„Preiki a Wortu . . . Leki wan Sani Di Musu Du Wantewante”
1 Efu yu e kisi wan sani pe den skrifi den wortu „MUSU DU WANTEWANTE” na tapu, dan fa yu e si a sani dati? Den wortu „tumusi prenspari” wani taki „poti prakseri na en tapu wantewante”. Na apostel Paulus ben sabi fu san ede a ben taki dati Kresten musu „preiki a wortu . . . leki wan sani di musu du wantewante” (2 Tim. 4:2). ¿Yu e du disi, fu di yu e poti prakseri na a wroko disi wantewante?
2 A kan, taki sma fruteri Paulus taki son wan fu den brada fu en ben sori taki den ben firi ’lesi fu du den wroko’ leki Kresten (Rom. 12:11). Disi ben meki taki den no ben abi furu bakapisi nanga a wroko di den ben du èn den no ben prisiri someni, leki fa den ben kan du dati te den ben o yepi trawan.
3 A Fasi fa Yesus Ben Prakseri fu a Diniwroko: ¡Fa Yesus ben prisiri fu du a diniwroko fu en! A ben taki: „Mi nyanyan de, fu mi du a wani fu en di ben seni mi kon èn fu kaba a wroko fu en.” Na eksempre fu Yesus ben buweigi den disipel fu en, den wan di a ben gi deki-ati fu di a ben taigi den taki ’den gron, weti kaba fu go koti den’ (Yoh. 4:34, 35). A seryusufasi di a ben sori ini a heri diniwroko fu en, ben de fu si krin di a ben taigi den disipel fu en „begi a Masra fu a kotiwroko fu seni wrokoman go na ini a kotiwroko fu en” (Mat. 9:38). Yesus ben frustan taki a wroko di a ben kisi fu du, ben de fu preiki èn a ben abi a fasti bosroiti fu no meki no wan sani tapu en fu du disi.
4 Fa A De Nanga Wi? Na ini a ten disi, a de moro prenspari leki oiti na fesi taki wi musu go doro nanga a preikiwroko. Na furu presi na grontapu, den gron, lepi kaba fu go koti den. Srefi na ini kondre pe a gersi taki kotoigi ben gi dorodoro, dusundusun sma e dopu ibri yari. Fu di a kaba fu a seti fu sani disi e kon krosibei esi-esi, meki „furu [de] fu du na ini a wroko fu Masra” (1 Kor. 15:58). Moro leki iniwan tra ten na fesi, a de prenspari taki wi e du furu muiti fu taki fu a Kownukondre boskopu nanga trawan.
5 Meki wi poti ala wi prakseri na a wroko fu taki nanga trawan fu a bun nyunsu, te wi e wroko oso fu oso èn so srefi na ala tra presi pe wi kan feni sma na ini a gebied. Efu wi e teki prati na a preikiwroko dorodoro, dan wi e sori krin taki wi e poti a Kownukondre na a fosi presi ini wi libi (Mat. 6:33). A getrowfasi fa wi e preiki a wortu leki wan sani di musu du wantewante sa tyari furu prisiri kon gi wi.