Wroko moro tranga foe doe a kotoigiwroko foe di a kaba e kon krosibei
1 A kotiten na wan prisiri ten. A de wan ten toe foe tranga wroko. Foeroe ten no de foe tjari den sani di prani kon na wan. Den wrokoman no e prefoeroe foe draidrai nanga a wroko foe den.
2 Na agersifasi, Jesus ben teki „wan kaba foe wan seti foe sani” gersi wan kotiten (Mat. 13:39). Wi e libi na a kaba foe a seti foe sani disi, èn wi no abi foeroe ten foe gi kotoigi „na heri grontapoe pe sma e libi” (Mat. 24:14). Foe di a kaba e kon krosibei moro nanga moro, dan a de fanowdoe taki wi e wroko moro tranga foe abi wan prati na a diniwroko. Foe san ede? Jesus ben froeklari: „A kotiwroko bigi, ma foeroe wrokoman no de.”—Mat. 9:37, 38; Rom. 12:11.
3 Doe en leki wan sani di de toemoesi prenspari: Di Jesus ben bigin a bigi preikiwroko foe en, dan a ben abi soso dri nanga afoe jari foe klari a wroko di a ben kisi foe doe. Jesus ben preiki nanga a firi taki a wroko ben de toemoesi prenspari, èn a ben taki: „Mi moesoe meki a boen njoensoe foe a kownoekondre foe Gado bekènti . . ., bika foe a sani disi ede den ben seni mi kon.”—Luk. 4:43.
4 Jesus poti a srefi firi disi, taki a preikiwroko de toemoesi prenspari, dipi na ini den disipel foe en (Mark. 13:32-37). Foe dati ede ’den ben tan go doro sondro foe stòp foe gi leri èn foe meki a boen njoensoe foe a Krestes, Jesus, bekènti ibri dei na ini a tempel èn oso foe oso’ (Tori. 5:42). Den no ben poti sani di no ben de so prenspari na a fosi presi na ini den libi. Ala di den disipel no ben de nanga foeroe sma, tokoe den ben abi boen bakapisi te den ben preiki a boen njoensoe „na ala kriatoeroe di de na ondro hemel”.—Kol. 1:23.
5 Na ini a ten disi, wi abi moro reide srefi foe kweki a srefi firi taki a preikiwroko de toemoesi prenspari, foe di „a kaba foe ala sani kon krosibei” (1 Petr. 4:7). Jehovah poti wan dei nanga wan joeroe gi a kaba foe a seti foe sani disi (Mat. 24:36). A preikiwroko sa tjari kon na wan kaba na ini a ten di de ete. Foe dati ede wi e tan meki moro moeiti foe doro moro nanga moro sma nanga a boen njoensoe.
6 Te wi e wroko moro tranga foe abi wan prati na a kotoigiwroko, ala di a kaba e kon krosibei, dan wi sa abi a satisfaksi foe taigi Jehovah, neleki fa Jesus ben doe: ’Wi kaba a wroko di joe gi wi foe doe.’—Joh. 17:4.