Aksi Boksu

◼ Suma musu begi na den gemeente konmakandra?

Fu begi na ini a gemeente na wan tumusi prenspari sani fu na anbegi fu wi. Fu teki fesi gi trawan na Yehovah en fesi na wan tumusi moi grani nanga wan bigi frantwortu. Fu di begi na so wan prenspari sani, meki a de fanowdu taki den owruman e gebroiki koni fu si krin sortu brada bun fu begi na den konmakandra. Brada di dopu kaba èn e teki fesi gi a gemeente musu de lepi Kresten bedinari di sma sabi leki bun eksempre èn di a gemeente e lespeki. A begi di den e begi na wan lespeki fasi, musu sori taki den abi wan bun banti nanga Yehovah Gado. Na artikel „Anderen in gebed voorgaan met een nederig hart” (Teki Fesi gi Trawan na ini Begi Nanga Sakafasi) na ini De Wachttoren fu 15 mei 1986, e taki fu prenspari gronprakseri di de wan yepi, spesrutu gi den wan di e begi na publiki gi a gemeente.

Den owruman no sa meki wan brada begi te sma e tweifri na a fasi fa a brada e tyari ensrefi noso te den sabi en leki wan man di no seryusu. Wan brada di gwenti fu mandi noso di wani gebroiki publiki begi fu meki tra sma kon sabi a kesekese di a abi nanga trawan, no ben sa kisi a grani fu begi (1 Tim. 2:8). Srefi te wan tini brada dopu kaba, toku den owruman sa musu luku efu a lepi na yeye fasi fu begi gi a gemeente.—Tori. 16:1, 2.

Son leisi a ben sa kan de fanowdu taki wan sisa musu begi na den velddienst konmakandra, efu no wan brada de drape di abi a frantwortu fu begi gi a grupu. A sisa sa musu weri wan duku tapu en ede di fiti na a okasi dati. Efu a gersi taki wan brada di abi a frantwortu fu begi na son velddienst konmakandra no sa de, dan den owruman musu poti wan sisa di den e feni bun fu teki fesi.

A de a gwenti taki a fesiman fu a publiki konmakandra e bigin a programa nanga begi. Ma na tra gemeente konmakandra moro furu brada de di kan kisi a frantwortu fu begi. Fu dati ede wan tra brada boiti a wan di e bigin a konmakandra noso a wan di musu hori a lasti prati, kan kisi a kari fu opo noso fu tapu nanga begi. Awansi fa o no fa, a brada di sa kisi a kari fu begi na wan gemeente konmakandra musu sabi dati na fesi, so taki a kan prakseri fu den sani di a sa taki. Dan a kan taki wan opregti begi di sma o frustan èn di fiti a spesrutu konmakandra dati.

Den begi disi no abi fu de langa. Te wan brada e begi na publiki, dan nofotron den sma sa frustan en moro bun te a e tanapu, èn e taki nanga wan sten di ala sma kan yere èn te a e taki krin. Disi sa meki taki ala sma di kon makandra sa man arki a begi èn sa man taki wan opregti „Amen!” na a kaba.—1 Kron. 16:36; 1 Kor. 14:16.