Aksi boksoe

◼ San wi kan doe foe jepi foe meki den konmakandra foe wi waka moro boen?

Wan toe sma e denki kande, taki den owroeman nanga den dinari ini a diniwroko na den wan-enkri sma di abi a frantiwortoe foe meki a konmakandra abi boen bakapisi, foe di na den e hori den èn e gi moro foeroe foe den lezing nanga tra pisi foe a konmakandra. Troetroe, wi alamala kan jepi persoonlijk foe meki a konmakandra de na wan fasi di e hari sma, èn taki a kan gi winimarki. Wi kan jepi foe meki den konmakandra waka moro boen tapoe den tin fasi di e kon now:

Sreka na fesi. Te wi e sreka boen, dan den konmakandra sa hori a belangstelling foe wi. Te wi alamala e doe disi, dan den konmakandra sa abi moro faja èn den sa bow wi moro. De drape doronomo. A e gi moro deki-ati te wan hei nomroe foe sma de na den konmakandra èn a e tranga a warderi di wi abi gi a prenspari di a de prenspari foe de na den konmakandra. Kon biten. Efoe wi e sidon bifo a programa e bigin, dan wi kan abi wan prati na a singi nanga a begi na a bigin foe a konmakandra, èn na so fasi wi e kisi wini foe a konmakandra dorodoro. Abi ala wrokosani na joe. Efoe wi e tjari wi bijbel nanga tra poeblikâsi di den sa gebroiki na a ten foe a konmakandra, dan wi kan leisi makandra nanga den takiman èn wi sa froestan moro betre san den e taki. No meki sani poeroe joe prakseri. Wi kan arki moro boen kande te wi e sidon na fesisei. Te wi e taki safrisafri nanga tra sma èn e go na toilet toemoesi foeroe, dan dati kan meki wi nanga tra sma lasi prakseri. Abi wan prati. Te moro foeroe foe wi e opo wi anoe èn e gi kommentaar, dan moro sma e kisi deki-ati èn wi e bow den nanga wortoe di e sori a bribi foe wi. Gi sjatoe piki. Disi e gi moro foeroe sma na okasi foe abi wan prati. Wi moesoe gi sjatoe kommentaar di abi foe doe nomo nanga a materiaal di wi e studeri. Hori den toewijzing di joe kisi. Leki studenti na ini a theokrasia diniwroko-skoro noso leki sma di abi wan prati na a diniwroko-konmakandra, sreka boen, oefen na fesi, èn proeberi foe doe ala moeiti foe hori joe toewijzing. Prèise sma di abi wan prati. Taigi trawan o foeroe joe e warderi den moeiti di den e doe. Disi e bow den èn e boeweigi den foe doe en moro betre srefi na ini a ten di e kon. Gi makandra deki-ati. Switi odi nanga takimakandra di e bow sma, bifo èn baka den konmakandra, e meki a prisiri di wi e prisiri nanga den winimarki di wi e kisi foe di wi de tapoe den konmakandra, kon moro bigi.