Frede Yehovah a Heri Dei
1 „A frede gi Yehovah na a bigin fu koni” (Ps. 111:10). A e gi wi deki-ati fu du bun wroko èn a e yepi wi fu wai pasi gi san takru (Odo 16:6). A sortu frede disi na wan dipi lespeki gi wi Mekiman, wan di e meki taki wi no wani du sani fu meki a firi sari. A sortu frede disi e meki tu taki wi no wani trangayesi en. Wi musu kweki èn sori a lespeki a heri dei.—Odo 8:13.
2 Ibri dei a fasi fa Satan en grontapu e denki, e dwengi wi srefisrefi fu du den takru sani di sma na ini grontapu e du (Ef. 6:11, 12). Wi onvolmaakti skin lobi fu sondu, èn abi a firi fu du san ogri (Gal. 5:17). Dati meki wi musu frede Yehovah a heri dei, so taki wi man hori den komando fu en, de koloku èn tan na libi.—Deut. 10:12, 13.
3 Na ini Hebrewsma 10:24, 25, wi e kisi a frumane fu kon makandra fu kan gi makandra deki-ati „èn dati moro furu” na ini den ten disi pe wi e libi na ini. Efu wi wani pasa den lasti dei disi libilibi, dan a de prenspari srefisrefi taki wi e go doronomo na den konmakandra. Te wi e frede fu meki Yehovah firi sari, dan dati o meki taki wi e go na den konmakandra. Dati o meki tu taki wi e warderi a reide fu san ede konmakandra e hori srefisrefi. Den wan di e frede Gado, e si en leki wan bigi grani fu teki prati na den Kresten konmakandra.
4 Wan tra fasi fu sori taki wi e frede Gado na te wi e gi yesi na a komando fu preiki a bun nyunsu fu a Kownukondre (Mat. 28:19, 20; Tori. 10:42). Wan prenspari marki fu wi preikiwroko na fu yepi trawan fu kon kisi frede gi Yehovah èn fu saka densrefi na a wani fu en ondro. Wi kan du dati fu di wi e tyari gobaka, fu di wi e meki muiti fu bigin oso-bijbelstudie, èn fu di wi e leri trawan dan ala den komando fu Gado. Na so wan fasi wi e sori taki wi e frede Yehovah èn taki wi lobi tra sma.—Mat. 22:37-39.
5 Den wan di no e frede Gado no man kweki warderi gi santa sani, èn den e brokokindi gi a loktu noso a denki fu grontapu di kan kiri sma (Ef. 2:2). Meki a de wi fasti bosroiti fu „du santa diniwroko gi Gado na wan fasi di a feni bun, nanga frede èn lespeki gi Gado” (Hebr. 12:28). Na so wan fasi wi o man kisi den blesi di den wan e kisi di e frede Yehovah a heri dei.