a srefi. Wi moesoe preiki a boen njoensoe foe a Kownoekondre, bow wi froetrow na ini Gado Wortoe, èn jepi trawan foe si a fanowdoe foe studeri bijbel nanga wi. Den sani di wi e taki moesoe kroederi nanga den fanowdoe foe den wan di wi e gi koitoigi. Te wi e doe so, dan wi kan tron sma di e prati a boen njoensoe nanga trawan èn na so wan fasi, hari a belangstelling foe a moro bigi pisi foe sma. — 1 Kor. 9:19, 23.