Augustus sa de wan toemoesi boen moen?
1 A jari 1963 ben de wan toemoesi boen jari gi a pipel foe Jehovah. Joe sabi foe san ede? A ben de na a ten dati di a nomroe foe preikiman na heri grontapoe ben doro a marki foe wán miljoen. Efoe joe ben de na ini waarheid na a ten dati, dan joe sa kan memre fa wi ben breiti taki wi abi someni sma di e preiki a Kownoekondre boskopoe! Nownow, dati na a nomroe foe preikiman na Amerkankondre wawan. Ma ibri moen so wan 90.000 foe den no e meki raport taki den ben abi wan prati na a diniwroko. Na Sranan so wan 175 preikiman no e meki raport ibri moen. Now den brada nanga sisa foe Amerkankondre kisi a deki-ati foe meki moeiti foe doro wan heimarki foe wan miljoen preikiman di noiti ete den doro. Wi toe na Sranan wani meki moeiti foe wi alamala go na ini a diniwroko na ini augustus.
2 Teki a tjalensi: Na ini augustus wi e meki moeiti foe doro wan njoen heimarki foe so wan toe doesoen preikiman na Sranan. Efoe den moeiti di wi e doe e waka boen, dan augustus sa de wan toemoesi boen moen foe troe! Wi kan doe disi efoe wi alamala e doe san wi moesoe doe.
3 Den sma di e meki plan foe go nanga fakansi kan pasa wan pisi ten na ini a diniwroko bifo den e gowe. Teki traktaat, brochure noso tijdschrift nanga joe so taki joe kan gi kotoigi na sma di joe e miti na ini joe fakansi. So srefi, na a presi pe joe e go njan joe fakansi joe kan abi wan prati na ini a diniwroko nanga den preikiman foe drape.
4 Efoe joe no man, tokoe joe kan abi wan prati na ini a diniwroko. Joe sa man gi kotoigi na datra, sma di e loekoe sikisma, noso na fisitiman. Kande joe kan gi kotoigi nanga jepi foe brifi noso nanga jepi foe telefon.
5 Son sma seiker sa prisiri nanga jepi foe den kan abi wan prati na ini a diniwroko na ini augustus. Owroeman, dinari ini a diniwroko èn studie leider moesoe seti sani foe a jepi disi kan gi. Ma moro prenspari, no frigiti foe gi joe velddienstrapport wantewante na a kaba foe a moen so taki den sa kan teri joe leki preikiman na ini augustus.
6 Warderi a grani: A diniwroko na wan „toemoesi boen panti disi, di den ben gi joe” (2 Tim. 1:14). Wi e warderi a grani di den gi wi foe preiki a boen njoensoe (1 Tes. 2:4). Te wi e loekoe ala sani di Jehovah doe gi wi, dan dati moesoe boeweigi wi foe abi wan prati doronomo na ini a wroko disi, di prenspari moro iniwan trawan, a heri jari langa. Wi no moesoe gi no wan sani pasi foe tapoe wi foe preiki ala ten. Meki wi meki na augustus disi tron wan toemoesi boen moen ini a wroko foe Jehovah èn meki wi teki a bosroiti foe gi kotoigi foe en ala moen baka dati! — Ps. 34:1.