Hori fasti na joe bribi, awansi joe e kisi tesi!

„Si en leki wan troetroe prisiri nomo, mi brada, te oenoe e miti difrenti tesi.” — JAKOBUS 1:2.

1. Sortoe sani e miti a pipel foe Jehovah, ala di den e tan dini en na ini bribi èn nanga „wan ati di breiti”?

A PIPEL foe Jehovah de leki en Kotoigi di e poti bribi na ini en èn di de nanga „wan ati di breiti” (Deuteronomium 28:47; Jesaja 43:10). Den e doe disi ala di foeroe tesi e kon na den tapoe. Awansi den abi problema, tokoe den e feni trowstoe na ini den wortoe: „Si en leki wan troetroe prisiri nomo, mi brada, te oenoe e miti difrenti tesi, foe di oenoe sabi taki na eigifasi disi foe oen bribi di kisi tesi, abi horidoro leki bakapisi.” — Jakobus 1:2, 3.

2. San wi sabi foe a skrifiman foe a brifi foe Jakobus?

² A disipel Jakobus, wan afoe-brada foe Jesus Krestes, ben skrifi den wortoe dati na wan sani foe 62 G.T. (Markus 6:3). Jakobus ben de wan owroeman na ini a gemeente na Jerusalem. Foe taki en leti, en, Cefas (Petrus), nanga Johanes „ben sori foe de stonfoetoe” — sma di ben horibaka na wan krakti fasi gi a gemeente foe den (Galasiasma 2:9). Di sma ben go na „den apostel nanga den owroeman” foe taki foe a tori di ben abi foe doe nanga a besnijdenis, na wan sani foe 49 G.T., dan Jakobus ben gi boen rai di ben abi en fondamenti na tapoe bijbel èn di a fosi jarihondro tiri skin dati ben teki abra. — Tori foe den Apostel 15:6-29.

3. San ben de wan toe foe den problema di ben miti den fosi jarihondro kresten, èn fa wi kan kisi a moro bigi wini foe a brifi foe Jakobus?

³ Jakobus, di ben de wan jeje skapoeman di ben broko en ede nanga tra sma, ’ben sabi fa na ipi ben tan’ (Odo 27:23). A ben froestan taki kresten ben kisi foe doe nanga hebi tesi na a ten dati. A fasi fa son kresten ben prakseri foe sani ben moesoe poti reti baka, bika den ben sori moro lobi gi goedoesma leki gi trawan. Gi wan heri ipi kresten, na anbegi ben de soso wan plekti. Son wan ben doe ogri nanga a tongo foe den di den no ben man dwengi. Wan grontapoe fasi foe denki ben abi takroe bakapisi, èn foeroe sma no ben abi pasensi noso den no ben tan begi doronomo. Foe taki en leti, son kresten ben kon siki na jejefasi. A brifi foe Jakobus e taki foe den afersi dati na wan fasi di e bow sma, èn a rai foe en de praktis na ini a ten disi neleki fa a ben de praktis na ini a fosi jarihondro G.T. Wi sa abi foeroe wini te wi e si a brifi disi leki wan sani di skrifi gi wi persoonlijk.a

Te wi e ondrofeni tesi

4. Fa wi moesoe si tesi?

⁴ Jakobus e sori wi fa wi moesoe si tesi (Jakobus 1:1-4). A no e taki foe a famiri banti di a ben abi nanga a Manpikin foe Gado, ma na wan saka fasi a e kari ensrefi „wan srafoe foe Gado èn foe Masra Jesus Krestes”. Jakobus e skrifi gi „den twarfoe lo” foe Israèl na jejefasi „di panja na ala presi”, fosifosi foe di den ben kisi froefolgoe (Tori foe den Apostel 8:1; 11:19; Galasiasma 6:16; 1 Petrus 1:1). Leki kresten, sma e froefolgoe wi so srefi, èn wi „e miti difrenti tesi”. Ma efoe wi e memre taki den tesi di wi horidoro na ondro, e tranga a bribi foe wi, dan wi sa „si en leki wan troetroe prisiri nomo” te den e kon na wi tapoe. Efoe wi e hori wi soifri retifasi na Gado te wi e kisi tesi, dan dati sa tjari kolokoe di e tan, kon gi wi.

5. San den tesi foe wi kan wani taki so srefi, èn san e pasa te wi e horidoro na ondro den nanga boen bakapisi?

⁵ Den tesi di wi e kisi wani taki so srefi den problema di libisma gwenti kisi. Foe eksempre, wan takroe gosontoe kan trobi wi. Now Gado no e dresi sma nanga jepi foe wondroe, ma a e gi piki na tapoe a begi di wi e begi foe kisi koni èn a krakti di de fanowdoe foe kakafoetoe gi siki (Psalm 41:1-3). Na foe regtfardikifasi ede, meki wi e pina toe leki Kotoigi foe Jehovah di sma e froefolgoe (2 Timoteus 3:12; 1 Petrus 3:14). Te wi e horidoro na ondro den tesi disi nanga boen bakapisi, dan dati e gi wi boeweisi taki wi abi bribi, èn a e tron wan ’eigifasi di kisi tesi’. Èn te a bribi foe wi e wini, dan dati „abi horidoro leki bakapisi”. Bribi di e kon moro tranga nanga jepi foe tesi, sa jepi wi foe horidoro na ondro tesi di wi sa kisi ete.

6. Fa „horidoro tjari en wroko kon na wan kaba”, èn sortoe praktis sani wi kan doe te wi de na ondro tesi?

⁶ „Ma”, na so Jakobus e taki, „meki a horidoro tjari en wroko kon na wan kaba.” Efoe wi e gi pasi taki wan tesi kon na wi tapoe, sondro taki wi e proeberi foe tjari wan esi-esi kaba kon na en foe di wi e doe wan sani di bijbel no leri wi, dan a horidoro di wi e horidoro sa doe a „wroko” foe meki wi tron krestensma dorodoro, di no e mankeri bribi. A no de foe taki, dati efoe wan tesi e tjari wan swakifasi kon na krin, dan wi moesoe soekoe a jepi foe Jehovah foe a tesi no teki wi abra. San efoe a tesi e kon foe di wan sma e kori wi foe doe seks hoeroedoe? Meki wi begi foe a problema dati èn baka dati handri akroederi den begi foe wi. A kan taki wi moesoe soekoe wan tra wrokope noso doe tra sani, so taki wi e hori wi soifri retifasi na Gado. — Genesis 39:7-9; 1 Korentesma 10:13.

A soekoe di sma e soekoe koni

7. Fa wi kan kisi jepi foe man kakafoetoe gi tesi?

⁷ Jakobus e sori wi san wi moesoe doe efoe wi no sabi fa foe handri te wi kisi foe doe nanga wan tesi (Jakobus 1:5-8). Jehovah no sa piri-ai gi wi efoe wi no abi nofo koni èn efoe wi e begi nanga bribi foe kan kisi disi. A sa jepi wi foe si wan tesi na wan joisti fasi èn foe horidoro na ondro a tesi. Kompe bribiman kan poti wi prakseri na tapoe bijbeltekst noso dati kan doe te wi e studeri bijbel. Sani di pasa na ondro a tiri foe Gado, kan jepi wi foe si san wi moesoe doe. A jeje foe Gado kan gi wi tiri (Lukas 11:13). A no de foe taki, dati efoe wi wani abi den wini dati, dan wi moesoe tan krosibei na Gado èn na a pipel foe en. — Odo 18:1.

8. Foe san ede wan tweifriman no sa kisi noti foe Jehovah?

⁸ Jehovah e gi wi koni, so taki wi kan kakafoetoe gi tesi efoe wi e ’tan aksi nanga bribi, èn no e tweifri kwetikweti’. Wan tweifriman „de neleki wan skwala foe se di winti e tjari èn e wai go-kon” sondro taki wi kan sabi na fesi fa a sa waka. Efoe na jejefasi wi ben sa degedege na so wan fasi, dan ’wi no moesoe prakseri taki wi sa kisi wan sani foe Jehovah’. No meki wi de „sma di no man teki bosroiti” èn di „no e tanapoe kánkan” na ini begi noso na tra fasi. Na presi foe dati, meki wi abi bribi na ini Jehovah, a Fonten foe koni. — Odo 3:5, 6.

Goedoe kresten nanga pôti kresten kan abi prisiri

9. Foe san ede wi abi reide foe de nanga prisiri leki anbegiman foe Jehovah?

⁹ Srefi efoe pôtifasi na wan foe den tesi foe wi, meki wi hori na prakseri taki goedoe kresten so srefi pôti kresten kan abi prisiri (Jakobus 1:9-11). Bifo moro foeroe foe den salfoewan ben tron bakaman foe Jesus, den no ben abi foeroe sani na materia sei èn grontapoe ben wisiwasi den (1 Korentesma 1:26). Ma den ben kan prisiri foe a ’prisiri di [den] ben abi’, foe di den ben de Kownoekondre erfgenaam (Romesma 8:16, 17). Na a tra sei, goedoe sma di trawan ben gi grani fosi, e ondrofeni taki sma e ’lagi den’ now leki bakaman foe Krestes, bika grontapoe e wisiwasi den (Johanes 7:47-52; 12:42, 43). Ma leki foetoeboi foe Jehovah, wi alamala kan prisiri foe di grontapoe goedoe èn hei posisi no wani taki someni te joe e agersi den nanga den goedoe di wi abi na jejefasi. Èn fa wi e prisiri taki na ondro wi, presi no de gi bigimemre foe di wan sma abi wan boen posisi na sociaal sei! — Odo 10:22; Tori foe den Apostel 10:34, 35.

10. Fa wan kresten moesoe si materia goedoe?

¹⁰ Jakobus e jepi wi foe si taki wi libi no e anga foe goedoe èn foe den marki di wi e doro na ini grontapoe. Neleki fa a moi foe wan bromki no kan tapoe en foe dede na ini a „tranga faja” foe a son, na so den goedoe foe wan goedoeman no kan meki a libi wan moro langa libi (Psalm 49:6-9; Mateus 6:27). A kan dede na ini a ten di a e feti na baka „den pasi foe” en, kande na ini bisnis afersi. Foe dati ede, a de wan prenspari sani foe „goedoe ini a tori foe Gado” èn foe doe ala san wi man foe horibaka gi Kownoekondre afersi. — Lukas 12:13-21; Mateus 6:33; 1 Timoteus 6:17-19.

Kolokoe foe den sma di e horidoro na ondro tesi

11. Sortoe sani den sma di e hori fasti na a bribi foe den e froewakti, ala di den e kisi tesi?

¹¹ Efoe wi goedoe noso efoe wi pôti, wi kan de kolokoe soso te wi e horidoro na ondro tesi (Jakobus 1:12-15). Efoe wi e horidoro na ondro tesi ala di wi no e lasi a bribi foe wi, dan sma kan taki dati wi de kolokoe, bika a de wan prisiri sani te wi e doe san boen na Gado ai. Te kresten di kisi salfoe nanga santa jeje e hori fasti na a bribi foe den te na dede, dan den e kisi „a kownoe-ati foe libi”, a dede di den no man dede na hemel (Openbaring 2:10; 1 Korentesma 15:50). Efoe wi abi a howpoe foe libi na grontapoe èn e tan hori wi bribi na ini Gado, dan wi kan loekoe go na têgo libi na ini wan paradijs na grontapoe (Lukas 23:43; Romesma 6:23). Jehovah boen troetroe gi ala den sma di e sori bribi na ini en!

12. Foe san ede wi no moesoe taki: „Na Gado e tesi mi”, te problema e miti wi?

¹² A kan, taki Jehovah srefi e tesi wi nanga problema? Nôno, wi no moesoe taki: „Na Gado e tesi mi.” Jehovah no e proeberi foe kori wi so taki wi e doe wan sondoe, ma a de seiker taki a e jepi wi èn e gi wi a krakti di de fanowdoe foe horidoro na ondro tesi, efoe wi e tanapoe kánkan na ini bribi (Filipisma 4:13). Gado santa, èn dati meki a no e poti wi na ini situwâsi di ben sa swaki a man di wi man kakafoetoe gi ogri. Efoe wi e meki wisrefi kon na ini wan situwâsi di no boen na Gado ai èn wi e doe wan sondoe, dan wi no moesoe meki En tjari a nen foe dati, „bika sma no kan tesi Gado nanga ogri sani, èn ensrefi no e tesi no wan sma toe”. Ala di Jehovah kan gi pasi taki wan tesi e kon na wi tapoe so taki wi e kisi tranga leri foe a boen foe wi, tokoe a no e tesi wi nanga wan ogri sani na prakseri (Hebrewsma 12:7-11). Satan kan tesi wi foe doe wan ogri sani, ma Gado kan froeloesoe wi foe a godelowsoewan dati. — Mateus 6:13.

13. San kan pasa efoe wi no e kakafoetoe gi wan takroe lostoe?

¹³ Wi moesoe tan begi doronomo foe di wi kan kon na ini wan situwâsi di kan meki wi kisi wan takroe lostoe èn dati ben kan meki wi e doe wan sondoe. Jakobus e taki: „Ibriwan sma e kisi tesi foe di en eigi lostoe e hari en èn e kori en.” Wi no kan meki Gado tjari a nen gi a sondoe foe wi, efoe wi meki wi ati tan prakseri foe sondoe lostoe. Efoe wi no e poeroe wan takroe lostoe, dan ’a e meki froktoe’, a e gro na ini na ati, èn „a e tjari sondoe kon”. Te sondoe doro en marki, dan a „e tjari dede kon”. A de krin, taki wi moesoe kibri wi ati èn kakafoetoe gi sondoe firi (Odo 4:23). Gado ben warskow Kain taki sondoe ben o teki en abra, ma a no ben kakafoetoe gi disi (Genesis 4:4-8). So boen dan, san efoe wi e bigin libi na wan fasi di bijbel no leri wi? Foe troe wi moesoe taigi den kresten owroeman tangi te den e proeberi foe meki wi kon na tapoe a reti pasi baka, so taki wi no e sondoe teige Gado. — Galasiasma 6:1.

Gado — A Fonten foe boen sani

14. Na sortoe fasi wi kan taki dati den presenti foe Gado de „volmaakti”?

¹⁴ Wi moesoe hori na prakseri taki Jehovah na a Fonten foe boen sani, ma no foe tesi (Jakobus 1:16-18). Jakobus e taki nanga kompe bribiman leki „lobi brada” èn a e sori taki Gado na a Giman foe ’ibri boen presenti nanga volmaakti kado’. Jehovah en presenti na jejefasi èn na materia sei de „volmaakti”, noso dorodoro, den no e mankeri noti. Den e kon „foe tapoesei”, foe Gado en tanpresi na hemel (1 Kownoe 8:39). Jehovah na „a Tata foe den hemel leti” — son, moenkenki, nanga stari. A e gi wi jeje leti nanga waarheid toe (Psalm 43:3; Jeremia 31:35; 2 Korentesma 4:6). Tra fasi leki fa a de nanga a son di e meki taki skaduw e kenki te a e boeweigi èn di de na en moro hei penti na hemel soso na twarfoe joeroeten, Gado de na en heimarki ala ten foe gi sma san boen. Foe troe, a sa sreka wi nanga den joisti sani foe man kakafoetoe gi tesi efoe wi e gebroiki den sani dati boen, di a seti na jejefasi èn di wi e kisi nanga jepi foe en Wortoe èn „a getrow en koni srafoe”. — Mateus 24:45.

15. San na wan foe den moro moi presenti foe Jehovah?

¹⁵ San ben de wan foe den moro moi presenti foe Gado? A gebroiki di a gebroiki santa jeje foe meki jeje manpikin di e wroko makandra nanga a boen njoensoe, noso a „wortoe foe waarheid”. Den sma di kon gebore na jejefasi na „wan sortoe fosi froktoe”, di den teki poeroe na mindri a libisma famiri foe de wan hemel „kownoekondre nanga priester” (Openbaring 5:10; Efeisesma 1:13, 14). A kan taki Jakobus prakseri foe den fosi froktoe foe a gerst di den ben òfer 16 Nisan, di ben de a dei di Jesus ben kisi wan opobaka, èn taki a ben prakseri foe na òfer di den ben òfer toe tarwe brede na tapoe a dei foe a Pinksterfesa, di a santa jeje ben kanti kon na tapoe sma (Lefitikus 23:4-11, 15-17). Efoe dati de so, dan Jesus ben o de den fosi froktoe èn den kompe erfgenaam foe en „wan sortoe fosi froktoe”. San efoe wi abi wan grontapoe howpoe? We, te wi e hori disi na prakseri, dan dati sa jepi wi foe hori fasti na a bribi di wi e bribi na ini a Giman foe „ibri boen presenti”, di meki taki têgo libi man na ondro wan Kownoekondre tiri.

De wan ’doeman foe a Wortoe’

16. Foe san ede wi moesoe de ’esi foe jere, ma no esi foe taki èn foe kisi atibron’?

¹⁶ Efoe wi e kisi tesi na tapoe wi bribi nownowde efoe no, wi moesoe de „doeman foe a wortoe” (Jakobus 1:19-25). Wi moesoe de „esi foe jere” a wortoe foe Gado, èn de sma di e doe en foe di wi e gi jesi (Johanes 8:47). Na a tra sei, meki wi „no [de] esi foe taki”, foe di wi e loekoe boen san wi e taki (Odo 15:28; 16:23). A kan taki Jakobus e tranga wi foe no taki so esi dati den tesi foe wi e kon foe Gado. Wi e kisi a rai toe foe „no [de] esi foe kisi atibron; bika na atibron foe libisma no e meki taki a kisi a regtfardikifasi foe Gado”. Efoe wi ati e bron nanga san wan sma e taki, dan meki wi ’no handri esi-esi’ so taki wi kan sorgoe taki wi no e gi wan piki di wi e sari foe dati baka ten (Efeisesma 4:26, 27). Bigi atibron kan tjari problema kon gi wi èn a kan tron wan tesi gi tra sma, èn a bakapisi foe dati no kan de a sani di bribi na ini wi regtfardiki Gado e aksi foe wi. Boiti dati, efoe wi „abi a koni foe si sani krin, pasa marki”, dan wi sa de sma di „no e atibron esi”, èn den brada nanga sisa foe wi sa lobi foe kon na wi. — Odo 14:29.

17. San na den bakapisi te wi e poeroe takroedoe na ini na ati nanga a prakseri?

¹⁷ Seiker wi moesoe de fri foe „ala dotifasi” — ala sani di Gado e tegoe foe den èn di e tjari atibron fasi kon. Moro ete, wi moesoe ’poeroe a sani trowe di no de fanowdoe, dati na takroedoe’. Wi alamala moesoe poeroe iniwan doti fasi foe a skin noso a jeje (2 Korentesma 7:1; 1 Petrus 1:14-16; 1 Johanes 1:9). Di wi ben poeroe takroedoe na ini na ati nanga a prakseri, dan dati ben jepi wi foe „teki na wan safri-atifasi a poti di a wortoe [foe waarheid] poti dipi na ini sma” (Tori foe den Apostel 17:11, 12). A no abi bisi o langa wi de kresten kaba, wi moesoe tan meki taki moro waarheid foe bijbel e poti dipi na ini wi. Foe san ede? Foe di nanga jepi foe a jeje foe Gado, a wortoe di poti dipi na ini sma, e meki „a njoen persoonlijkheid” di e tjari froeloesoe kon gi wi. — Efeisesma 4:20-24.

18. Fa wan sma di de soso wan jereman foe a wortoe, e difrenti foe wan sma di de so srefi wan doeman foe en?

¹⁸ Fa wi e sori taki a wortoe na wi tiriman? Te wi de sma di e gi jesi èn di de „doeman foe a wortoe èn no soso sma di e jere nomo” (Lukas 11:28). „Doeman” abi bribi di e tjari wroko kon leki a wroko di den e wroko fajafaja na ini a kresten diniwroko èn a teki di den e teki prati na den konmakandra foe Gado pipel doronomo (Romesma 10:14, 15; Hebrewsma 10:24, 25). Wan sma di e jere a wortoe nomo „de leki wan man di e loekoe na ini wan spigri fa en eigi fesi tan”. A e loekoe wan momenti, èn dan a e gowe èn e frigiti san a moesoe doe kande foe kenki a fasi fa en fesi sori. Leki „doeman foe a wortoe”, wi e studeri boen èn e gi jesi na a „volmaakti wet” foe Gado, di abi foe doe nanga ala sani di a e aksi foe wi. A fri di wi abi na a fasi dati de heri tra fasi leki a de di wan sma de wan srafoe foe sondoe nanga dede, bika a e tjari wi go na libi. So boen, meki wi ’tan na ini a volmaakti wet’, èn ondrosoekoe en doronomo èn gi jesi na en. Èn prakseri nomo! Wi, leki ’doeman foe a wroko, di no de sma di e jere èn e frigiti’, abi a prisiri di wan sma e kisi foe di Gado feni en boen. — Psalm 19:7-11.

A troe anbegi wani taki moro leki foe de anbegiman di den fasi foe anbegi de soso wan gwenti

19, 20. (a) San krin anbegi e aksi foe wi, soleki fa Jakobus 1:26, 27 e sori? (b) San na wan toe eksempre foe anbegi di no flaka?

¹⁹ Efoe wi wani, taki Gado feni wi boen, dan wi moesoe hori na prakseri taki a troe anbegi a no soso wan plekti (Jakobus 1:26, 27). Wi kan denki taki wi na ’anbegiman di abi wan fasi foe anbegi di de soso wan gwenti’ èn di Jehovah feni boen, ma san e teri troetroe na a fasi fa a e si ibriwan foe wi (1 Korentesma 4:4). Wan serjoesoe fowtoe kan de a man di wi no man ’dwengi a tongo’. Wi ben sa kori wisrefi efoe wi ben sa prakseri taki na anbegi foe wi e plisi Gado, te wi e froeteri ogri-ati lei foe trawan, e froeteri lei, noso na tra fasi no e gebroiki a tongo boen (Lefitikus 19:16; Efeisesma 4:25). Seiker, wi no wani taki wi „fasi foe anbegi” de wan sani di „no warti noti”, èn taki Gado no feni en boen foe iniwan reide ede.

²⁰ Ala di Jakobus no e taki foe ibri sani di abi foe doe nanga krin anbegi, tokoe a e taki dati a abi foe doe so srefi nanga ’a loekoe di sma moesoe loekoe den pikin di no abi papa nanga mama èn den weduwe na ini a banawtoe foe den’ (Galasiasma 2:10; 6:10; 1 Johanes 3:18). A kresten gemeente e teki spesroetoe notisi foe den weduwe èn a e sorgoe foe den (Tori foe den Apostel 6:1-6; 1 Timoteus 5:8-10). Foe di Gado na a Sma di e kibri a weduwe èn a pikin di no abi papa, dan meki wi wroko makandra nanga En, foe di wi e doe san wi man foe jepi den na jejefasi èn na materia sei (Deuteronomium 10:17, 18). Wan krin anbegi wani taki so srefi „foe no meki grontapoe, [na onregtfardiki libisma libimakandra de na ini a makti foe Satan] flaka joe” (Johanes 17:16; 1 Johanes 5:19). Foe dati ede, meki wi tan fri foe a godelowsoe fasi fa grontapoe sma e tjari densrefi, so taki wi kan gi Jehovah glori èn kan abi boen bakapisi na ini en diniwroko. — 2 Timoteus 2:20-22.

21. Foe sortoe tra aksi di abi foe doe nanga a brifi foe Jakobus, wi moesoe go prakseri?

²¹ Jakobus rai di wi loekoe te so fara, moesoe jepi wi foe horidoro na ondro tesi èn foe hori fasti na a bribi foe wi. A moesoe meki wi kisi moro warderi gi a lobi-ati Giman foe boen presenti. Èn den wortoe foe Jakobus e jepi wi foe libi na wan fasi di de akroederi wan krin anbegi. Sortoe tra sani a e tjari kon na ondro wi prakseri? Sortoe tra sani wi kan doe foe boeweisi taki wi e bribi troetroe na ini Jehovah?

[Foetoewortoe]

San joe ben sa piki?

◻ San sa jepi wi foe horidoro na ondro tesi?

◻ Foe san ede kresten kan de nanga prisiri, ala di den e kisi tesi?

◻ Fa wi kan de doeman foe a wortoe?

◻ San krin anbegi wani taki?

[Prenki na tapoe bladzijde 9]

Te tesi e miti wi, dan wi moesoe sori bribi na ini a krakti di Jehovah abi foe gi piki na tapoe begi

[Prenki na tapoe bladzijde 10]

„Doeman foe a wortoe”, e meki Gado Kownoekondre bekènti na heri grontapoe