De wan Koloku Duman
1 Yesus ben taki dati na a ten fu en denoya, a moro bigi pisi fu a libisma famiri ’no ben o poti prakseri na a boskopu fu en’, neleki fa sma ben du na ini den dei fu Noa (Mat. 24:37-39). Fu dati ede, wi e fruwakti taki furu sma no sa arki a Kownukondre bun nyunsu. San kan yepi wi fu tan nanga prisiri te wi e du a diniwroko fu wi?—Ps. 100:2.
2 Na a fosi presi, wi musu hori na prakseri taki a boskopu fu wi èn so srefi a preikiwroko di wi kisi fu du, e komoto fu Gado. Te sma no wani arki te wi e preiki, awansi wi e du ala muiti, dan fu taki leti, den sma dati no wani arki Yehovah. Wi musu prakseri taki Yehovah feni en bun taki wi e preiki na wan getrow fasi. Te wi e prakseri dati, dan a sa yepi wi fu tan nanga prisiri èn so srefi nanga koloku na ini wi ati, leki duman fu a wroko fu Gado.—Yak. 1:25.
3 A di fu tu, sma de ete di sa teki a seti fu Yehovah di e tyari frulusu kon. Ala di a moro bigi pisi fu a libisma famiri kande abi wan mi-no-ke-fasi, toku sma de ete di de leki skapu. Den sma disi musu tyari kon wan na ini a ten disi srefi, pe wi de so krosibei fu a kaba. Wi musu tan preiki, awansi „na sortu foto noso na sortu dorpu” wi e go fu „suku suma de drape di warti”.—Mat. 10:11-13.
4 Tan Abi wan Bun Denki fu Sani: A tumusi takru nen di den falsi bribi abi, meki taki son sma kon lasi-ati. A seti fu sani disi ’kwinsi èn panya tra sma so taki den de leki skapu sondro skapuman’ (Mat. 9:36). A kan de so taki furu sma e bruya fu di den no abi wan bun wroko, bun datrayepi, nanga seikerfasi. Te wi e frustan den sani disi, dan dati sa yepi wi fu horidoro na ini a wroko fu wi. Du muiti fu bigin taki nanga sma na ini a kontren pe wi e preiki. Taki nanga den fu den sani di e gi den a moro bigi broko-ede. Yepi den fu si taki Gado en Kownukondre wawan kan lusu den problema disi. Gebroiki den Buku fu Bijbel èn so srefi spesrutu sani na ini den publikâsi, fu doro na ati fu den nanga a bun nyunsu.—Hebr. 4:12.
5 Koloku duman fu a wortu fu Gado ala ten e hori na prakseri taki: „A prisiri fu Yehovah na [wi] fortresi” (Neh. 8:10). Wi no abi fu lasi a prisiri di wi abi. „Efu na oso warti, meki a vrede di unu e winsi en kon na en tapu; ma efu a no warti, meki a vrede fu unu kon baka na un tapu” (Mat. 10:13). Yehovah e gi wi nyun krakti nanga prisiri te wi e horidoro nanga pasensi na ini en santa diniwroko, èn a e blesi a getrowfasi fu wi.