Pristeri a Nieuwe-Wereldvertaling
1 „A warti ala moeiti foe kisi a Nieuwe Wereld [Vertaling]. A e gi deki-ati, a e sori soifri fa a libi de troetroe, èn a e meki a leisiman denki èn studeri. A no de a wroko foe sma di e soekoe fowtoe na ini bijbel foe kan kroetoe en, ma a de a wroko foe sabiman di e gi grani na Gado èn na en Wortoe.” Na so wan man ben taki di ben de wan sabiman tapoe a kontren foe a Hebrewtongo nanga a Grikitongo. Wi e agri. Fa wi kan jepi trawan foe abi a srefi warderi gi a Nieuwe-Wereldvertaling (Njoen-Grontapoevertaling) te wi e pristeri en makandra nanga a Sabi-boekoe na ini december?
2 Son sma kan gi leki piki: „Mi abi wan bijbel kaba. Mi no abi wan trawan fanowdoe.” A de wan tjalensi gi wi foe jepi den foe si taki a Nieuwe-Wereldvertaling a no soso wan tra bijbel nomo. A de wan letterlijk vertaling na ini a disiten tongo, èn a e sori soifri a fasi fa a tekst foe bijbel ben de biginbigin. Wan fasi di e sori taki a de moro hei leki tra vertaling, na te joe e teki a wortoe di den vertaal leki „srakti-oso” (King James Version) gersi nanga a vertaling „wowojo pe den e seri meti” (Nieuwe-Wereldvertaling) na 1 Korentesma 10:25.
3 Ma a no foeroe sma e leisi bijbel, èn seiker den no e froestan den gronprakseri di a abi gi na aladei libi. Den moesoe sabi taki a Wortoe foe Gado kan abi krakti na tapoe den libi foe den gi a boen foe den, èn taki te den e waka na baka a rai di bijbel e gi foe eerlijkfasi, foe boen gwenti nanga wet, èn foe na osofamiri libi, dan dati kan jepi den foe kakafoetoe gi den problema foe a ten disi. Fa wi ben sa kan doe disi?
4 Wan fasi fa wi kan pristeri bijbel: „Foe di den moreel markitiki e kenki so esi na ini a ten disi èn foe di sma no de seiker san sa pasa na ini a ten di e kon, dan joe no ben sa agri taki wi abi wan tirilin fanowdoe di wi kan froetrow na ini a libi? [Gi okasi foe piki.] Ala di bijbel de moro owroe leki iniwan tra boekoe, tokoe a e gi praktis rai gi a disiten libi èn gi wan kolokoe osofamiri libi.” Baka dati, go na kapitel 2 foe a Sabi-boekoe, leisi paragraaf 10 èn a fosi lin foe paragraaf 11, èn poti 2 Timoteus 3:16, 17 na ini toe. Efoe a sma e sori belangstelling, dan libi a Sabi-boekoe na baka, froeteri foe a programa di wi abi foe gi oso-bijbelstudie sondro taki sma abi foe pai gi dati, èn pristeri a Nieuwe-Wereldvertaling. Efoe joe denki taki a sa moro boen foe bigin a studie na ini a San Gado e aksi-brochure, dan joe kan doe dati. Joe sa feni moro inleiding di fiti na tapoe bladzijde 2-7 foe a brochure Fa foe bigin èn go doro nanga bijbel takimakandra.
5 Meki wi sori taki wi e warderi a troetroe boen Nieuwe-Wereldvertaling. Wi kan doe disi foe di wi e pristeri en fajafaja na ini december.