Papa Nanga Mama—Leri den Pikin fu Unu Bun Gwenti
1 Sma no gebore nanga bun gwenti, èn den no e kisi dati gewoon so. Na presi fu dati, a e teki ten fu leri pikin bun gwenti . „Leri” wani taki „fu gi pikinso-pikinso”, noso „fu poti wanwan dropu go inisei”. Dati wani taki dati papa nanga mama musu du dati doronomo so taki den sa man „tan kweki [den pikin fu den] na ini a trangaleri èn a seryusu frumane fu Yehovah”.—Ef. 6:4.
2 Bigin te Den Yongu: A man di bun yongu pikin man leri èn man du nyun sani, na wan sani di e fruwondru sma. Furutron, bigisma e feni en muilek fu leri wan nyun tongo. Ma toku pikin di no e go na skoro ete, man leri tu noso dri tongo na a srefi ten. Noiti no denki taki a pikin fu yu yongu tumusi fu kweki bun gwenti. Bigin frukufruku fu leri wan pikin den tru tori fu Bijbel èn go doro nanga dati. Disi sa meki taki, na a ten te a pikin abi wan tu yari kaba, dan a denki fu en o furu nanga a sabi di o meki a kon de „koni fu kisi frulusu”.—2 Tim. 3:15.
3 Meki a Preikiwroko Tron wan Gwenti: Wan bun gwenti di papa nanga mama kan leri wan pikin na ini den yari te a e leri sani, na fu preiki a bun nyunsu fu Gado Kownukondre doronomo. Furu papa nanga mama e bigin du disi fu di den e tyari den pikin fu den na ini na oso-fu-oso diniwroko, ala di den pikin yongu ete. Te papa nanga mama e teki prati doronomo na a preikiwroko, dan dati o yepi den pikin fu den fu abi warderi nanga faya gi a diniwroko. Papa nanga mama kan sori den pikin fa fu preiki na ala sortu fasi.
4 A e yepi den pikin tu te den e teki prati na a Theokrasia Diniwroko-skoro. A skoro e leri den fu abi bun gwenti te den e studeri èn fa fu leisi na so wan fasi taki den e frustan san den leisi. Den e leri fu taki fu Bijbel, fa fu tyari gobaka, èn fa fu hori bijbelstudie. Den sortu leri disi kan meki taki den o wani pionier èn taki den o wani du muiti fu kisi spesrutu grani ini a diniwroko. Furu Bethel wrokoman nanga zendeling e memre o prisiri a ten ben de di den ben bigin nanga a skoro. Den sma disi e si a skoro leki wan seti di yepi den fu kweki bun gwenti.
5 Wi alamala de neleki tokotoko na ini na anu fu a bigi Patu-bakriman, Yehovah (Yes. 64:8). O moro safu a tokotoko, o moro makriki a de fu wroko nanga en. O moro langa a e drei, o moro tranga a e kon. So a de tu nanga libisma. Te den yongu, dan yu kan beni den moro makriki — o moro yongu a pikin de, o moro betre dati de. Den yongu yari na yari pe den e leri fa fu tyari densrefi. Den sani di den e leri na ini den yari disi kan meki sani waka bun gi den noso taki sani no sa waka bun gi den. Leki wan papa noso mama di lobi den pikin fu den, bigin fruku fu leri den pikin fu yu fu abi bun gwenti na ini a Kresten diniwroko.