„Sma di e doe a wortoe” nanga prisiri
„Teki nanga safri-atifasi, a prani foe a wortoe di man froeloesoe den sili foe oenoe. Ma, tron doeman foe a wortoe, èn no soso sma di e jere nomo.” — JAKOBUS 1:21, 22.
1. Fa wi moesoe si wi jaritekst foe 1996?
„TRON DOEMAN FOE A WORTOE.” Den makriki wortoe disi abi wan krakti boskopoe. Den teki den wortoe disi foe „A brifi foe Jakobus” na ini bijbel, èn na ini 1996 a sa de foe si leki a jaritekst foe Jehovah Kotoigi, na ini den Kownoekondre zaal.
2, 3. Foe san ede a ben fiti taki Jakobus ben moesoe skrifi a brifi di e tjari a nen foe en?
2 Jakobus, wan afoe brada foe Masra Jesus, ben de wan prenspari sma na ini a fosi kresten gemeente. Na wan okasi na baka na opobaka foe Jesus, dan wi Masra ben sori ensrefi persoonlijk na Jakobus èn baka dati na den apostel (1 Korentesma 15:7). Baka ten, di na apostel Petrus ben kon loesoe na wan wondroefasi foe doengroe-oso, a ben taigi wan groepoe kresten di ben kon makandra: „Froeteri den sani disi na Jakobus nanga den brada” (Tori foe den Apostel 12:17). A e sori taki Jakobus, ala di ensrefi no ben de wan apostel, ben teki fesi na a konmakandra foe a tiri skin na Jerusalem di den apostel nanga den owroeman ben bosroiti taki den heiden di ben drai den libi no ben abi foe besnij. Jakobus ben kari ala den penti, èn a bosroiti, di a santa jeje ben horibaka gi dati, ben seni go na ala den gemeente. — Tori foe den Apostel 15:1-29.
3 A de krin, taki den ben si a lepifasi fa Jakobus ben denki, leki prenspari srefisrefi. Ma na wan sakafasi a ben erken taki ensrefi ben de soso „wan srafoe foe Gado èn foe Masra Jesus Krestes” (Jakobus 1:1). A brifi foe en di skrifi nanga jepi foe Gado en santa jeje, abi boen foeroe gosontoe rai nanga deki-ati gi den kresten na ini a ten disi. A brifi ben klari so wan fo jari bifo a fosi leisi di Rome ben go feti nanga Jerusalem nanga jepi foe generaal Cestius Gallus, baka di a boen njoensoe ben preiki pasa marki „ini a heri mekisani di de na ondro hemel” (Kolosesma 1:23). Den ben de toemoesi moeilek ten, èn den foetoeboi foe Jehovah ben sabi heri boen taki a kroetoe strafoe foe En ben de krosibei foe kon na tapoe a djoe nâsi.
4. San e sori taki den fosi kresten ben abi foeroe froetrow na ini a Wortoe foe Gado?
4 Den kresten dati ben abi a heri Hebrew Boekoe foe bijbel kaba èn wan bigi pisi foe den Griki Boekoe foe bijbel. Soleki fa den foeroe leisi di den skrifi foe sani di ben skrifi fosi e sori, dan a de krin taki den kresten bijbel skrifiman ben abi foeroe froetrow na ini Gado Wortoe. Na so a de toe, taki wi na ini a ten disi moesoe studeri Gado Wortoe fajafaja èn gebroiki en na ini wi libi. Foe man horidoro, wi abi a jeje krakti nanga deki-ati fanowdoe di den Santa Boekoe foe bijbel e gi. — Psalm 119:97; 1 Timoteus 4:13.
5. Foe san ede wi abi spesroetoe tiri fanowdoe na ini a ten disi, èn pe wi kan feni en?
5 Na ini a ten disi, a libisma famiri e tanapoe na a lanki foe wan „bigi banawtoe, soleki foe sensi a bigin foe grontapoe te now no kon ete, nôno, èn no sa kon moro toe” (Mateus 24:21). Wi kan pasa libilibi efoe Gado e tiri wi. Fa wi kan feni a tiri disi? Te wi e opo wi ati gi den leri foe Gado na ini en Wortoe di skrifi nanga jepi foe en santa jeje. Disi sa meki wi „tron doeman foe a wortoe”, neleki den loyaal foetoeboi foe Jehovah na ini fositen. Wi moesoe leisi èn studeri Gado Wortoe fajafaja èn wi moesoe gebroiki en foe prèise Jehovah. — 2 Timoteus 2:15; 3:16, 17.
Horidoro nanga prisiri
6. Foe san ede wi moesoe abi prisiri te wi e miti nanga tesi?
6 Na ini a bigin foe en brifi, Jakobus e taki foe prisiri, a di foe toe froktoe foe a jeje foe Gado. A e skrifi: „Si den sani disi leki soso prisiri, mi brada, te oenoe e kisi foe doe nanga difrenti sortoe tesi, foe di oenoe sabi taki na eigifasi disi foe oen bribi di kisi tesi, abi leki bakapisi a hori di oenoe e horidoro. Ma meki horidoro klari en wroko, so taki oenoe kan kon boen dorodoro èn kon krin na ala fasi èn oenoe no e mankeri noti” (Jakobus 1:2-4; Galasiasma 5:22, 23). Fa wi kan taki dati a de wan „soso prisiri” foe abi foe doe nanga tesi? We, srefi Jesus ben taki na a Bergitaki foe en: „Kolokoe foe oenoe te sma e skempi oenoe èn e froefolgoe oenoe èn na wan lei fasi e taki ala sortoe ogri sani foe oenoe foe mi ede. Prisiri èn djompo opo foe prisiri ede, foe di a pai di oenoe sa kisi, bigi ini hemel” (Mateus 5:11, 12). Wan prisiri satisfaksi de te wi e si a blesi foe Jehovah gi den moeiti foe wi, ala di wi e doe foeroe moeiti foe doro a marki foe têgo libi. — Johanes 17:3; 2 Timoteus 4:7, 8; Hebrewsma 11:8-10, 26, 35.
7. (a) Fa wi kan kisi jepi foe horidoro? (b) Fa wi kan kisi pai neleki Job?
7 Jesus srefi ben horidoro „bika foe a prisiri di ben poti na en fesi” (Hebrewsma 12:1, 2). Te wi e loekoe heri boen na a eksempre foe deki-ati di Jesus ben gi, dan wi toe kan horidoro! Soleki fa Jakobus e taki na a kaba foe en brifi, dan Jehovah e pai den sma foeroe di hori den soifri retifasi. „Loekoe! Wi e froeklari den wan di horidoro, kolokoe”, Jakobus e taki. „Joe jere foe a hori di Job ben horidoro èn joe si a bakapisi di Jehovah ben tjari gi en, taki Jehovah safoe srefisrefi na ini firi foe lobi èn a abi sari-atifasi” (Jakobus 5:11). Prakseri fa a soifri retifasi foe Job ben kisi pai di a ben kisi en gosontoe baka èn wan prisiri kolokoe libi nanga den lobiwan foe en. Foe horidoro na ini soifri retifasi kan gi joe wan srefi sortoe prisiri na ini a pramisi paradijs foe Gado en njoen grontapoe, leki wan heimarki foe a prisiri foe dini Jehovah nownowde.
Soekoe koni
8. Fa wi kan feni troe èn praktis koni, èn san begi abi foe doe nanga disi?
8 Te wi e studeri Gado Wortoe fajafaja èn te wi e gebroiki en na ini wi libi, dan dati sa abi a koni foe Gado leki bakapisi, èn disi sa meki wi man foe horidoro na ondro tesi na mindri a pori sistema foe Satan di e dede gowe. Fa wi kan de seiker foe feni a koni disi? Jakobus e taigi wi: „Efoe wan sma e mankeri koni, meki a tan aksi Gado, bika a e gi sondro gridifasi èn sondro foe kragi; èn a sa gi en. Ma meki a tan aksi na ini bribi, no tweifri srefisrefi, bika a sma di e tweifri de leki wan skwala foe a se di winti e dribi go-kon” (Jakobus 1:5, 6). Wi moesoe begi fajafaja, nanga wan tranga froetrow taki Jehovah sa jere den begi foe wi èn taki a sa piki den na en eigi ten èn na en eigi fasi.
9. Fa Jakobus e taki san a koni foe Gado de èn fa wi kan gebroiki en?
9 A koni foe Gado na wan presenti foe Jehovah. Jakobus ben taki foe den sortoe presenti disi: „Ibri boen presenti èn ibri volmaakti kado e komoto na tapoesei, bika a e saka kon foe a Tata foe den hemel leti, èn nanga en no wan kenki de ini a drai foe a skaduw.” Baka ten na ini en brifi, Jakobus e froeklari a bakapisi foe kisi so wan troe koni, te a e taki: „Soema koni èn abi froestan foe sani na oen mindri? Meki a sori, na ini en toemoesi boen waka nanga libi, den wroko foe en nanga wan safri-atifasi di fiti koni. . . . A koni foe tapoesei de na a fosi presi soifri, moro fara a lobi vrede, a de reidelek, a de klariklari foe gi jesi, a foeroe nanga sari-atifasi nanga boen froktoe, a no e teki sma partij, a no e hoigri.” — Jakobus 1:17; 3:13-17.
10. Fa falsi relisi de kontrari nanga a troe relisi?
10 Na ini a grontapoe tirimakti foe falsi relisi, awinsi na ini krestenhèit noso na ini tra kondre, a de foeroetron a gwenti taki den anbegiman e singi wan toe prèise-singi gi Gado, e arki den srefi sortoe begi ibritron baka, èn kande foe arki wan lezing. Den no e gi no wan deki-ati foe preiki wan boskopoe foe howpoe, bikasi moro foeroe foe den relisi no e si no wan krin froewakti gi a tamara. A glori howpoe foe Gado en Mesian Kownoekondre na wan sani di noiti den e taki foe en, noso den no e froestan en boen srefisrefi. Jehovah e profeteri foe den sma di e horibaka gi krestenhèit taki: „Toe ogri sani de di mi pipel doe: Den gowe libi mi srefi, a fonten foe a watra foe libi, so taki den kan koti watrabaki gi densrefi, broko watrabaki, di no man hori watra” (Jeremia 2:13). Den no abi watra foe waarheid. Den no abi a koni foe hemel.
11, 12. (a) Fa a koni foe Gado moesoe boeweigi wi? (b) Gi san a koni foe Gado e warskow wi?
11 Dati e difrenti srefisrefi foe den Jehovah Kotoigi na ini a ten disi! Nanga a dinamis krakti di den e kisi foe Gado, den e foeroe grontapoe nanga a boen njoensoe foe en Kownoekondre di e kon. A koni foe san den e taki abi en gron steifi tapoe a Wortoe foe Gado. (Teki gersi Odo 1:20; Jesaja 40:29-31.) Foe troe, den e gebroiki na wan praktis fasi a troe sabi di den abi èn a froestan di den e froestan sani, te den e meki den bigi pramisi foe Gado, wi Mekiman, bekènti. Wi moesoe abi na angri taki ala sma na ini a gemeente „sa foeroe nanga a soifri sabi foe a wani foe [Gado] ini ala koni nanga froestan foe sani na jejefasi” (Kolosesma 1:9). Efoe jongoewan nanga owroewan abi a fondamenti disi, dan sani sa boeweigi den ala toe foe „tron doeman foe a wortoe”.
12 „A koni foe tapoesei” e warskow wi foe sondoe di kan meki taki Gado no sa feni wi boen. „Sabi disi mi lobi brada”, Jakobus e taki. „Ibri sma moesoe de esi foe jere, no esi foe taki, no esi foe kisi atibron; bikasi na atibron foe wan sma no e tjari a regtfardikifasi foe Gado.” Ija, wi moesoe de esi, fajafaja foe arki a rai foe Gado èn foe poti en na ini wi libi. Ma wi moesoe loekoe boen foe no gebroiki a „pikin memre” dati, a tongo, na wan fowtoe fasi. Te wi e djaf, e gongosa na wan fasi di no koni, noso na wan tranga-ede fasi e taki wi eigi prakseri nomo, dan na wan agersifasi a tongo kan soetoe faja gi wan ’bigi boesi’. Foe dati ede wi moesoe kweki switifasi nanga a dwengi di wi man dwengi wisrefi na ini ala den demakandra foe wi. — Jakobus 1:19, 20; 3:5.
13. Foe san ede a de prenspari taki wi e teki „a prani foe a wortoe”?
13 Jakobus e skrifi: „Foe dati ede, poeroe ala fisti sani, èn sani di no de fanowdoe, èn takroedoe, èn teki nanga safri-atifasi, a prani foe a wortoe di man froeloesoe den sili foe oenoe” (Jakobus 1:21). A gridi grontapoe disi di e meki prodo nanga den goedoe na skinfasi foe den èn di e prakseri ensrefi nomo èn di abi lagi boen gwenti nanga wet, de na pasi foe lasi gowe. „Ma a sma di e doe a wani foe Gado, e tan foe têgo” (1 Johanes 2:15-17). A de prenspari foe dati ede, taki wi e teki „a prani foe a wortoe”! A koni di a Wortoe foe Gado e gi, de krinkrin kontrari foe a takroedoe foe a grontapoe disi di e dede gowe. Wi no wani noti foe a takroedoe dati (1 Petrus 2:1, 2). Wi moesoe abi lobi gi waarheid èn wan tranga bribi moesoe prani na ini wi ati, so taki wi sa abi a fasti bosroiti foe noiti no gowe libi den regtfardiki pasi foe Jehovah. Ma a nofo foe jere Gado Wortoe?
Tron „doeman foe a wortoe”
14. Fa wi kan tron „sma di e jere” èn so srefi „doeman” foe a Wortoe?
14 Na Jakobus 1:22, wi e leisi: „Tron doeman foe a wortoe, èn no soso sma di e jere nomo, èn e kori oensrefi nanga falsi prakseri.” „Tron doeman foe a wortoe”! Jakobus troetroe poti krakti na tapoe a thema disi foe a brifi foe en. Wi moesoe arki, ne wi moesoe doe „leti so”! (Genesis 6:22) Foeroe sma na ini a ten disi e froeklari taki a nofo foe jere wan lezing noso foe abi wan prati wanwan leisi ini na anbegi di den e doe leki wan gwenti, ma den no e doe noti moro. Kande den e prakseri taki solanga den e libi wan ’boen libi’ akroederi den eigi markitiki, dan dati sa de nofo. Ma Jesus Krestes ben taki: „Efoe wan sma wani waka na mi baka, dan a moesoe drai en baka gi ensrefi èn a moesoe teki en pina-postoe èn waka doronomo na mi baka” (Mateus 16:24). Foe handri na wan fasi foe òfer joesrefi èn foe horidoro foe di wi e waka na baka na eksempre foe Jesus foe doe a wani foe Gado, na sani di den e aksi krinkrin foe troe kresten. Foe doe a wani foe Gado, de a srefi gi den leki fa a ben de na ini a fosi jarihondro di Jesus, di ben kisi wan opobaka, ben komanderi: „Go foe dati ede, èn meki disipel foe sma foe ala nâsi” (Mateus 28:19). Fa joe e doe na ini a tori disi?
15. (a) Sortoe sani Jakobus e teki gersi, foe sori fa wi kan tron kolokoe „doeman foe a wortoe?” (b) Foe san ede a no nofo foe anbegi leki wan gwenti nomo?
15 Efoe wi e tan loekoe finifini na ini a Wortoe foe Gado, dan a kan de leki wan spikri di e sori wi sortoe sma wi de. Jakobus e taki: „A sma di e loekoe finifini na ini a volmaakti wet di e meki wi kon fri, èn di e tan na ini, a sma disi, foe di a tron wan sma di jere èn no frigiti, ma wan doeman foe a wroko, sa kolokoe te a e doe en” (Jakobus 1:23-25). Ija, a sa de wan kolokoe „doeman foe a wortoe”. Boiti dati, a de prenspari foe de wan „doeman” na ini ibri pikin afersi foe a kresten libi foe wi. Noiti wi no moesoe kori wisrefi foe prakseri taki na anbegi di de wan gwenti nomo, nofo kaba. Jakobus e gi wi rai foe doe wan toe afersi foe a troe anbegi di srefi fajafaja kresten kande no poti prakseri na tapoe. A e skrifi: „A fasi foe anbegi di de krin èn di no pori ini na ai foe Gado wi Tata, na disi: foe sorgoe gi den weisipikin nanga weduwe ini a banawtoe foe den, èn foe wan sma kibri ensrefi sondro taki grontapoe flaka en.” — Jakobus 1:27.
16. Na sortoe fasi Abraham ben kon tron „a mati foe Jehovah”, èn fa wi kan tron En mati?
16 A no nofo foe taki nomo, ’Mi e bribi na ini Gado’, èn foe no doe noti moro. Soleki fa Jakobus 2:19 e taki: „Oenoe e bribi taki wán Gado de, a no so? Oenoe e doe heri boen. Ma srefi den ogri jeje e bribi èn e beifi.” Jakobus e poti krakti na tapoe taki „bribi, efoe a no abi wroko srefi, dede”, èn foe Abraham a e taki: „A bribi foe en ben go makandra nanga den wroko foe en, èn nanga en wroko en bribi ben kon volmaakti” (Jakobus 2:17, 20-22). Den wroko foe Abraham ben abi foe doe nanga a jepi foe a famiri foe en, a lobi di a ben lobi foe teki sma na oso, a sreka di a ben sreka ensrefi foe òfer Isak, èn a ’meki di a ben meki bekènti na poebliki’ a tranga bribi foe en na ini a pramisi foe Gado foe „a foto di abi troetroe fondamenti”, a Mesian Kownoekondre di moesoe kon ete (Genesis 14:16; 18:1-5; 22:1-18; Hebrewsma 11:8-10, 13, 14; 13:2). A e fiti, taki „den ben kari [Abraham] ’a mati foe Jehovah’” (Jakobus 2:23). Wisrefi kan tron ’mati foe Jehovah’ te wi e meki fajafaja wi bribi nanga howpoe na ini en Kownoekondre foe regtfardikifasi bekènti.
17. (a) Foe san ede den ben „froeklari [Rakab] regtfardiki”, èn fa a ben kisi pai? (b) Sortoe langa lijst bijbel e gi foe den wan di ’ben kon tron doeman foe a wortoe’? (c) Fa Job ben kisi pai, èn foe san ede?
17 Den sma di e „tron doeman foe a wortoe”, foe troe „froeklari regtfardiki nanga jepi foe den wroko, èn no nanga jepi foe bribi wawan” (Jakobus 2:24). Rakab ben de wan foe den di ben poti wroko na a bribi foe en, na ini a „wortoe” di a ben jere foe den makti wroko foe Jehovah. A ben kibri den spion foe Israèl èn a ben jepi den foe lowe, èn dan a ben tjari na osofamiri foe en papa kon na wan, so taki den kan tan na libi. Na ini na opobaka, a sa prisiri srefisrefi foe leri taki a bribi foe en, makandra nanga wroko, ben meki a tron wan granmama foe a Mesias! (Josua 2:11; 6:25; Mateus 1:5) Hebrewsma kapitel 11 e gi wan langa lijst foe tra sma di ’ben tron doeman’ di den ben sori a bribi foe den, èn den sa kisi foeroe pai. Wi no moesoe frigiti Job toe, di ben taki na ondro serjoesoe tesi: „Meki a nen foe Jehovah tan kisi blesi.” Soleki fa wi si kaba, a bribi nanga den wroko foe en ben abi foeroe pai leki bakapisi (Job 1:21; 31:6; 42:10; Jakobus 5:11). Na so a de toe, taki a hori di wi e horidoro na ini a ten disi leki „doeman foe a wortoe” sa meki taki wi e kisi a boen-ati foe Jehovah.
18, 19. Fa den brada di sma ben kwinsi langa ten kaba, „tron doeman foe a wortoe”, èn sortoe blesi a wroko foe den tjari?
18 Den brada foe wi na Owstoe Europa de toe na mindri den wan di ben miti foeroe na ini den jari di pasa. Foe di den poeroe foeroe skotoe na ini a ten disi, meki troetroe den „tron doeman foe a wortoe” na ini a njoen kontren foe den. Zendeling nanga pionier foe kondre na ini a birti, froisi go drape foe asisteri na ini a leriwroko, èn foe orga sani. A bijkantoro foe Fensikondre èn tra krosibei bijkantoro foe a Waktitoren Genootschap seni bowman di sabi den wroko heri boen, èn a bradafasi foe wi na heri grontapoe di lobi foe gi sani, gi moni foe bow njoen bijkantoro nanga Kownoekondre zaal. — Teki gersi 2 Korentesma 8:14, 15.
19 Den brada dati di ben kisi kwinsi langa ten kaba, ben de fajafaja na ini a velddienst! Den ’e wroko tranga èn e doe foeroe moeiti’ foe wini a lasi di den ben lasi na ini a ten di den no ben man kisi okasi foe doe dati na ini „moeilek ten” (1 Timoteus 4:10; 2 Timoteus 4:2). Foe eksempre, na ini april 1995 na Albania, pe den ben kwinsi den na wan kefalek takroefasi, a heri ipi foe a Kownoekondre njoensoe di abi a titel „Foe san ede a libi foeroe nanga someni problema?” ben prati na ini dri dei nomo. Disi ben de wan heri boen fasi foe go fisiti den 3491 sma baka di ben fisiti a Memrefesa foe a dede foe Jesus — moro foeroe leki den 538 aktief preikiman foe den.
20. San a nomroe foe sma di ben fisiti a Memrefesa e sori, èn fa foeroe sma kan kisi jepi?
20 So srefi tra kondre ben doe wan spesroetoe sani toe ini a nomroe foe moro leki 10.000.000 fisitiman tapoe a Memrefesa na ini den jari di pasa no so langa ete. Na foeroe presi, den njoen sma di ben kon tranga na ini bribi foe di den ben fisiti èn ben e hori a Memrefesa, e ’tron doeman foe a wortoe’. Wi kan gi moro foe den njoen kompe deki-ati foe kan kisi a grani dati?
21. Na baka sortoe pasi wi moesoe feti fajafaja èn nanga sortoe marki, soleki fa wi jaritekst e sori?
21 Leki den fajafaja kresten dati na ini a fosi jarihondro, èn so foeroe foe sensi a ten dati, meki wi abi a fasti bosroiti foe doe foeroe moeiti foe „feti fajafaja na baka a marki” foe têgo libi, awinsi a sa de na ini a hemel Kownoekondre noso na ini a kontren foe en na grontapoe (Filipisma 3:12-14). A warti ala moeiti foe wi foe doro a marki dati. Disi a no a ten foe tron sma baka di e jere nomo, ma disi na a joisti ten foe ’de tranga èn foe wroko’ (Hagai 2:4; Hebrewsma 6:11, 12). Foe di wi ’teki a prani foe a wortoe’, meki a de so, taki wi ’e tron prisiri doeman foe a wortoe’ nownowde èn foe têgo na ini a ten di e kon.
Fa joe ben sa piki?
◻ Fa wi kan horidoro nanga prisiri?
◻ San na „a koni foe tapoesei”, èn fa wi kan feti fajafaja na en baka?
◻ Foe san ede wi moesoe „tron doeman foe a wortoe, èn no soso sma di e jere nomo”?
◻ Sortoe njoensoe moesoe poesoe wi foe de „doeman foe a wortoe”?
[Prenki na tapoe bladzijde 25]
Meki wi toe opo wi ati gi a leri foe Gado
[Prenki na tapoe bladzijde 26]
A soifri retifasi foe Job ben kisi pai di a ben kisi en gosontoe baka èn wan prisiri kolokoe libi nanga den lobiwan foe en