Druk fu Speri èn a Grani Di Yu Abi fu Preiki
1 Druk fu speri kan abi furu krakti na tapu wan sma — a sani disi kan abi bun noso takru bakapisi. Kompe-futuboi fu Yehovah abi bun krakti tapu makandra, èn dati e gi wi tranga fu du bun Kresten wroko (Hebr. 10:24). Ma sma di no de Kotoigi, famiriman, wrokokompe, skoromati, birtisma, noso tra sma di wi sabi, kan kwinsi wi so taki wi e tyari wisrefi na wan fasi di no de akruderi Kresten gronprakseri. Kande den e taki „sondro lespeki gi a bun fasi fa [wi] e tyari [wi]srefi na ini Krestes” (1 Petr. 3:16). Fa wi kan tan abi a fasti bosroiti fu tan preiki, srefi te den speri fu wi e kwinsi wi fu du san no bun?
2 Famiriman: Son leisi, wan masra noso papa di no de wan Kotoigi fu Yehovah, kande no wani taki a wefi nanga den pikin fu en e teki prati na a preikiwroko. Na so a ben de nanga wan osofamiri na ini Meksikow. Wan man en wefi nanga en seibi pikin ben kon na ini a waarheid. Na ini a bigin a ben gens den, fu di a no ben wani taki en osofamiri ben preiki èn gi sma Bijbel publikâsi ini na oso-fu-oso diniwroko. A ben feni taki en osofamiri ben bun tumusi fu du a wroko disi. Ma a wefi nanga den pikin fu en ben hori densrefi na a fasti bosroiti di den ben abi fu dini Yehovah èn fu teki prati doronomo na a preikiwroko. Te fu kaba, a man bigin si den winimarki di en osofamiri ben kisi fu di den ben teki prati na a preikiwroko di Gado seti. Leki bakapisi fu dati, a gi ensrefi abra na Yehovah tu. Tinafeifi yari ben pasa bifo a teki a waarheid, ma a ben o man du dati efu en osofamiri no ben horidoro na ini a preikiwroko di de wan grani?—Luk. 1:74; 1 Kor. 7:16.
3 Wrokokompe: Kande wan tu fu den wrokokompe fu yu sa mandi nanga yu te yu e meki muiti fu preiki gi den. Wan sisa ben fruteri taki a ben abi wan takimakandra na kantoro nanga den wrokokompe fu en. A takimakandra ben abi fu du nanga a kaba fu grontapu. A bakapisi fu dati ben de taki den spotu en, fu di a ben gi den leki rai fu leisi Mateus kapitel 24. Ma wan tu dei baka dati, wan fu den wrokokompe fu en taigi en taki a ben leisi a kapitel. A taigi en so srefi taki den sani di a ben leisi ben naki en ati. Na uma disi teki wan publikâsi, èn a sisa seti sani fu studeri Bijbel makandra nanga na uma èn a masra fu en. A fosi leisi den studeri te kon miti tu yuru mamanten. Baka a di fu dri leisi di den studeri, dan na uma nanga en masra bigin go na den konmakandra. Heri esi baka dati, den tapu nanga a smoko di den ben smoko tabaka, èn den bigin teki prati na a preikiwroko. A sani disi ben o pasa efu a sisa fu wi no ben meki muiti fu prati a howpu fu en nanga trawan?
4 Skoromati: Kresten yonguwan gwenti fu kisi druk fu den speri fu den na skoro. So srefi Kresten yonguwan furutron e frede taki tra yonguwan sa wisiwasi den, fu di den e teki prati na a preikiwroko. Wan Kresten tini na Amerkankondre ben taki: „Mi ben frede fu gi kotoigi na tra yongusma, fu di mi no ben wani taki den ben lafu mi.” Fu dati ede a no ben teki okasi fu gi kotoigi na den speri fu en na skoro, èn so srefi na ini a kontren pe a gemeente fu en e preiki. Fa yu kan kisi tranga fu kakafutu gi druk fu speri? Frutrow tapu Yehovah, ala di yu e meki muiti fu du den sani di a feni bun (Odo 29:25). Yu musu breiti fu di yu man gebroiki a Wortu fu Gado na ini a diniwroko fu yu (2 Tim. 2:15). A yonguwan di wi didyonsro ben taki fu en, bigin begi Yehovah. A aksi Yehovah fu yepi en so taki a ben kan kisi a tranga angri fu taki nanga den skoromati fu en. A bigin gi okasi kotoigi na skoro, èn a ben abi bun bakapisi. Heri esi a ben taki nanga ala sma di a ben sabi. A ben taki te fu kaba: „Den yonguwan dati abi wan howpu fanowdu gi a ten di e kon, èn den wani kisi en tu. Fu dati ede Yehovah e gebroiki wi fu yepi den.”
5 Birtisma: A kan de so taki son ten birtisma noso tra sma di wi sabi e sori taki den e mandi nanga wi fu di wi na Kotoigi fu Yehovah, èn fu di wi abi wan tra bribi. Efu yu broko yu ede nanga a fasi fa den e denki fu yu, dan aksi yusrefi: ’A de so taki den sabi a waarheid di e tyari wi na tapu a pasi fu têgo libi? San mi kan du fu doro na ati fu den?’ Wan kringopziener ben si taki Kotoigi ben kisi bun bakapisi te den ben preiki pikinso-pikinso, wanwan leisi gi den birtisma fu den. Begi Yehovah fu kisi a tranga nanga a koni di de fanowdu fu tan suku opregti sma.—Fil. 4:13.
6 Gensman kande sa breiti te wi e brokokindi gi a druk di den e poti na wi tapu fu du san no bun. Ma a sa tyari wini kon gi den te wi ben o du dati — a sa tyari wini kon gi wi? Sma na ini a libimakandra fu Yesus ben gens en. Den afu brada fu en ben taigi en hati sani srefi. Ma a ben sabi taki a ben man yepi den, soso te a ben tan waka na tapu a pasi di Gado ben poti gi en fu waka. Fu dati ede, Yesus ben „frudrage so wan genstaki fu sondari teige den eigi belang” (Hebr. 12:2, 3). Wi musu du dati tu. Abi a fasti bosroiti fu gebroiki a grani di yu abi fu preiki a Kownukondre boskopu na wan heri bun fasi. Te yu e du dati, dan „yu sa frulusu yusrefi nanga den wan di e arki yu”.—1 Tim. 4:16.